كيىكتەن زارداپ شەككەن فەرمەرلەرگە وتەماقى تولەنە مە

ورال. KAZINFORM - باتىس قازاقستان وبلىسىندا كيىكتەردىڭ شەكتەن تىس ارتۋىنا بايلانىستى فەرمەرلەردەن تۇسكەن ارىز-شاعىم ازايماي تۇر. وسىعان بايلانىستى Kazinform ءتىلشىسى ماسەلەنى انىقتاپ كوردى.

ب ق و اۋىل شارۋاشىلىعى باسقارماسى باسشىسىنىڭ ورىنباسارى رۇستەم زۇلقاشيەۆتىڭ ءمالىم ەتكەنىندەي، ورال كيىك پوپۋلياتسياسىنىڭ مەكەن ەتۋ ارەالى باتىس قازاقستان وبلىسىنىڭ اقجايىق، بايتەرەك، بوكەي ورداسى، جاڭاقالا، جانىبەك، كازتالوۆ جانە تاسقالا اۋداندارىن قامتىپ وتىر.

رۇستەم مۇلكاي ۇلىنىڭ سوزىنە قاراعاندا، قازىرگى تاڭدا تاسقالا جانە بايتەرەك اۋداندارى تاۋار وندىرۋشىلەرىنىڭ ەگىستىك جەرلەرى تاپتالدى دەگەن مالىمەت بويىنشا وسى اۋدانداردىڭ ءتيىستى مەكەمەلەرىمەن ەسەپتەۋلەر جۇرگىزىلۋدە.

- اۋىل شارۋاشىلىعى ءمينيسترىنىڭ 2024 -جىلعى 17-مامىرداعى بۇيرىعىمەن بەكىتىلگەن قاعيداعا سايكەس، كيىكتەر ەگىستىككە زالال كەلتىرسە، توتەنشە جاعداي جاريالانعاندا عانا تەحنولوگيالىق كارتا بويىنشا زالالدى وتەۋ قاراستىرىلعان، - دەيدى رۇستەم زۇلقاشيەۆ.

تاعى ءبىر ماسەلە، كەيىنگى جىلدارى شارۋا قوجالىقتارىنىڭ باسشىلارى ەكپە ءشوپتى كيىكتەن قورعاۋ ءۇشىن باعان ورناتىپ، جەرلەرىن سىممەن قورشاي باستادى.

مۇنىڭ تيىمدىلىگىن كەيبىر شارۋاشىلىقتار تاجىريبەسى كورسەتىپ وتىر. بۇل، ارينە، از شىعىن ەمەس. وسىعان وراي سۋبسيديا تولەۋ قاجەتتىگى تۋىندادى.

باسقارما باسشىسى ورىنباسارىنىڭ ناقتىلاۋىنشا، ق ر اۋىل شارۋاشىلىعى مينيسترلىگىمەن اگروونەركاسىپ كەشەن سۋبەكتىلەرىنىڭ ينۆەستيتسيالىق سالىمدارعا جۇمساعان شىعىنىنىڭ ءبىر بولىگىن وتەۋگە قاتىستى سۋبسيديالاۋ قاعيدالارىنا وزگەرىستەر ەنگىزىلگەن.

- بيىلدان باستاپ شارۋاشىلىقتاردىڭ وزدەرىنىڭ جايىلىمدىق جەرلەرىن تەمىر تور جانە باعاندار ورناتۋ شىعىندارىنىڭ 50 پايىز مولشەرىندە سۋبسيديالاۋعا مۇمكىندىگى بار. كۇنى بۇگىنگە دەيىن وتىنىمدەر تۇسكەن جوق، - دەيدى ول.

اقبوكەندەردىڭ كوبەيگەنى سونداي، جانىبەك، كازتالوۆ، بوكەي ورداسى، جاڭاقالا، اقجايىق قانا ەمەس، ەگىن شارۋاشىلىعىمەن اينالىساتىن تاسقالا، بايتەرەك اۋداندارىنىڭ جەرلەرىنە دە تۇسە باستادى.

وسىعان وراي تاسقالا اۋدانىندا ارنايى جيىن وتكىزىلىپ، فەرمەرلەر وتەماقى تولەۋ ماسەلەسىن كوتەردى.

تاسقالا اۋدانى كاسىپكەرلىك جانە اۋىل شارۋاشىلىعى ءبولىمىنىڭ باسشىسى ساميعوللا شۇكىروۆ كيىكتىڭ ەگىستىك جەرلەرىن تاپاۋ دەرەكتەرىنىڭ بار ەكەندىگىن جاسىرمادى. اسىرەسە، دوستىق، مەرەي اۋىلدىق وكرۋگى اۋماعىنداعى شارۋاشىلىقتارعا وڭاي بولماي تۇر.

ونىڭ ايتۋىنشا، دوستىق اۋىل وكرۋگىندە ەسىم مامبەتوۆتىڭ «كارەن» شارۋا قوجالىعىنىڭ جەرىنە كيىك ءجيى تۇسەدى. سونداي-اق حاميت جەكسەنوۆتىڭ 900 گەكتارداي ەگىستىگىنە كىرىپ كەتكەن.

مەرەي اۋىل وكرۋگىندە «اتامۇرا» شارۋا قوجالىعى دا وسىنداي جاعدايدا. ديقاندار اق بيداي، ارپا، ماقسارى سياقتى داقىلداردان ءونىم الامىز با دەپ ۇمىتتەنەدى. ءبىراق كيىكتەر جينالعان ەركەكشوپتى دە شاشىپ كەتىپ جاتىر.

