240 مىڭعا جۋىق تالاپكەر تەستىلەۋگە قاتىسۋعا ەكى مۇمكىندىكتى ەسەپكە العاندا 446 مىڭنان استام ءوتىنىش بەرگەن (2025 -جىلى - 216 مىڭعا جۋىق تالاپكەر تەستىلەۋگە قاتىسۋعا ەكى مۇمكىندىكتى ەسەپكە العاندا 399 مىڭ ءوتىنىش). ونىڭ ىشىندە تاپسىرۋشىلاردىڭ 74 پايىزى قازاق تىلىندە، 26 پايىزعا جۋىعى ورىس تىلىندە، 851 ادام اعىلشىن تىلىندە تەستىلەۋدەن وتۋگە ءوتىنىش ءبىلدىردى.
- ءوتىنىش بەرۋ كەزىندە تالاپكەرلەر تەستىلەۋ كۇنىن، ۋاقىتىن جانە پۋنكتىن وزدەرى تاڭدادى. ۇ ب ت- نىڭ ءبىرىنشى كۇنى بۇكىل ەلىمىز بويىنشا 926 ادام، ونىڭ ىشىندە ەلوردادا 359 تالاپكەر تەستىلەۋدەن وتەدى. جالپى ۇ ب ت 45 تەستىلەۋ پۋنكتىندە ۇيىمداستىرىلعان. بىرنەشە جىل قاتارىنان ەڭ كوپ تاڭدالعان بەيىندىك پاندەر كومبيناتسياسى «ماتەماتيكا- فيزيكا» بولىپ قالىپ وتىر - ونى تۇلەكتەردىڭ 17,9 پايىزى تاڭدادى. بۇل تالاپكەرلەردىڭ ينجەنەرلەر، مۇعالىمدەر، ەنەرگەتيكتەر، قۇرىلىسشىلار جانە باسقا دا تەحنيكالىق ماماندىقتارعا دەگەن ۇمتىلىسىن كورسەتەدى. تانىمالدىعى بويىنشا كەلەسى كومبيناتسيالار: بولاشاق مەديكتەرگە باعىتتالعان «بيولوگيا- حيميا» كومبيناتسياسى (14,5 پايىز) جانە شىعارماشىلىق باعىتقا قىزىعۋشىلىق تانىتقان تالاپكەرلەردى تارتاتىن «شىعارماشىلىق ەمتيحان» كومبيناتسياسى (12,4 پايىز)، - دەدى ۇلتتىق تەستىلەۋ ورتالىعىنىڭ ديرەكتورا نۇرسەيىت بايجانوۆ.
نەگىزگى ۇ ب ت- عا دايىندىق دەڭگەيىن ارتتىرۋ ءۇشىن قاڭتار جانە ناۋرىز ۇ ب ت-لارىن تاپسىرعان تالاپكەرلەرگە ءار ءپان بويىنشا جەكە تاقىرىپتىق تالداۋ ۇسىنىلعان، ياعني ءاربىر ۇ ب ت-دان كەيىن (قاڭتار، ناۋرىز) تۇلەكتەر وزدەرىنىڭ ءالسىز تۇستارىن انىقتاپ، سول باعىتتا دايىندالىپ، بىلىمدەرىن جەتىلدىرۋگە مۇمكىندىك الدى. سونداي-اق ءبىرىنشى مۇمكىندىكتى تاپسىرعاننان كەيىن، ولاردا ەكىنشى تەستىلەۋگە دايىندىقتى جاقسارتۋ ءۇشىن ۋاقىت بولادى.
دايىندىق دەڭگەيىن باعالاۋ جانە ەمتيحان فورماتىنا بەيىمدەلۋ ءۇشىن بايقاۋ سىناعىنان ءوتۋ مۇمكىندىگى قاراستىرىلعان. سونىمەن قاتار ۇلتتىق تەستىلەۋ ورتالىعىنىڭ سايتىندا تەست تاپسىرمالارى قۇراستىرىلعان ادەبيەتتەر ءتىزىمى مەن تەست سپەتسيفيكاتسياسى؛ «قازاقستان تاريحى» جانە «دۇنيەجۇزى تاريحى» پاندەرى بويىنشا 100 تاريحي داتا ءتىزىمى؛ «ينفورماتيكا» پانىنەن تەرميندەر ءتىزىمى؛ «قازاق ادەبيەتى» جانە «ورىس ادەبيەتى» بويىنشا ادەبي شىعارمالار ءتىزىمى ورنالاستىرىلعان.
2026 -جىلى ۇلتتىق ءبىرىڭعاي تەستىلەۋدىڭ فورماتى وزگەرىسسىز قالادى. تالاپكەرلەر ءۇش مىندەتتى جانە تاڭداۋى بويىنشا ەكى بەيىندىك ءپاندى تاپسىرادى. ۇ ب ت تاپسىرمالارىنىڭ جالپى سانى - 120. ونىڭ ىشىندە «قازاقستان تاريحى» ءپانى بويىنشا 20 تاپسىرما، «وقۋ ساۋاتتىلىعى» مەن «ماتەماتيكالىق ساۋاتتىلىق» پاندەرىنەن 10 تاپسىرمادان، سونداي-اق ەكى بەيىندىك ءپاننىڭ ءارقايسىسىنان 40 تاپسىرمادان بەرىلەدى. ۇ ب ت بويىنشا ەڭ جوعارى بال 140 بالدى قۇرايدى.
