ەل بويىنشا 10249 رەفەرەندۋم ۋچاسكەسىندە داۋىس بەرۋ باستالدى

استانا. KAZINFORM - ورتالىق رەفەرەندۋم كوميسسياسى ءتوراعاسىنىڭ ورىنباسارى كونستانتين پەتروۆ ەلدىڭ بارلىق وڭىرىندە قازاقستاندا اتوم ەلەكتر ستانسياسىن سالۋ ماسەلەسى بويىنشا جالپىۇلتتىق رەفەرەندۋم باستالعانىن رەسمي ءمالىم ەتتى.

«ق ر ورتالىق رەفەرەندۋم كوميسسياسى وبلىستار مەن استانا، الماتى، شىمكەنت قالالارىنىڭ كوميسسيالارى ۇسىنعان اقپاراتقا سايكەس، ساعات 7.00-دەگى جاعداي بويىنشا وڭىرلەردە 10249 ۋچاسكە داۋىس بەرۋگە كىرىسكەنىن حابارلايدى. 84 ۋچاسكەدە اۋماقتىق كوميسسيالاردىڭ شەشىمدەرىنە سايكەس، داۋىس بەرۋ تاڭعى ساعات 6.00-دە باستالدى»، - دەدى ول.

ايتۋىنشا، ازاماتتاردىڭ تىزىمدەرىندە 12244683 ادام بار.

«ولاردىڭ ىشىندە 10623 ى داۋىس بەرۋ قۇقىعىن بەرەتىن ەسەپتەن شىعارۋ كۋالىكتەرىن الدى. بارلىعى 10323 رەفەرەندۋم ۋچاسكەسى بار. ونىڭ ىشىندە شەتەلدە 47 ۋچاسكە بار. ءبىر ساعاتتان كەيىن شەتەلدەردەگى ۋچاسكەلەردىڭ اشىلۋى تۋرالى اقپارات ۇسىنىلادى. ورتالىق رەفەرەندۋم كوميسسياسى ساعات10.00-دەن باستاپ ەكى ساعات سايىن ازاماتتاردىڭ رەفەرەندۋمعا قاتىسۋى تۋرالى حابارلاپ وتىرادى»، - دەدى كونستانتين پەتروۆ.

ەسكە سالايىق، بۇگىن قازاقستاندىقتار اتوم ەلەكتر ستانتسياسىن سالۋ ماسەلەسى بويىنشا جالپى ۇلتتىق رەفەرەندۋمدا داۋىس بەرەدى.

رەسپۋبليكالىق رەفەرەندۋم بيۋللەتەنىندە ءبىر عانا ساۋال بولادى: ء«سىز قازاقستاندا اتوم ەلەكتر ستانسياسىن سالۋعا كەلىسەسىز بە؟» داۋىس بەرۋشى جاۋاپتىڭ ەكى نۇسقاسىنىڭ ءبىرىن تاڭدايدى: «ءيا، كەلىسەمىن» نەمەسە، «جوق، كەلىسپەيمىن».

وزدەرىنىڭ كونستيتۋتسيالىق قۇقىعىن كورەيا رەسپۋبليكاسىنداعى قازاقستان ازاماتتارى العاشقىلاردىڭ ءبىرى بولىپ جۇزەگە اسىردى.

1-شىلدەدەگى جاعداي بويىنشا ەل كولەمىندە 12176968 ادام رەفەرەندۋمدا داۋىس بەرۋگە حاقىلى.