- قازىرگى تاڭدا «وحوتزووپروم» مەكەمەسىنەن 8 بريگادا جەرگىلىكتى اتقارۋشى ورگانداردىڭ كۇش- قۇرالدارىمەن بىرگە وسى كيىكتى ايداۋمەن شۇعىلدانىپ جاتىر. باس- اياعى 20 ماشينا، ونشاقتى موتوتسيكل تارتىلىپ، كەزەكشىلىك قويىلدى. شارۋاشىلىقتاردىڭ وزدەرى دە ۇلەس قوسۋدا. الايدا كيىك كەز كەلگەن جەردەن ءوتىپ كەتەدى. تاڭنان كەشكە دەيىن الىسۋمەن ءجۇرمىز. ارنايى كوميسسيا قانشا گەكتار ەگىستىك جەرى تاپالدى، سونىڭ ءبارىن ەسەپتەيدى، - دەدى س. شۇكىروۆ.

 

«كارەن» شارۋا قوجالىعىنىڭ باسشىسى ەسىم مامبەتوۆ كيىكتەردەن ابدەن زارەزاپ بولعانىن جەتكىزدى.

- ەگىستىگىمىزدى كيىك تاپاپ، قازىپ تاستاپ جاتىر. ءبىز عانا ەمەس، ەلدىڭ باسىنا تۇسكەن زاۋال دەسە دە بولادى. بۇلاي بەتىمەن كەتە بەرسە، ليزينگ، نەسيەلەرىمىزدى وتەي المايمىز. بانكروتقا ۇشىرايتىنىمىز انىق. جەرىمىز تاقىرعا اينالىپ، شارۋاشىلىقتار ىدىرايدى، حالىق جۇمىسسىز قالادى. قانشا ايتىلسا دا، تۇبەگەيلى شارا الىنباي وتىر. قوجالىعىمىزدى تاراتىپ، قالاعا كوشەتىن شىعارمىز، - دەدى ە. مامبەتوۆ.

اقتاۋ اۋىل وكرۋگىندەگى «ارعىماق» شارۋا قوجالىعىنىڭ وكىلى اسقار ليكەروۆ كيىكتى قۋا- قۋا شارشاعاندارىن تىلگە تيەك ەتتى.

- قوجالىق 2 مىڭ گەكتار القاپقا كۇزدىك بيداي، سۋدان ءشوبى، جازدىق بيداي، ارپا جانە ماقسارى ەككەن ەدى. ونىمەن ەڭبەگىمىز ەش كەتەتىن ءتۇرى بار، - دەدى ا. ليكەروۆ.

وڭىردەگى ەڭ استىقتى ءوڭىر - بايتەرەك اۋدانى. اۋدان اكىمىنىڭ ورىنباسارى لاۋاز ۋاليەۆ ازىرگە كيىكتىڭ ەگىستىكتى تاپاۋ دەرەگى تىركەلمەگەنىن ايتتى.

- تەك ەلۋ كيىكتىڭ ەگىستىككە كىرۋ وقيعاسى بولدى، ءبىراق ودان زيان كەلگەن جوق. «وحوتزووپروم» مەكەمەسىنەن بەس بريگادا جاعدايدى باقىلاپ وتىر. جەرگىلىكتى اتقارۋشى ورگاندار كۇش بىرىكتىرىپ، كەزەكشىلىك قويىلدى. سونىمەن قاتار ءار شارۋاشىلىق ەگىستىك جەرىن قارايتىن ءبىر- بىردەن قورىقشى شىعارىپ وتىر، - دەدى ل. ۋاليەۆ.

ب ق و ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى نۇرلان راحىمجانوۆ وبلىستىڭ جەتى اۋدانىندا كيىكتەن شارۋاشىلىقتار جەرلەرىن قورعاۋ جۇمىستارىمەن «وحوتزووپروم» مەكەمەسىنەن 30 توپتىڭ اينالىسىپ جاتقانىن مالىمدەدى.

- بوكەيوردا تابيعي رەزەرۆاتىنىڭ ينسپەكتورلارى، جەرگىلىكتى اتقارۋشى ورگاندارىنىڭ قىزمەتكەرلەرى دە قولۇشىن بەرۋدە. ءوز كۇشىمىز جەتىسپەي، ماڭعىستاۋ، اتىراۋ، اقتوبە، جامبىل، قىزىلوردا وبلىستارىنان ينسپەكتورلار كەلدى. وتىز توپ 15 كۇن سايىن اۋىسىپ تۇرادى. قازىرگى تاڭدا 116 ادام، 74 تەحنيكا تارتىلعان، - دەدى ن. راحىمجانوۆ.

ونىڭ ايتۋىنشا، بيىل كوكتەمدە كيىك ساناعى اۋەدەن دە، ماشينامەن دە جۇرگىزىلگەن. الدىن الا مالىمەت بويىنشا بيىلعى ءتولىن ەسەپتەمەگەندە، وڭىردە اقبوكەن سانى 2,3 ميلليونعا جەتكەن.

مىنە، وسىلايشا، باتىس قازاقستاندا ميلليونداعان كيىكتىڭ مەكەندەۋى اۋىل شارۋاشىلىعى تاۋارىن وندىرۋشىلەر عانا ەمەس، بارشا تۇرعىنداردىڭ الاڭداۋشىلىعىن تۋعىزىپ وتىر.