- بۇگىندە ەلىمىزدە 8 مىڭنان استام مەكتەپ جۇمىس ىستەپ تۇر، ونىڭ 5 مىڭنان استامى اۋىلدىق جەردە ورنالاسقان. سوڭعى جەتى جىلدا ەلىمىزدە 1 ميلليوننان استام وقۋشى ورنىنا ارنالعان 1342 مەكتەپ سالىندى. بۇل مەكتەپتەر جەلىسىن كەڭەيتۋگە، قولدانىستاعى مەكتەپتەرگە تۇسەتىن جۇكتەمەنى ازايتۋعا، سونداي-اق ءۇش اۋىسىمدى وقىتۋ، اپاتتى مەكتەپتەر جانە وقۋشى ورىندارىنىڭ تاپشىلىعى ماسەلەلەرىن كەزەڭ-كەزەڭىمەن شەشۋگە مۇمكىندىك بەردى، - دەدى ج. شاراباسوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ ايتۋىنشا، 2019- 2026 -جىلدار ارالىعىندا قابىلدانعان شارالار ناتيجەسىندە ءۇش اۋىسىمدا جۇمىس ىستەيتىن مەكتەپتەر سانى بەس ەسەگە، اپاتتى مەكتەپتەر ەكى ەسەگە، ال وقۋشى ورىندارىنىڭ جالپى تاپشىلىعى ءتورت ەسەگە قىسقاردى.
- كەيىنگى جىلدارداعى ەڭ ءىرى ينفراقۇرىلىمدىق جوبالاردىڭ ءبىرى - مەملەكەت باسشىسىنىڭ تاپسىرماسىمەن جۇزەگە اسىرىلىپ جاتقان «كەلەشەك مەكتەپتەرى» ۇلتتىق جوباسى. بۇل ۇلتتىق جوبا زاماناۋي، ءقاۋىپسىز جانە فۋنكتسيونالدى ءبىلىم بەرۋ ورتاسىن قۇرۋعا باعىتتالعان مەكتەپ ينفراقۇرىلىمىنىڭ جاڭا ۇلگىسىنە كوشۋگە مۇمكىندىك بەردى. جوبا اياسىندا ەلىمىز بويىنشا 460000 وقۋشى ورنىنا ارنالعان جاڭا فورماتتاعى 217 مەكتەپ سالىندى. ونىڭ 84 ى اۋىلدىق جەردە ورنالاسقان. بارلىق مەكتەپتەر جوبالاۋ، قۇرىلىس جانە جابدىقتاۋعا قويىلاتىن زاماناۋي تالاپتاردى قامتيتىن، سونداي-اق ءار ءوڭىردىڭ كليماتتىق جانە سەيسميكالىق ەرەكشەلىكتەرىن ەسكەرەتىن ءبىرىڭعاي ستاندارتقا ساي سالىندى، - دەدى ۆيتسە-مينيستر.
ونىڭ سوزىنە قاراعاندا، ۇلتتىق جوبانى جۇزەگە اسىرۋ ناقتى ناتيجەلەر بەردى: بۇرىن ءۇش اۋىسىممەن جۇمىس ىستەگەن 54 مەكتەپتە جانە اپاتتى 12 مەكتەپتەگى ماسەلەلەر شەشىلدى، سونداي-اق 100 دەن استام مەكتەپتە وقۋشى ورىندارىنىڭ تاپشىلىعى ازايتىلدى.
ءوز كەزەگىندە ق ر وقۋ-اعارتۋ مينيسترلىگى ينۆەستيتسيالىق ساياسات جانە ينفراقۇرىلىمدى دامىتۋ دەپارتامەنتىنىڭ ديرەكتورى ايقوجا ءابسادىقوۆ سوڭعى 7 جىلدا ەلدە اپاتتى جاعدايداعى 48 مەكتەپ جويىلعانىن ايتتى. سونىمەن قاتار اتالعان مەرزىمدە ءۇش اۋىسىمداعى مەكتەپتەر بەس ەسە ازايىپ، 133 مەكتەپتىڭ پروبلەماسى شەشىلگەن.
- قازىرگى كەزدە ەلدە 36 ءۇش اۋىسىمدى جانە 27 اپاتتى مەكتەپ بار. بۇل ماسەلە كەزەڭ-كەزەڭ شەشىلەدى. بيىل 4 ءۇش اۋىسىمدى مەكتەپتىڭ پروبلەماسى شەشىلمەك. 2027 -جىلى 2 ءۇش اۋىسىمدى مەكتەپ پەن 10 اپاتتى مەكتەپكە قاتىستى جاعداي تۇزەلەدى. 2028 -جىلى 15 ءۇش اۋىسىمدى مەكتەپ پەن 9 اپاتتى نىسان، سونداي-اق 2029-2030 -جىلدارى 15 ءۇش اۋىسىمدى مەكتەپ جانە 4 اپاتتى مەكتەپكە قاتىستى شەشىم جاسالادى، - دەدى ايقوجا ءابسادىقوۆ.