كۇزدە يممۋنيتەتتى كوتەرۋ ءۇشىن شايعا نە قوسۋ كەرەك؟
كۇزدە كوپشىلىك ادام تۇماۋمەن اۋىرادى. تۇماۋدىڭ الدىن الۋ ءۇشىن يممۋنيتەتتى كوتەرۋدىڭ امالدارىن قاراستىرعان ءجون. يممۋنيتەتتى ارتتىرۋ ءۇشىن تازا اۋادا ءجيى سەرۋەندەۋ، دەنەنى شىنىقتىرۋ جانە دۇرىس تاماقتانۋ كەرەك. ءىشىپ جۇرگەن شايىڭىز پايدالى بولۋ ءۇشىن جانە ول يممۋنيتەتكە كومەكتەسۋ ءۇشىن وعان نە قوسۋ كەرەك؟
تۇماۋ ماۋسىمى كەزىندە شايعا ليمون مەن ءزىمبىر قوسىپ ءىشۋ كەرەگىن بىلەمىز. ءمازىرىڭىزدى تۇرلەندىرۋ ءۇشىن شايعا باسقا نە قوسۋعا بولادى؟
قاراقات
قاراقات جيدەگىندە س دارۋمەنى وتە كوپ. سوندىقتان ول تۇماۋ جانە باسقا دا اۋرۋلاردىڭ جۇعۋىنا قارسى تۇرا الادى. قاراقات شايىن دايىنداۋ وڭاي: قاراپايىم قارا شاي دەمدەيسىز جانە ونى سۋىتاسىز. سودان سوڭ شايعا مۇزداتىلعان قاراقات نەمەسە ودان جاسالعان توساپ سالاسىز. بۇل سۋسىنعا بىرنەشە قاسىق مينەرالدى سۋ قۇيۋعا بولادى.
مۇكجيدەك
كۇزدىڭ كەلۋىمەن ءار ۇيدە بولۋى كەرەك جيدەك - مۇكجيدەك. بۇل جيدەكتەن جاسالاتىن تابيعي مورس ميكروبتارعا قارسى اسەرگە يە. ونى دايىنداۋ ءۇشىن قاراپايىم قارا نەمەسە كوك شاي دەمدەيسىز، سودان سوڭ وعان مۇكجيدەك شىرىنىن قۇياسىز. بۇل سۋسىن ودان ءارى پايدالى ءارى ءدامدى بولۋ ءۇشىن وعان جاڭا سىعىلعان اپەلسين شىرىنىن دا قوسۋعا بولادى.
شىرعاناق (وبلەپيحا)
زىمبىردەن شارشاعان بولساڭىز، ونى شىرعاناق الماستىرا الادى. ءتىپتى، تۇماۋراتىپ قالعان بولساڭىز، شىرعاناق قوسىلعان شاي جىلدام جازىلۋعا كومەكتەسەدى. شىرعاناقتى بلەندەرمەن ەزىپ الىڭىز، وعان ازداپ دارشىن جانە بال قوسىڭىز. سودان سوڭ وسى قوسپانى ىستىق شايعا سالىڭىز.