كەيىنگى 4 جىلدا پەداگوگتەردىڭ ەڭبەكاقىسى ەكى ەسە وسكەن
ق ر وقۋ- اعارتۋ ءمينيسترى عاني بەيسەمبايەۆ ۇستازداردى مۇعالىمدەر كۇنى مەرەكەسىمەن قۇتتىقتادى، دەپ حابارلايدى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ.
«سىزدەردى ءتول مەرەكەمىز - مۇعالىمدەر كۇنىمەن شىن جۇرەكتەن قۇتتىقتايمىن!
ەلىمىزدەگى ميلليونداعان جاس ورەن وزدەرىڭىزدەن تاعىلىمدى تاربيە، ونەگەلى ءبىلىم الىپ، ۇلكەن ءومىر جولىنا قادام باسادى. سىزدەردىڭ قاجىرلى ەڭبەكتەرىڭىزدىڭ، شىدامدىلىقتارىڭىز بەن ادالدىقتارىڭىزدىڭ ارقاسىندا كەلەشەك ۇرپاقتىڭ نەگىزى قالىپتاسادى.
سىزدەرگە زور قۇرمەتپەن شىنايى العىسىمدى بىلدىرەمىن. تۇلعا دامۋىنىڭ باستاۋىندا تۇرعان، بويىنداعى ءبىلىمىن بالالارعا بەرىپ، ولاردى ەڭبەكسۇيگىشتىككە، ادامگەرشىلىككە، ەلجاندىلىققا، ءوز وتانىنا دەگەن سۇيىسپەنشىلىككە باۋليتىن - سىزدەرسىزدەر. قۇرمەتتى ارىپتەستەر، بۇل ماڭىزدى دا كۇرمەۋى قيىن جولداعى شەشۋشى ءرول سىزدەرگە عانا تيەسىلى!
بيىل العاش رەت پەداگوگتەردىڭ كاسىبي مەرەكەسى - مۇعالىمدەر كۇنى 5 -قازانعا بەكىتىلدى. بۇل مەرەكە ەڭ اسىل، جاۋاپتى ءارى ماڭىزدى ماماندىق يەلەرىن بىرىكتىرە تۇسەرى ءسوزسىز.
بۇگىنگى تاڭدا ەلىمىزدەگى مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ سالاسىندا 500 مىڭعا جۋىق پەداگوگ جۇمىس ىستەيدى. مەملەكەت باسشىسىنىڭ قولداۋىمەن 2019 -جىلى ماڭىزدى ماسەلەلەردىڭ ءبىرى - پەداگوگ ماماندىعىنا ەرەكشە مارتەبە بەرۋ تۋرالى شەشىم قابىلداندى»، - دەدى عاني بەيسەمبايەۆ.
سونداي- اق ول ءتورت جىل ىشىندە پەداگوگتەردىڭ ەڭبەكاقىسى ەكى ەسە وسكەنىن اتاپ ءوتتى. 2023 -جىلدىڭ 1 -قاڭتارىنان باستاپ مۇعالىمدەردىڭ جالاقىسى تاعى 25 پايىزعا كوتەرىلدى. بۇگىندە 220 مىڭداي مۇعالىمگە تاعايىندالعان ساناتتارىنا قاراي 50 پايىزعا دەيىن ۇستەماقى تولەنىپ وتىر. وسى جىلدىڭ قىركۇيەك ايىنان باستاپ مەكتەپكە دەيىنگى ۇيىمداردا ەڭبەك ەتەتىن 97 مىڭ پەداگوگتىڭ جالاقىسى تاعى 30 پايىزعا ءوستى. سونىمەن قاتار، بيىل العاش رەت 90 مىڭنان استام پەداگوگ بىلىكتىلىكتى ارتتىرۋ كۋرستارىنان ءوتتى.
«مۇعالىمدەردى اتتەستاتتاۋ پروتسەسى جەتىلدىرىلۋدە. ءبىز ءبىلىم بەرۋ جۇيەسىنىڭ ۇزدىكسىز دامۋى ءۇشىن بارىنشا جاعداي جاساۋىمىز كەرەك. ءاربىر ۇستازدىڭ ەڭبەگى شاكىرتتەرىنىڭ جەتىستىگىمەن باعالانۋى كەرەك دەپ ەسەپتەيمىز. بۇل ءۇشىن مۇعالىمدەردى ۇلتتىق پلاتفورما نەگىزىندە اتتەستاتتاۋدى اۆتوماتتاندىرۋ جۇمىستارى جۇرگىزىلۋدە. ول - وبەكتيۆتى جانە اشىق بولۋى ءتيىس. پەداگوگيكا جانە وقىتۋ ادىستەمەسى بويىنشا تەستىلەۋ الىنىپ تاستالدى. مۇعالىمنىڭ كاسىبي قۇزىرەتتىلىگى تەك مودەراتور مەن ساراپشىعا اۋىسقاندا كەزدە عانا ءوز ءپانى بويىنشا باعالاناتىن بولادى»، - دەلىنگەن حابارلامادا.
