ەل اۋماعىندا رۇقسات ەتىلگەن پەستيسيدتەر تىزىمىندە اسا قاۋىپتىسى بار

الماتى. KAZINFORM - قازاقستاندا سۋبسيديالانعان پەستيسيدتەر تىزىمىندە اسا قاۋىپتىسى بار. بۇل تۋرالى الماتىدا وتكەن ورتالىق ازيا ەلدەرىندە جاسىل اۋىل شارۋاشىلىعىن دامىتۋ ءۇشىن لاستانعان اۋىلشارۋاشىلىق توپىراعىنىڭ بيو- جانە فيتورەمەدياتسيالىق تەحنولوگيالارى بويىنشا حالىقارالىق كونفەرەنتسيا بارىسىندا ف ا و پەستيسيدتەردى باسقارۋ جوباسىنىڭ جەتەكشىسى سالتانات باەشوۆا ايتتى.

مامانداردىڭ ايتۋىنشا، پەستيسيدتەردى بيولوگيالىق پرەپاراتتارمەن الماستىرۋ ەكولوگيالىق پروبلەمانىڭ بىردەن ءبىر شەشىمى.

«جوباعا قاتىسۋشى ەلدەردە، سونىڭ ىشىندە قازاقستاندا ءبىز تىركەۋ كەزىندە كوپتەگەن فاكتورلارعا نازار اۋدارامىز. بەلگىلى بولعانداي، ەلدە پايدالانىلعان جانە ءتىپتى سۋبسيديالانعان پەستيسيدتەر تىزىمىندە اسا قاۋىپتى پەستيسيدتەر بار. ولاردى پايدالانۋ ۇلتتىق زاڭنامامەن رەتتەلەدى، ءبىراق دامىعان ەلدەردە ەسكەرىلگەن كوپتەگەن كريتەريلەر نازاردان تىس قالىپ وتىر. ءبىز فەرمەرلەرگە نارىقتا بار قاۋىپسىز بالامالاردى ىزدەۋ ۇستىندەمىز. وتكەن جىلى الما باقتارى مەن قىرىققابات، قىزاناقتا القاپتارىنا سىناق جۇرگىزدىك. ناتيجە ءارتۇرلى. بيولوگيالىق قورعاۋ ادىستەرىن قولدانۋ ارقىلى پەستيسيدتەردى p عا دەيىن ازايتۋعا بولاتىنىن اتاپ وتكىم كەلەدى»، - دەدى سالتانات باەشوۆا.

ايتا كەتەيىك، پەستيتسيدتەر (لاتىن سوزدەرىنەن pestis - جۇقپالى اۋرۋ) - مادەني وسىمدىكتەردى زيانكەستەردەن، پارازيتتەردەن، ارامشوپتەردەن، اۋرۋلاردان جانە ميكروورگانيزمدەردەن قورعاۋ ءۇشىن قولداناتىن بارلىق حيميالىق قوسىلىستار.

ساراپشى ەسكىرگەن جانە جارامسىز پەستيسيدتەر قازاقستان اۋىل شارۋاشىلىعىنداعى وزەكتى ماسەلەلەردىڭ ءبىرى ەكەنىن اتاپ ءوتتى.

«بۇگىنگى كونفەرەنتسيانىڭ ماڭىزى زور. سەبەبى، بۇل ماسەلەنى شەشۋىمىز كەرەك. توپىراقتىڭ لاستانۋى اۋىل شارۋاشىلىق ونىمدەرىنە، ەت پەن سۇتكە تۇسەدى»، - دەدى ول.

فاو پەستيسيدتەردى باسقارۋ جونىندەگى اعا تەحنيكالىق كەڭەسشىسى ستەفان روبينسوننىڭ سوزىنشە، ەسكىرگەن پەستيسيدتتەردى جويۋ وتە قيىن.

«ارينە، ميلليونداعان گەكتار جەردى تازارتۋ سونشالىقتى وڭاي شارۋا ەمەس. سونىمەن قاتار، مۇنداي پەستيسيدتەردى جاعۋ وتە قىمبات ءادىس. سوندىقتان بۇگىنگى كونفەرەنتسيادا ءبىز الەمدە بار جانە الداعى 10-15 جىلدا قازاقستاندىق فەرمەرلەر قولدانا الاتىن بالاما قولجەتىمدى ادىستەردى تالقىلاپ جاتىرمىز»، - دەدى ستەفان روبينسون.

بۇعان دەيىن ەلىمىزدە پايدالانۋ مەرزىمى وتكەن 6 مىڭ توننا پەستيسيد بارىن جازعان ەدىك.

ەسكە سالايىق، مەملەكەت باسشىسى قاسىم-جومارت توقايەۆ 2024 -جىلدىڭ قاڭتارىندا ريمدە ف ا و باس ديرەكتورى سيۋ دونگيۋمەن كەزدەسۋىندە قازاقستاندا ورتالىق ازيا ءۇشىن ف ا و-نىڭ سۋبوڭىرلىك كەڭسەسىن قۇرۋدى ۇسىنعان بولاتىن.

اۆتور

الما مۇقانوۆا