ۇلاندىق ساربازدار جوعالعان بالانى تاۋىپ، ناشاقوردى ۇستادى

استانا. KAZINFORM - كۇن سايىن قوعامدىق ءتارتىپ پەن قاۋىپسىزدىكتى قامتاماسىز ەتۋگە ۇلتتىق ۇلاننان اسكەري قىزمەتشىلەرمەن قاتار، كينولوگتار دا جۇمىلدىرىلادى. جانە ولاردىڭ باپتاۋىنداعى قىزمەتتىك يتتەر تىنىشتىقتى كۇزەتۋ كەزىندە قۇقىق بۇزۋشىلاردى قۇرىقتاۋعا، قىلمىستاردى اشۋعا سەپتىگىن تيگىزەدى. بۇل تۋرالى ق ر ءى ءى م ۇلتتىق ۇلانىنىڭ باسپا ءسوز قىزمەتى مالىمدەدى.

ماسەلەن، 25-قازان كۇنى ساعات 20:45 شاماسىندا استانا قالاسى قاجىمۇقان كوشەسى، 6-ۇيدەن كامەلەتكە تولماعان بالانىڭ جوعالعانى تۋرالى شۇعىل حابارلاما تۇسەدى.

«اتالعان مەكەن-جايعا جىلدام جەتكەن 5573 اسكەري ءبولىمى كينولوگيالىق قىزمەتىنىڭ اعا مامانى قاتارداعى الىشەر سۇلەيمەنوۆ وقيعانىڭ ءمان-جايىن انىقتاپ، جوعالعان 8 جاسار بالانى ىزدەۋ ءۇشىن زوررو ەسىمدى قىزمەتتىك ءيتتىڭ كومەگىنە جۇگىنەدى. الىشەردىڭ قىزمەتتە ابدەن شىڭدالعان ءتورت اياقتى سەرىگى بالانىڭ جەكە زاتىن ءيىس الىپ، بىردەن ىزگە تۇسەدى. كوپ ۇزاماي، بالاقاي تابىلىپ، اتا-اناسىنا امان-ەسەن تابىستالدى»، - دەلىنگەن حابارلامادا.

سول كۇنى اسكەري جاساق باستىعى ەركەبۇلان پارىمبەكوۆ، پاترۋلشى ساربازدار قاتارداعى ەرماحان سۇلتانوۆ، دانيال كەنجەباي ۇلى جانە كينولوگ ەفرەيتور ابىلايحان ورازبەك ەلوردانىڭ ەسىل اۋدانىندا ورنالاسقان ورال كوشەسىن بارلاۋ كەزىندە شوپتەن بىردەڭە ىزدەپ جۇرگەن كۇدىكتى ادامدى بايقايدى. ەفرەيتور ورازبەك بىردەن حۋح ەسىمدى يتكە پارمەن بەرەدى.

- بىزدەگى يتتەر جارىلعىش زاتتاردى تاپقىش، ءىز كەسكىش دەگەن سياقتى باعىتتاردا تاربيەلەنەدى. ال مەن باپتايتىن حۋح ەسىرتكى ونىمدەرىن تابۋعا بەيىمدەلگەن. ءشوپ اراسىنان سارى تاسپامەن ورالعان بايلام تاۋىپ شىقتى. كۇدىكتى مەن ەسىرتكىنى ودان ءارى تەكسەرۋ ماقساتىندا وقيعا ورنىنا پوليتسيا قىزمەتكەرلەرىن شاقىردىق، - دەيدى ۇلاندىق كينولوگ.

بۇگىنگى تاڭدا ەلوردالىق جەدەل قۇراما قاتارىندا 30 دان استام ءيت بار. ولار ق ر ءى ءى م ۇلتتىق ۇلانى قىزمەتىندە قوعامدىق ءتارتىپتى قامتاماسىز ەتۋ جانە قۇقىق بۇزۋشىلىقتار مەن قىلمىستاردى اشۋعا كەڭىنەن قاتىسىپ كەلەدى.