ەل تاريحىندا العاش رەت ەكى پەداگوگ «قازاقستاننىڭ ەڭبەك ەرى» اتاندى

استانا. KAZINFORM - ۇلتتىق مەرەكە - رەسپۋبليكا كۇنى قارساڭىندا پرەزيدەنت قاسىم-جومارت توقايەۆتىڭ جارلىعىمەن ەلىمىزدىڭ الەۋمەتتىك-ەكونوميكالىق جانە مادەني دامۋىنا ۇلەس قوسقان عالىمدار، مۇعالىمدەر، دارىگەرلەر، قۇتقارۋشىلار جانە جۇمىسشىلار ماراپاتتالدى.

بيىل ەلىمىزدىڭ تاريحىندا العاش رەت ەكى پەداگوگ - گۇلجانار نۇرپەيىسوۆا مەن ەلمارا ترايسوۆا «قازاقستاننىڭ ەڭبەك ەرى» اتاندى.

Kazinform اگەنتتىگى قوس مۇعالىمدى قۇتتىقتاپ، سالتاناتتى جيىننان العان اسەرىن سۇرادى.

«مەن الماتى قالاسى 4-ارنايى مەكتەپ-ينتەرناتىندا ماتەماتيكا پانىنەن ساباق بەرەمىن. 1980-جىلى قىزدار پەداگوگيكالىق ۋنيۆەرسيتەتىنىڭ ماتەماتيكا فاكۋلتەتىن ءبىتىرىپ، 21 جاسىمنان باستاپ، وسى سالادا ەڭبەك ەتىپ كەلەمىن. جالپى ەڭبەك ءوتىلىم - 41 جىل بولسا، 26 جىل بويى ارنايى مەكتەپ-ينتەرناتتا مۇمكىندىگى شەكتەۋلى بالالارمەن جۇمىس ىستەپ كەلەمىن»، - دەدى گ. نۇرپەيىسوۆا اگەنتتىك تىلشىسىنە بەرگەن سۇحباتىندا.

ورال قالاسى ا. تايمانوۆ اتىنداعى 34-مەكتەپ-گيمنازياسىنىڭ مۇعالىمى ەلمارا ترايسوۆا 35 جىلعا جۋىق ۋاقىت بويى ورىس ءتىلى مەن ادەبيەتى پانىنەن ساباق بەرەدى. ونىڭ ايتۋىنشا، «ەڭبەك ەرى» اتاعى ۇلكەن توسىنسىي بولدى.

«سەنبى كۇنى بىزگە حابارلاسىپ، پرەزيدەنتپەن كەزدەسۋ وتەتىنى ايتىلدى. مۇنى ءبىلىم سالاسىنا قاتىستى جيىنداردىڭ ءبىرى دەپ ويلادىق. ال بۇگىن «قازاقستاننىڭ ەڭبەك ەرى» دەپ، بارشا رەسپۋبليكاعا اتىمىزدى جاريالاعاندا قاتتى تاڭ قالدىق. مەنىڭ زەينەتكە شىعۋىما 4-5 جىل ۋاقىت قالدى عوي، سوندىقتان عۇمىر بويى اينالىسقان ەڭبەگىمنىڭ اقتالعانىنا، باعالانعانىنا قۋاندىم. قاراپايىم مۇعالىمنىڭ استاناعا، اقوردا كەلىپ، پرەزيدەنت قولىنان ماراپات الاتىنىن ارمانداماعان دا شىعارمىن. ءبىز ارقىلى پرەزيدەنت قازاقستاننىڭ بارشا مۇعالىمدەرىنىڭ ەڭبەگىن باعالادى دەپ ويلايمىن»، - دەپ وي ءبولىستى ە. ترايسوۆا.

مۇعالىمدەردى ق ر وقۋ-اعارتۋ ءمينيسترى عاني بەيسەمبايەۆ قابىلداپ، ولارعا ى. التىنسارين توسبەلگىسىن تارتۋ ەتكەن.

«بۇگىنگى كۇن توسىنسىيلارعا تولى بولدى. تولقىپ تا تۇرمىز. العان اتاعىمىزدىڭ، مەدالىمىزدىڭ جاۋاپكەرشىلىگى دە زور ەكەنىن بىلەمىز. سوندىقتان وسى ماراپاتتارىمىزعا بارىنشا لايىقتى جۇمىس ىستەۋدى جالعاستىرامىز. بالالاردى بىلىممەن، تاربيەمەن سۋسىنداتۋعا بار كۇشىمىزدى جۇمسايمىز. اقىن ماعجان جۇمابايەۆ «التى الاشتىڭ باسى قوسىلسا، ءتور مۇعالىمدىكى» دەپ ايتىپ كەتكەن ەدى. كەيىنگى كەزدەرى مۇعالىمدەر بەدەلى تومەندەپ قالعان كەزدەر بولدى. وسىدان بەس جىل بۇرىن پەداگوگ مارتەبەسى تۋرالى زاڭعا قول قويىلىپ، مۇعالىمدەرگە قۇرمەت ارتتى، جاعدايى جاقساردى. بۇگىنگىدەي ەلەۋلى ماراپاتتار بەرىلە باستادى. ۇستازداردىڭ جۇكتەمەسى ازايىپ، وزىنە ءتان ەمەس فۋنكتسيالاردان، قوعامدىق جۇمىستاردان بوساتىلدى. ەندى تەك ساپالى ءبىلىم بەرۋىمىز كەرەك»، - دەدى گ. نۇرپەيىسوۆا.

ايتا كەتەيىك، «قازاقستاننىڭ ەڭبەك ەرى» جوعارى اتاعىن العان ءتورت ادامنىڭ ۇشەۋى - عىلىم مەن ءبىلىم سالاسىنىڭ وكىلدەرى.

«مۇنىڭ ءبارى عىلىم مەن ءبىلىمدى دامىتۋعا، عالىمدار مەن ۇستازداردىڭ مارتەبەسىن كوتەرۋگە قاتىستى ناقتى ءىس- شارالاردى جوسپارلى تۇردە جۇرگىزىپ جاتقان پرەزيدەنت ساياساتىنىڭ بىرىزدىلىگىن كورسەتەدى. 137 مۇعالىم مەن 80 عالىمنىڭ ماراپاتتالۋى - مەملەكەتتىك ساياساتتىڭ وزىق ويلى قوعامدى قالىپتاستىرۋعا، جاسامپازدىق پەن جاڭاشىلدىق قۇندىلىقتارىن ناسيحاتتاۋعا باعىتتالعانىن ايعاقتايدى»، - دەپ جازدى مەملەكەتتىك كەڭەسشى ەرلان قارين تەلەگرامداعى كانالىندا.

ەسكە سالساق، بۇگىن پرەزيدەنت جارلىعىمەن رەسپۋبليكا كۇنىنە وراي عالىمدار، مۇعالىمدەر، دارىگەرلەر، قۇتقارۋشىلار جانە جۇمىسشىلار ماراپاتتالدى.

مەملەكەت باسشىسى رەسپۋبليكا كۇنىنە وراي وتكەن سالتاناتتى جيىندا ءسوز سويلەدى.