ەل وڭىرلەرىندە قانت قانشا تۇرادى

استانا. KAZINFORM - قازاقستاندا قانت الەۋمەتتىك ماڭىزى بار ازىق-تۇلىك تاۋارلارىنىڭ تىزىمىنە ەنگىزىلگەن. ياعني، باعاسى رەتتەلەدى دەگەن ءسوز. ءبىراق ەل ايماقتارىندا قانت باعاسى بويىنشا ءسال-ءپال ايىرماشىلىق بار ەكەن. مۇنى Kazinform اگەنتتىگىنىڭ ءتىلشىسى ءونىم باعاسىن زەرتتەۋ بارىسىندا كوز جەتكىزدى.

ەڭ ارزان قانت اقتوبە مەن اقتاۋدان تابىلدى. اتالعان وڭىرلەردە ءونىمنىڭ ءبىر كەلىسى 400 تەڭگەدەن تومەن. ال، كوپتەگەن ايماقتاردا 400 دەن 420 تەڭگەگە دەيىنگى ارالىقتا. اتاپ ايتساق، قوستاناي مەن قىزىلوردادا 400 تەڭگە، پەتروپاۆل مەن پاۆلوداردا 410 تەڭگە، شىمكەنت، قاراعاندى، جەزقازعان، الماتى، استانا، ورال قالالارىندا 420 تەڭگە تۇرادى. تاراز بەن تالدىقورعاندا - 430 تەڭگە، اتىراۋ، سەمەي، قونايەۆ، تۇركىستان جانە وسكەمەندە قانتتىڭ كەلىسى 450-460 تەڭگەگە دەيىن جەتەدى. كوكشەتاۋدا قانتتىڭ ءبىر كەلىسى 500 تەڭگەگە تەڭ.

بۇل - ەڭ كوپ قولداناتىن تۇيىرشىكتەلگەن قانتتىڭ باعالارى. ال، تازارتىلعان قانتتىڭ سالماعى جارتى كەلى بولاتىن قوراپشاسى 400 تەڭگەدەن باستالادى. ءدال وسىنداي كولەمدەگى ءونىم ەكى مىڭ تەڭگەدەن دە ساتىلادى. ءبىراق قۇرامىندا كارامەل ءدامى نەمەسە ءۆيتامينى بار. قۇراق قانتتىڭ ءبىر كەلىسى ەكى مىڭ تەڭگەدەن باستالادى. كوكوس جاڭعاعى ودان دا قىمبات - 200 گرامى 2,5 مىڭ تەڭگەدەن، كوكوس پالماسىنان الىنعان ورگانيكالىق ءتۇرى ءدال سونداي سالماق ءۇشىن 7,2 مىڭ تەڭگەدەن ساتىلادى.

ۇلتتىق ستاتيستيكا بيۋروسىنىڭ مالىمەتىنشە، 13-تامىزداعى جاعداي بويىنشا قازاقستاندا تۇيىرشىكتەلگەن قانتتىڭ ورتاشا قۇنى كەلىسىنە 414 تەڭگەنى قۇرايدى.

ەڭ ارزان قانت اقتوبەدە، ونداعى ورتاشا باعا 379 تەڭگەگە تەڭ. ال، ەڭ قىمباتى پەتروپاۆلدا (ورتاشا باعا - 439 تەڭگە).

Globalproductprices.com پورتالى ءساۋىر ايىندا 82 ەلدە جيناقتالعان قانت باعاسى تۋرالى دەرەكتەردى ۇسىندى. سايتتىڭ مالىمەتىنشە، الەمدە ءتاتتى ءونىمنىڭ ورتاشا باعاسى 1,52 ا ق ش دوللارىن (725 تەڭگە) قۇرايدى. ەڭ تومەن باعا پاكىستاندا - 0,61 ا ق ش دوللارى (291 تەڭگە)، ەڭ قىمباتى - گونكونگتا 3,19 ا ق ش دوللارى (1520 تەڭگە). بۇل كورسەتكىش بويىنشا قازاقستان 1,38 دوللار (658 تەڭگە) باعامەن 47- قاتاردا تۇر.