ەل شەكاراسى قانشالىقتى قورعالعان

استانا. KAZINFORM - قازىرگى جاعداي شەكارا قاۋىپسىزدىگىنە دە جاڭا تالاپتار قويىپ وتىر. قازاقستان شەكاراسى قانشالىقتى قورعالعان؟ شەكاراشىلار الدىندا قانداي ماسەلەلەر تۇر؟ بۇل ساۋالعا ۇ ق ك ءتوراعاسى ەرمەك ساعىمبايەۆ Kazinform اگەنتتىگىنە ەكسكليۋزيۆتى سۇحباتىندا اتاپ ءوتتى.

مەملەكەتتىك شەكارانى قورعاۋ مەن كۇزەتۋ دە ۇلتتىق قاۋىپسىزدىكتى قامتاماسىز ەتۋدىڭ باسىم باعىتتارىنىڭ بىرىنە جاتادى. تەرروريزم، زاڭسىز كوشى-قون جانە ەسىرتكى اينالىمى ءقاۋپىنىڭ وزەكتىلىگى جاعدايىندا شەكارا قىزمەتىنىڭ جۇمىسى ۇنەمى جەتىلدىرىلىپ وتىر.

- بۇگىندە شەكارا قىزمەتى الدەقايدا موبيلدى، زاماناۋي تالاپتارعا ساي ارەكەت ەتەدى جانە ەلىمىزدىڭ شەكارالارىن سەنىمدى قورعايدى.

2025 -جىلدىڭ باسىنان بەرى شەكاراشىلار 14,6 مىڭنان استام شەكارالىق رەجيمدى بۇزعان ادامداردى ۇستادى. قارۋ مەن وق-ءدارىنى ەلگە زاڭسىز اكەلۋدىڭ 475 ارەكەتىنىڭ جولىن كەستى، زاڭسىز 14 ميلليارد تەڭگەدەن استام شەتەل ۆاليۋتاسىن الىپ وتپەك بولعان جاعدايلارعا توسقاۋىل قويدى.

قازىر وزىق تەحنولوگيالار ەنگىزىلىپ جاتىر. «استانا»، «الماتى» اۋەجايلارىندا جانە «قورداي» اۆتوموبيل وتكىزۋ پۋنكتىندە اۆتوماتتاندىرىلعان شەكارالىق باقىلاۋ جۇيەلەرى ىسكە قوسىلدى. باقىلاۋ جاساندى ينتەللەكت پەن اۆتوماتتاندىرىلعان دەرەكقورلاردى قولدانۋ ارقىلى كۇشەيتىلدى. بۇل تاجىريبە الداعى ۋاقىتتا بارلىق شەكارا بويىندا جالعاسادى، - دەدى ەرمەك ساعىمبايەۆ.

ۇكىمەتتىڭ قولداۋىمەن 10 اۆتوموبيل وتكىزۋ پۋنكتىنىڭ زاماناۋي ينفراقۇرىلىمىن قالىپتاستىرۋ جۇمىستارى جۇرگىزىلدى. بۇل جۇمىستار اياقتالعان سوڭ، ولار زاماناۋي باقىلاۋ قۇرالدارىنا نەگىزدەلگەن ءتيىمدى، قاۋىپسىز جۇمىس ىستەۋگە مۇمكىندىك بەرەدى.

- بارلىق وتكىزۋ پۋنكتى ءبىرىڭعاي تسيفرلىق جۇيەگە بىرىكتىرىلىپ جاتىر. بۇل ەرەجە بۇزۋدى جەدەل انىقتاۋعا جانە ازاماتتاردىڭ شەكارادان ءوتۋ ۋاقىتىن قىسقارتۋعا مۇمكىندىك بەرەدى.

باستى ماقسات - قاۋىپسىزدىكتى قامتاماسىز ەتىپ، ارتىق بيۋروكراتيالىق كەدەرگىلەردى بولدىرماۋ. بۇل اسىرەسە ترانسشەكارالىق ساۋدا مەن ءتۋريزمدى دامىتۋ ءۇشىن ماڭىزدى.

سونىمەن قاتار شەكارا ينفراقۇرىلىمىن جانە ينجەنەرلىك جابدىقتاردى جەتىلدىرۋدە ءبىرقاتار ماسەلەلەر دە بار. بۇل جۇمىستار وتە كۇردەلى ءارى قوماقتى قارجىنى تالاپ ەتەدى. ول كەزەڭ- كەزەڭىمەن ىسكە اسىرىلىپ جاتىر، - دەدى ول.