تەستىلەۋ ۋاقىتى - 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك.
ەمتيحان كەزىندە تەستىلەۋ باعدارلاماسىندا كالكۋلياتور، حيميالىق ەلەمەنتتەردىڭ پەريودتىق جۇيەسى جانە تۇزداردىڭ ەرىگىشتىك كەستەسى قولجەتىمدى بولادى. سونىمەن قاتار تالاپكەرلەرگە ىڭعايلى بولۋ ءۇشىن كەستەلەردىڭ قاعاز نۇسقالارى دا بەرىلەدى.
تەست تاپسىرۋشىلار تەستىلەۋ اياقتالعاننان كەيىن 30 مينۋت ىشىندە اپەللياتسياعا ءوتىنىش بەرە الادى. اپەللياتسياعا ءوتىنىش بەرگەن تەستىلەنۋشىلەردىڭ سەرتيفيكاتى اپەللياتسيالىق كوميسسيانىڭ شەشىمىنەن كەيىن تالاپكەردىڭ جەكە كابينەتىندە قولجەتىمدى بولادى.
تالاپكەردىڭ جەكە كابينەتىندە رەسپۋبليكالىق اپەللياتسيالىق كوميسسيا وتىرىسىنىڭ مەرزىمى كورسەتىلەدى. رەسپۋبليكالىق اپەللياتسيالىق كوميسسيا وتىرىسى باستالعانعا دەيىن اپەللياتسيا ءوتىنىشىن جەكە كابينەتىندە قايتارىپ الۋ مۇمكىندىگى بار. اپەللياتسيا ءوتىنىشىن قايتارىپ العاننان كەيىن سەرتيفيكات تالاپكەردىڭ جەكە كابينەتىندە ءبىر جۇمىس كۇنى ىشىندە قولجەتىمدى بولادى.
مينيمالدى شەكتى بالدار وزگەرىسسىز قالدى. ۇلتتىق جوعارى وقۋ ورىندارىنا ءتۇسۋ شەكتى بالى - 65 بال، باسقا ج و و-نا 50 بال، «پەداگوگيكالىق عىلىمدار» ءبىلىم بەرۋ سالاسى بويىنشا - 75 بال، «دەنساۋلىق ساقتاۋ» ءبىلىم بەرۋ سالاسى بويىنشا - 70 بال، «قۇقىق» دايارلاۋ باعىتى بويىنشا - 75 بال. بۇل رەتتە «قازاقستان تاريحى» جانە ۇ ب ت-نىڭ ەكى بەيىندىك ءپانى جانە (نەمەسە) شىعارماشىلىق ەمتيحان بويىنشا كەمىندە 5 بال، ال «وقۋ ساۋاتتىلىعى» مەن «ماتەماتيكالىق ساۋاتتىلىق» پاندەرى بويىنشا كەمىندە 3 بالدان جيناۋ قاجەت. جوعارى وقۋ ورىندارى ءبىلىم بەرۋ باعدارلامالارىنىڭ توپتارى بويىنشا وزدەرىنىڭ شەكتى بالدارىن بەلگىلەي الاتىنىن ايتا كەتكەن ءجون.
قاۋىپسىزدىكتى قامتاماسىز ەتۋ جانە بۇزۋشىلىقتاردىڭ الدىن الۋ ماقساتىندا تەستىلەۋگە كىرەبەرىستە تىيىم سالىنعان زاتتاردى، مىسالى، تەلەفونداردى، شپارگالكالاردى جانە ت. ب. الىپ كىرۋگە جول بەرمەۋ ءۇشىن قول جانە رامالىق مەتالل ىزدەگىشتەر قولدانىلادى.
تەستىلەۋ اۋديتوريالارىندا رۇقسات ەتىلگەن ماگنيتتىك تولقىندار شەگىندە ءموبيلدى جانە راديوەلەكتروندى بايلانىس سيگنالدارىن باساتىن قۇرىلعىلار پايدالانىلادى، سونداي- اق بەينەباقىلاۋ جۇرگىزىلەدى.
2026 -جىلعى ۇ ب ت اياقتالعاننان كەيىن، 31-قازانعا دەيىن بەينەجازبالارعا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە باسقا دا ەرەجەلەردى بۇزۋ فاكتىلەرى انىقتالعان جاعدايدا، وقۋعا ءتۇسۋشىنىڭ ۇ ب ت ناتيجەلەرى (سونداي-اق گرانت يەگەرى اتانعان جاعدايدا ءبىلىم بەرۋ گرانت كۋالىگى) جويىلادى.