كەزدەسۋدە انا تىلىمىزدە سويلەسۋىمىز تاۋەلسىز مەملەكەت ەكەندىگىمىزدى دالەلدەيدى - ارمەنيا پرەزيدەنتى
استانا. KAZINFORM - ارمەنيا پرەزيدەنتى ۆااگن حاچاتۋريان قازاقستانعا رەسمي ساپارى اياسىندا مەملەكەتتىك باسقارۋ اكادەمياسى تىڭداۋشىلارىنا ءدارىس وقىدى. ول «ارمياندىق «بەيبىتشىلىك تىرەگى»: وڭتۇستىك كاۆكازدىڭ ۇلتتىق ارتىقشىلىعى جانە تۇراقتى دامۋىنىڭ كەپىلى» تاقىرىبىنداعى ءدارىسىن ارميان تىلىندە جۇرگىزدى.
«مەن ارميان تىلىندە ءسوز سويلەيمىن. دەگەنمەن، ەكراندا ۇسىناتىن ماتەريال اعىلشىن تىلىندە ارالاس بولادى. ەگەر اۋدارما جاقسى بولسا، وندا ءبارى دۇرىس. ارميان تىلىندە ورىسشاعا اۋدارمامەن بولادى. ەگەر دۇرىس بولماسا، ورىس تىلىنە كوشەمىن. سىزدەردىڭ ءبىزدىڭ انا ءتىلىمىزدى، ءبىزدىڭ سىزدەردىڭ انا تىلدەرىڭىزدى ەستىگەنىمىز وتە ماڭىزدى. رەسمي كەزدەسۋلەردە مەن دە، پرەمەر-ءمينيسترىمىز دە ءوز تىلىمىزدە، قازاقستان تاراپى قازاق تىلىندە سويلەيدى. مۇنى وتە ماڭىزدى دەپ سانايمىن. بۇل ءوزىمىزدى كورسەتۋ ءۇشىن جاسالاتىن پروتسەدۋرا عانا ەمەس. بۇل شىن مانىندە ءبىزدىڭ تاۋەلسىز، باقۋاتتى مەملەكەت ەكەندىگىمىزدى تاعى ءبىر مارتە دالەلدەيدى»، - دەدى ارميان پرەزيدەنتى.
ۆااگن حاچاتۋريان ءدارىس بارىسىندا ارمەنيانىڭ مەملەكەتتىك باسقارۋ قۇرىلىمىنا، وڭىردەگى رولىنە، تاريحىنا، كولىك-لوگيستيكالىق الەۋەتىنە، الەۋمەتتىك-ەكونوميكالىق سالاسىنا، ينۆەستيتسيا تارتۋ، ەلدەگى جۇمىسسىزدىق ماسەلەلەرىنە توقتالدى.
«ەلدەگى جۇمىسسىزدىق 12 پايىزدى قۇرايدى. ءبىراق، بۇل شارتتى تۇردە عانا. ويتكەنى، بىزدە جۇمىس كۇشى تاپشىلىعى بار. وتانداستارىمىز وزدەرىنە ءتيىمسىز بولعاندىقتان، بەلگىلى ءبىر سالادا جۇمىس ىستەگىلەرى كەلمەيدى. سوندىقتان ولار جۇمىسسىزدار دەپ سانالادى. دەگەنمەن، ءبىزدىڭ كوشى-قون ساياساتىمىز بار جانە سول ارقىلى ءۇندىستاننان، باسقا دا شەت مەملەكەتتەردەن جۇمىس كۇشىن شاقىرامىز. ءتۇرلى باعالاۋلارعا سايكەس، جۇمىسسىزدىق دەڭگەيى 5 پايىزدان اسپاۋى ءتيىس»، - دەدى ۆااگن حاچاتۋريان.
كەشە اقوردادا ارمەنيا پرەزيدەنتى ۆااگن حاچاتۋرياندى سالتاناتتى قارسى الۋ ءراسىمى ءوتتى.
سونىمەن قاتار ەكى ەل باسشىلارى قاليبەك قۋانىشبايەۆ اتىنداعى قازاق ۇلتتىق مۋزىكالىق دراما تەاترىندا ارمەنيانىڭ مادەنيەت كۇندەرىنە وراي ۇيىمداستىرىلعان سالتاناتتى كونسەرتكە باردى.
اۆتور
مارلان جيەمباي