ەل ازاماتتارى زەينەتكەرلىككە ەرتە شىعۋى مۇمكىن بە - ەڭبەك ءمينيسترىنىڭ جاۋابى

استانا. KAZINFORM - بۇگىن ب ا ق وكىلدەرىمەن كەزدەسكەن ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ەل ازاماتتارىنىڭ زەينەتكەرلىككە ەرتە شىعۋ مۇمكىندىگىنە قاتىستى پىكىر ءبىلدىردى.

«وتە ماڭىزدى ماسەلە. كوپ بالالى انالارىمىز، مۇگەدەكتىگى بار بالالاردى اسىراپ وتىرعان انالارىمىز زەينەتكەرلىككە ەرتە شىعامىز با دەپ، وسى ماسەلەنى كوتەرىپ وتىر. زياندى وندىرىستە جۇمىس ىستەيتىن ازاماتتار دا مينيسترلىك الدىنا 50، 55 جاستان زەينەتكەرلىككە شىعۋ ماسەلەسىن قويىپ ءجۇر. بۇل حالىقارالىق دەڭگەيدە شەشىمىن تاپقان ماسەلە. ايتالىق، ەگەر زەينەت جاسىنا كەلسە دە، زەينەتكە شىقپاي، جۇمىسىن ءارى قاراي جالعاستىرعان ازاماتتارعا زەينەتاقىسىن تولەمەي، ونى بيۋجەتتە قالدىرىپ، ال زەينەت جاسىنا جەتپەي، زەينەتكە شىققىسى كەلەتىن ازاماتتارعا بيۋجەتتەگى سول قارجىنى تولەۋ قاراستىرىلىپ وتىر»، - دەدى مينيستر.

ونىڭ ايتۋىنشا، زەينەتكە ەرتە شىققىسى كەلەتىن ازاماتتاردىڭ ەڭبەك ءوتىلى 25 جىلدان كەم بولماۋى كەرەك. سونىمەن قاتار 25 جىل بويى زەينەتاقى قورىنا اۋدارىمدارى بولۋى ءتيىس. سول كەزدە ول ازاماتتار زەينەت جاسىن كۇتپەي ەرتەرەك زەينەتكە شىعا الادى.

«مىسالى، ءسىز 20 جاسىنان باستاپ جۇمىس ىستەسەڭىز، 25 جىل بويى زەينەتاقى جارناسى اۋدارىلىپ وتىرسا، 45 جاستا شىعا الاسىز. ماسەلەن، سول ۋاقىتتا بۇگىنگى كۇنمەن الىپ قاراساق، زەينەتاقىڭىز 100 مىڭ تەڭگە بولادى. ال ءسىز زەينەت جاسىنا جەتىپ، سودان كەيىن زەينەتكەرلىككە شىقساڭىز زەينەتاقىڭىز 200 مىڭ تەڭگە بولۋى مۇمكىن. ءبىز ءار ساناتقا ەسەپتەۋ جۇرگىزدىك»، - دەدى سۆەتلانا جاقىپوۆا.

ايتا كەتەرلىگى، بۇل ماسەلە قازىرگى ۋاقىتتا مۇددەلى مەملەكەتتىك ورگاندار تاراپىنان تالقىلانىپ جاتىر.

وسىعان دەيىن سۆەتلانا جاقىپوۆا كوللەدجدەردە سەرجانتتار دايىندايتىن اسكەري كافەدرالار اشۋدى ۇسىندى.