كيىك بيزنەسىن جانداندىرىپ، ءوندىرىس سەحتارىن اشۋ ۇسىنىلدى

استانا. KAZINFORM - بىلتىر ەكولوگيا مينيسترلىگى كيىكتى اتۋعا رۇقسات بەرگەن بولاتىن. الايدا سوڭعى ۋاقىتتا جانۋاردى زاڭسىز اتۋ فاكتىلەرى جيىلەپ كەتتى.

«ازىق- تۇلىك قاۋىپسىزدىگى» اتتى قازاق شارۋالارىنىڭ قۇرىلتايىنىڭ سەكسيالىق وتىرىسىندا بۇل ماسەلە جان-جاقتى تالقىلاندى.

كاسىبي اڭشى، كاسىپكەر باتىر سەيكەنوۆ كيىك سانىن رەتتەۋ جۇمىستارى كەش قولعا الىنعانىن ايتتى.

- اقبوكەن اسا ءوسىمتال جانۋار. ومىرىندە 6 رەت تولدەيدى. مامىردا تۋعان قۇرالايلار جەلتوقساندا تەكەدەن قاشادى. العاشقى جىلى بىرەۋدەن، كەلەسى جىلى ەكەۋ- ۇشەۋدەن لاقتايدى. ال ەندى اقبوكەندەر سوڭعى جىلدارى قالايشا شامادان تىس كوبەيدى؟ وعان ەشكىم تالداۋ جاساعان جوق، ونىڭ قالاي جاسالاتىنىن قازىر ەشكىم بىلمەيدى دە. جانۋاردى رەتتەۋ جۇمىستارى ەرتە قولعا الىنۋى كەرەك ەدى. كوبەيۋدىڭ كەسىرى قۇرعاقشىلىقتان زارداپ شەگىپ وتىرعان حالىققا اسەر ەتىپ، كيىكتەر مال جايىلىمىنا ورتاقتاسىپ، شابىندىقتى تاپتاپ، ەگىنگە تۇسە باستادى. تىعىرىققا تىرەلگەن جاۋاپتى ورگاندار جۇيەلى باعدارلاما ازىرلەۋگە ۇلگەرمەي، اتۋعا رۇقسات بەردى، - دەيدى ب. سەيكەنوۆ.

ول جەرگىلىكتى تۇرعىندارعا ليتسەنزيا بەرىپ، ءوندىرىس سەحتارىن اشىپ، ەكى قولعا ءبىر كۇرەك تابا الماي وتىرعان ازاماتتاردى جۇمىسپەن قامتۋ ماڭىزدى ەكەنىن اتاپ ءوتتى.

- ەل ەتىن ازىق قىلىپ، ءمۇيىزى مەن تەرىسىن ساتىپ، پايدا تاپسىن. بيزنەستىڭ كوزىنە اينالسىن. ول ءۇشىن بۇل ماسەلە ابدەن زەرتتەلىپ-زەردەلەنىپ، عالىمدار جۇمىس ىستەۋى كەرەك. ەت پەن ءمۇيىزدى، جانۋاردىڭ تەرىسىن كادەگە اسىرۋ ءۇشىن ءوندىرىس اشۋ كەرەك. وعان ارنايى توڭازىتقىش، ەتىن مۇشەلەپ بولەتىن ارنايى سويۋ تسەحتارى قاجەت. كيىكتىڭ ەتىنىڭ ەڭ ءوتىمدى مۇشەسى ارتقى سانى مەن بەلدەمەسى عوي. قالعانىن وڭدەيتىن ءوندىرىس اشۋ كەرەك. ونى ەشكىم بىلمەيدى. بىلەتىن ماماندار كەرەك،- دەيدى كاسىپكەر.

ايتا كەتەيىك، «ازىق-تۇلىك قاۋىپسىزدىگى» اتتى قازاق شارۋالارىنىڭ قۇرىلتايىنىڭ سەكتسيالىق وتىرىسىندا مال، وسىمدىك، ومارتا شارۋاشىلىقتارى، ۆەتەرينارلىق رەفورما، جەر داۋى، سۋ جانە يرريگاتسيا سياقتى ماسەلەلەر تالقىلاندى.