كيىك سانى ءبىر جىلدا ءبىر ميلليونعا ءوستى
استانا. قازاقپارات - كيىك سانى 3 ميلليونعا جۋىقتادى. 14-ءساۋىر مەن 1-مامىر ارالىعىندا اۋەدەن ساناق جۇرگىزگەن ماماندار وسىلاي دەيدى.
وسىدان جيىرما-وتىز جىل بۇرىن اقبوكەن 20 مىڭنىڭ ماڭايىندا عانا قالعان ەندى. ەندى قاراسى كوبەيىپ، كەڭ دالادا ەركىن كوسىلىپ ءجۇر. ەلدەگى كيىك سانى ءبىر جىلدا ءبىر ميلليونعا ءوستى. قازىر قىردا 2 ميلليون 800 مىڭنان استام كيىك بار. باسىم بولىگى ورال مەن بەتپاقدالا پوپۋلياتسياسى.
تالعات ەردەشوۆ، ق ر ەكولوگيا جانە تابيعي رەسۋرستار مينيسترلىگى كوميتەتىنىڭ باس ساراپشىسى:
- ورال پوپۋلياتسياسى - 1 ميلليون 620 مىڭ، ال بەتپاقدالا پوپۋلياتسياسى 1 ميلليون 150 مىڭ بولدى. ءۇستىرت پوپۋلياتسياسىنىڭ سانى 63 مىڭ بولدى. جالپى، ايتقاندا، ورتا ەسەپپەن 48 پايىزعا ءوسىپ وتىر. بۇل قۇرالايدىڭ سالقىنىنا دەيىنگى ساناق. بيىلعى ءتولدىڭ ەسەبىمەن تاعى 45 پايىزعا كوبەيۋى مۇمكىن. بيىل ءوسىمى جاقسى بولىپ وتىر. قازىر ەندى تولدەۋ ءبىتتى عوي.
پرەزيدەنت اقبوكەن سانىن رەتتەۋگە تىيىم سالعانى بەلگىلى. عالىمدار بۇل ماسەلەدە عىلىمعا ارقا سۇيەۋ كەرەك دەيدى. قازىر كيىكتى قولدا ءوسىرىپ، زەرتتەۋ جۇرگىزىپ وتىرعان شارۋاشىلىقتار بار.
ايتۋعان مۇقاشيەۆ، كاسىپكەر:
- كيىكتى نەگىزى اتپاۋ كەرەك. سونى اتپاي، باسقاشا جولدا پايدالانۋ ماسەلەسىن كورسەتەيىك عىلىمي، دامىعان تۇردە دەگەن سياقتى. نەگىزى كيىكتىڭ ءمۇيىزى، ءبىر جاسار، ەكى جاساردىڭ ءمۇيىزىن المايدى ەكەن. ءۇش جاستان كەيىن عانا الادى. سول ءۇشىن دە ونى ءبىر جاس، ەكى جاسىندا ءولتىرىپ تاستاۋدىڭ قاجەتى جوق. ياعني ءوسىرىپ، ءۇش جاسقا كەلگەندە تولىق الاتىنداي قىلىپ جولعا قويماسقا. سوندا ءبىز ونى ءوسىرىپ، قولدان وندىرەتىن بولساق، بەلگىلى ءبىر دەڭگەيدە رەتتەپ وتىرامىز.
كاسىپكەر ۇلىتاۋ جانە باتىس قازاقستان وبلىستارىندا كيىك ءوسىرىپ وتىر. زەرتتەۋ جۇمىستارى الداعى ەكى-ءۇش جىلدا جەمىسىن بەرۋگە ءتيىس. ياعني بۇل شارۋاشىلىقتاردا اقبوكەننىڭ قورشاعان ورتاعا اسەرى، ونىڭ ونىمدەرىن كادەگە جاراتۋ جولدارى جان-جاقتى ساراپتالادى.