ەسكە سالساق، قۇرىلتاي دەپۋتاتى سەرگەي پونوماريەۆ قازاقستاندا وكپە وبىرىن ەرتە انىقتاۋ جانە سكرينينگتەن وتكىزۋ ءۇشىن وتاندىق جاساندى ينتەللەكت جۇيەسىن ىسكە قوسۋدى ۇسىندى. وسى ورايدا ول بيىل قىركۇيەك ايىندا ۇكىمەت باسشىسىنىڭ اتىنا دەپۋتاتتىق ساۋال جولداپ، وندا ەلىمىزدە سكرينينگتەن وتكىزۋگە ارنالعان جاساندى ينتەللەكت نەگىزىندەگى جۇيە ازىرلەنگەنىن اتاپ ءوتتى.
- ءتيىستى بۇيرىققا سايكەس، جاڭا تەحنولوگيانى ەنگىزۋ ءۇشىن ونىڭ كلينيكالىق تيىمدىلىگىن، قاۋىپسىزدىگىن جانە ەكونوميكالىق دۇرىستىعىن باعالاۋدى جۇرگىزۋ قاجەت. سودان كەيىن شەشىم قابىلداۋ ءۇشىن دەنساۋلىق ساقتاۋ سالاسىنداعى ۋاكىلەتتى ورگانعا ەسەپ بەرۋ تالاپ ەتىلگەن. 2024 -جىلى مەديتسينالىق كورسەتىلەتىن قىزمەتتەردىڭ ساپاسى جونىندەگى بىرىككەن كوميسسيا LungCancerCT تەحنولوگياسىنا (Forus Data ج ش س) قاتىستى دەنساۋلىق ساقتاۋ تەحنولوگيالارىن باعالاۋ ءىس-قيمىلدارىن جۇزەگە اسىردى. دالەلدەمەلىك بازانىڭ جەتكىلىكسىزدىگىنە بايلانىستى، اتالعان تەحنولوگيانىڭ كلينيكالىق تيىمدىلىگىن راستايتىن زەرتتەۋ دەرەكتەرى مەن ناتيجەلەرى الىنعانعا دەيىن ونى ەنگىزۋدى كەيىنگە قالدىرۋ تۋرالى شەشىم قابىلداندى، - دەلىنگەن ولجاس بەكتەنوۆتىڭ قۇرىلتاي دەپۋتاتىنىڭ ساۋالىنا بەرگەن جاۋابىندا.
ونىڭ ايتۋىنشا، ەكى جىل وتكەننەن كەيىن دە ازىرلەۋشى (Forus Data ج ش س) كومپانيا تەحنولوگيانىڭ تيىمدىلىگىنە قاتىستى جۇرگىزىلگەن كلينيكالىق زەرتتەۋلەر تۋرالى دەرەكتەردى ۇسىنعان جوق.
- اتاپ ايتقاندا، مەديتسينالىق كورسەتىلەتىن قىزمەتتەردىڭ ساپاسى جونىندەگى بىرىككەن كوميسسيانىڭ وڭ قورىتىندىسىنسىز بۇل تەحنولوگيانى مەديتسينا سالاسىندا تاجىريبە جۇزىندە ەنگىزۋ مۇمكىن ەمەس. ويتكەنى راستالماعان جۇيەنى پايدالانۋ حالىق دەنساۋلىعىنا قاۋىپ توندىرەدى، - دەدى پرەمەر-مينيستر.
سونىمەن قاتار، ۇكىمەت وكپە وبىرى بويىنشا سكرينينگتى كەزەڭ-كەزەڭىمەن، سونىڭ ىشىندە زاماناۋي سيفرلىق شەشىمدەردى قولدانۋ ارقىلى ەنگىزۋ بويىنشا ءتيىستى شارا قابىلداپ جاتىر.
وسى ماقساتتا دەنساۋلىق ساقتاۋ مينيسترلىگى ءتيىستى بۇيرىققا وزگەرىستەر ەنگىزدى. بۇل تۇرعىدا 2027 -جىلى شىعىس قازاقستان، قاراعاندى جانە جامبىل وبلىستارىندا، سونداي-اق ۇلىتاۋ وبلىسىندا تومەن دوزالى كومپيۋتەرلىك توموگرافيانى قولدانۋ ارقىلى پيلوتتىق سكرينينگتى وتكىزۋ جوسپارلانعان.