سونداي- اق وندا ەلىمىزدىڭ ۇزدىك مۇعالىمدەرى «ءبىلىم بەرۋدەگى وزگەرىستىڭ 1000 كوشباسشىسى» رەسپۋبليكالىق كادر رەزەرۆىنە قابىلدانا الاتىنى ايتىلعان. ال ەڭ مىقتىلارى «بولاشاق» باعدارلاماسى بويىنشا شەتەلدىك تاعىلىمدامادان وتۋگە جىبەرىلەدى.
ءبىلىم بەرۋ سالاسىنىڭ دامۋىنا، تاۋەلسىز ەلگە تىرەك بولار جاس ۇرپاق تاربيەسىنە ولشەۋسىز ۇلەس قوسقان ارداگەر- ۇستازدارعا مىڭ تاعزىم. سىزدەردىڭ باعا جەتپەس تاجىريبەلەرىڭىز بەن ءبىلىم- بىلىكتەرىڭىز جاس ۇستازدارعا ۇلگى.
حاكىم ابايشا ايتقاندا «ۇستازدىق ەتكەن جالىقپاس!». سوندىقتان ءبىز قازىرگى مۇعالىم يميدجىن، حالىق دارىپتەيتىن «ۇستازدىڭ ورنى - ءتور» بەينەسىنە دەيىن قايتا كوتەرىپ، جاڭعىرتۋعا مىندەتتىمىز. وسى ماقساتتا مينيسترلىك ءبىلىم سالاسىندا 30 جانە ودان دا كوپ جىل ەڭبەك ەتكەن مۇعالىمدەردى «ەڭبەك ارداگەرى» مەدالىمەن ماراپاتتاۋ تۋرالى شەشىم قابىلدادى. العاش رەت رەسپۋبليكالىق پەداگوگيكا قىزمەتكەرلەردىڭ ارداگەرلەر كەڭەسى قۇرىلدى. بۇنداي كەڭەستەر ەلىمىزدىڭ ءار ايماعىندا قۇرىلادى.
وسى جاسالعان شارالار سىزدەردىڭ ەڭبەكتەرىڭىزگە، كاسىبي شىڭدالۋلارىڭىزعا قولايلى جاعداي تۋعىزىپ، بالالارىمىزدىڭ ءبىلىم ساپاسىن ارتتىرۋىنا سەبەپ بولاتىنا بەك سەنىمدىمىن.
قادىرلى ارىپتەستەر!
بىزگە بۇكىل قوعامنىڭ تاربيەلىك ميسسياسى جۇكتەلدى. ءبىز، ۇستازدار، ەلىمىزدىڭ وڭ يميدجىن ناسيحاتتايتىن، سانالى دا تولەرانتتى زاماناۋي ۇرپاق قالىپتاستىرۋدىڭ قوزعاۋشى كۇشىنە اينالۋعا ءتيىسپىز.
«مەكتەپ - بۇل جاي عانا وقۋ ورنى ەمەس، ول بالالارعا ءومىردىڭ ەڭ ماڭىزدى قۇندىلىقتارىن سىڭىرەتىن ورىن. ولار جوعارى مادەنيەتكە، وتانسۇيگىشتىككە، ەڭبەكسۇيگىشتىككە سۋسىنداپ، ءوز ەلىنە ريزاشىلىعىن تۇسىنە ءبىلۋ كەرەك. بۇل ءۇشىن ءبىز، ۇستازدار، سانامىزدى وزگەرتىپ، دانالىق پەن تەكتىلىك، جاقسىلىق پەن شىعارماشىلىق ادامىنا اينالۋىمىز كەرەك.
سىزدەرگە جاس ۇرپاقتى وقىتۋداعى قاجىرلى ەڭبەكتەرىڭىز بەن ماماندىقتارىڭىزعا دەگەن ادالدىقتارىڭىزعا شىن جۇرەكتەن العىسىمدى بىلدىرەمىن! سىزدەرگە زور دەنساۋلىق، قاجىماس قايرات جانە جۇمىستا ەڭبەكتەرىڭىزگە جەمىس تىلەيمىن!
ۇستازدار كۇنى قۇتتى بولسىن!»، - دەدى مينيستر.
اۆتور
ايدار وسپاناليەۆ