كۇيەۋىنىڭ تەگىن الۋ: مىندەت پە، تاڭداۋ ما؟

استانا. KAZINFORM – ەلىمىزدە ايەل ادامدار اراسىندا نەكەگە تۇرعان سوڭ ءوز تەگىندە قالۋ ءۇردىسى بايقالادى.

مۇنداي شەشىمگە كوبىنەسە ولار وزدەرىنىڭ اتا-تەگىن ساقتاپ قالۋعا تىرىسۋ، بابالارىنا دەگەن قۇرمەت پەن تۇلعالىق ۇستانىمى تۇرعىسىنان باراتىنى بەلگىلى بولدى.

ال پسيحولوگتار بۇل وتە ماڭىزدى ءارى كۇردەلى سۇراق دەپ وتىر. اسىرەسە قازىرگى زاماندا قوعامداعى گەندەرلىك تەڭدىك، جەكە تۇلعانىڭ اۆتونومياسى جانە وتباسى ىشىندەگى رولدەر تۋرالى پىكىرتالاستار بەلسەندى جۇرگەن كەزدە ماڭىزدى ەكەندىگىن العا تارتادى.

پسيحولوگ رەتىندە، اسىرەسە عىلىممەن اينالىساتىن مامان رەتىندە، بۇل ماسەلەگە ءبىرجاقتى جاۋاپ بەرۋ دۇرىس ەمەس، سەبەبى ءاربىر جاعداي - تۇلعالىق، مادەني، تاريحي جانە الەۋمەتتىك كونتەكستكە بايلانىستى ەرەكشەلەنەدى.

كۇيەۋىنىڭ تەگىن الۋ - بۇل مىندەت ەمەس، تاڭداۋ. ايەل ادام ءوزىنىڭ تەگىن ساقتاپ قالۋدى دا، كۇيەۋىنىڭ تەگىنە ءوتۋدى دە، ءتىپتى قوسارلى تەك الۋدى دا تاڭداي الادى. بۇل جەردە باستىسى - ول شەشىم ايەلدىڭ ءوز ەركىمەن، قىسىمسىز قابىلدانۋى كەرەك. پسيحولوگيالىق تۇرعىدان، ادامنىڭ اتى-ءجونى - ونىڭ يدەنتيفيكاتسياسىنىڭ، ءوزى تۋرالى تۇسىنىگىنىڭ ءبىر بولىگى. كەيبىر ايەلدەر ءۇشىن ءوزىنىڭ تەگىن ساقتاۋ - كاسىبي بەدەلىن، وتباسىلىق مۇراسىن، نەمەسە جەكە دارالىعىن ساقتاۋ ماعىناسىن بەرەدى. ال باسقالارى ءۇشىن كۇيەۋىنىڭ تەگىن الۋ - بىرلىكتىڭ، وتباسى بولۋدىڭ سيمۆولى، - دەپ سانايدى پسيحولوگ سىمبات ابدراحمانوۆا.

ايتۋىنشا، قازاقستاندا پاتريارحالدى مادەنيەت ءالى دە باسىم. كوپتەگەن وتباسىدا كۇيەۋىنىڭ تەگىنە ءوتۋ «قالىپتى» جانە «دۇرىس» دەپ ەسەپتەلەدى.

بۇل ءداستۇر رەتىندە قالىپتاسقان، الايدا قازىرگى تاڭدا كوپتەگەن جاستار بۇل داستۇرگە جاڭاشا قاراي باستادى. وتباسىلىق جۇيە تۇرعىسىنان قاراساق، بۇل شەشىم وتباسى مۇشەلەرىنىڭ اراسىنداعى قارىم-قاتىناسقا اسەر ەتۋى مۇمكىن. ەگەر كۇيەۋى ايەلىنىڭ ءوزىنىڭ تەگىن ساقتاۋىنا قارسى بولسا، وندا بۇل سەنىم، قابىلداۋ جانە شەكارالار ماسەلەسىنە اينالۋى مۇمكىن. مۇنداي جاعدايدا جۇپتار اراسىندا اشىق ديالوگ پەن ءوزارا قۇرمەت بولۋى وتە ماڭىزدى، - دەيدى پسيحولوگ.

ۇلتتىق ساراپشى-دەموگراف اياۋلىم ساعىنبايەۆا تەگىن اۋىستىرۋ - اركىمنىڭ جەكە ماسەلەسى دەپ ەسەپتەيدى.

جالپى، ادامنىڭ تەگىن اۋىستىرۋى - اركىم ءوزى شەشەتىن جەكە ماسەلەسى. بىرەۋ ءوزىنىڭ تەگىندە قالعىسى كەلسە، بىرەۋ جولداسىنىڭ تەگىنە اۋىسقىسى كەلەدى. كەز-كەلگەن سۇراقتار زاڭ اياسىندا عانا شەشىلۋ كەرەك. «نەكە جانە وتباسى تۋرالى» كودەكسىندە ەرلى-زايىپتىنىڭ تەك تاڭداۋ قۇقىعى بارى كورسەتىلگەن جانە وسى تۇرعىدان بۇل ادامنىڭ قۇقى مەن قالاۋى. بۇعان ەشكىمنىڭ ءمىن تاعۋىنا قۇقىسى جوق، - دەيدى دەموگراف اياۋلىم ساعىنبايەۆا.

ەلوردالىق گۇلنۇر التىنبەك قىزى تۇرمىس قۇرعان سوڭ ءوز تەگىندە قالعىسى كەلەتىنىن ايتتى.

وتباسىلىق ومىرگە قادام باسىپ، نەكەگە تۇراتىن كەزدە ءوز تەگىمدە قالعىم كەلەدى. بۇل مەن ءۇشىن ۇلكەن قۇرمەت. مەنىڭ دە ءوز شىققان اتا-تەگىم بار. بولاشاق جارىما تەك اۋىستىرۋ ماسەلەسى پروبلەما بولمايدى دەپ ويلايمىن، - دەيدى ول.

ال ساراپشىلار بولسا، بۇل ترەند ەۋروپا مەن ا ق ش- تان كەلگەنىن، سونداي-اق ايەلدەر قۇقىعىنىڭ ءبىر بولىگىنە اينالدى دەپ وتىر.

زەرتتەۋلەر كورسەتكەندەي، ايەلدىڭ كۇيەۋىنىڭ تەگىن الۋى نەمەسە الماۋى - نەكەنىڭ ساپاسىنا نەمەسە ۇزاقتىعىنا تىكەلەي اسەر ەتپەيدى. الايدا ەگەر بۇل شەشىم قىسىممەن قابىلدانسا، وندا ول ايەلدىڭ ىشكى نارازىلىعىنا، ءوزىن-ءوزى تومەن باعالاۋعا نەمەسە جاسىرىن رەنىشتەرگە اكەلۋى مۇمكىن. بۇل نەكەگە جاناما اسەر ەتۋى ىقتيمال.