جوباعا مەكتەپ وقۋشىلارىنان باستاپ ستۋدەنتتەر، ۇستازدار، مەملەكەتتىك قىزمەتشىلەر مەن تۇتاس وتباسىلار قاتىسا الادى. بۇل تۋرالى ق ر مادەنيەت جانە اقپارات مينيسترلىگى ارحيۆ، قۇجاتتاما جانە كىتاپ ءىسى كوميتەتى كىتاپ ءىسى باسقارماسىنىڭ باسشىسى الماز مىرزاحمەت حابارلادى.
مارافون قاتىسۋشىلاردىڭ جاسىنا جانە الەۋمەتتىك ساناتىنا قاراي جەتى باعىت بويىنشا ۇيىمداستىرىلادى. اتاپ ايتقاندا، «كىتاپ وقيتىن مەكتەپ» باعىتىنا 6-10 سىنىپ وقۋشىلارى، «كىتاپ وقيتىن كوللەدجگە» كوللەدج ستۋدەنتتەرى، «كىتاپ وقيتىن ۋنيۆەرسيتەتكە» جوعارى وقۋ ورىندارىنىڭ ستۋدەنتتەرى، «كىتاپ وقيتىن پەداگوگ» باعىتىنا مەكتەپ مۇعالىمدەرى مەن كوللەدج وقىتۋشىلارى قاتىسا الادى. ال «كىتاپ وقيتىن اۋلەت» وتباسىلىق كوماندالارعا، «كىتاپ وقيتىن مەملەكەتتىك قىزمەتشى» مەملەكەتتىك قىزمەتشىلەرگە ارنالعان. ال «كىتاپ وقيتىن زياتكەر» باعىتى بويىنشا جاسىنا جانە قىزمەت سالاسىنا شەكتەۋ قويىلمايدى.
قاتىسۋشىلارعا ورتاق تالاپ - ارنايى ىرىكتەلگەن كىتاپتاردى وقۋ. ءار قاتىسۋشى 330 كىتاپتان تۇراتىن قوردان 15 شىعارما وقۋى قاجەت.
- ونىڭ 165 ءى قازاق تىلىندە، 165 ءى ورىس تىلىندە ۇسىنىلعان. تىزىمگە وتاندىق اۆتورلاردىڭ شىعارمالارى، الەم كلاسسيكاسى جانە زاماناۋي تۋىندىلار ەندى. كىتاپتاردى ىرىكتەۋ كەزىندە جالپىۇلتتىق داۋىس بەرۋ قورىتىندىسىمەن «100 كىتاپ» تىزىمىنە ەنگەن شىعارمالار مەن ادەبيەت سالاسىنداعى نوبەل سىيلىعى لاۋرەاتتارىنىڭ تۋىندىلارىن قوسا العاندا، الەمدىك بەستسەللەرلەر دە ەسكەرىلدى، - دەدى الماز مىرزاحمەت Jibek Joly تەلەارناسىنىڭ «بۇگىن Live» باعدارلاماسىندا.
ىرىكتەلگەن شىعارمالاردى وقۋ ءۇشىن قاتىسۋشىلارعا بىرنەشە اي ۋاقىت بەرىلەدى. مارافوننىڭ نەگىزگى وقۋ كەزەڭى بيىل قىركۇيەكتە باستالىپ، 2027-جىلعى ناۋرىزعا دەيىن جالعاسادى. وسى ۋاقىت ىشىندە ولار كىتاپتاردى وقىپ، جەكە كابينەتتەرىندە شىعارمالار تۋرالى قىسقاشا پىكىرىن جاريالاپ وتىرادى. وقۋ كەزەڭى اياقتالعان سوڭ قورىتىندى تەستىلەۋ مەن زياتكەرلىك كۆيزدەر وتكىزىلەدى.
قاتىسۋشىلاردىڭ ءبىلىمى مەن وقۋ ناتيجەلەرى قورىتىندى كەزەڭدە سارالانىپ، جەڭىمپازدار انىقتالادى. وڭىرلىك كەزەڭدەردىڭ جەڭىمپازدارى مەن جۇلدەگەرلەرىنە قارجىلاي سىيلىقتار قاراستىرىلعان.
I ورىنعا - 600000 تەڭگە، Ⅱورىنعا - 450000 تەڭگە،Ⅲ ورىنعا - 300000 تەڭگە تابىستالادى. بارلىق فيناليست ديپلومدارمەن جانە ەلەكتروندى سەرتيفيكاتتارمەن ماراپاتتالادى،- دەدى سپيكەر.
مارافوننىڭ اۋقىمى بيىل كەڭەيىپ وتىر. جوبا مەملەكەت باسشىسى قاسىم-جومارت توقايەۆتىڭ كىتاپ وقۋ مادەنيەتىن دامىتۋ جونىندەگى تاپسىرماسىن جۇزەگە اسىرۋ اياسىندا قولعا الىنعان. نەگىزگى ماقسات - قازاقستاندىقتاردىڭ كىتاپ وقۋعا قىزىعۋشىلىعىن ارتتىرىپ، ەلدى الەمدەگى ەڭ كوپ كىتاپ وقيتىن ون مەملەكەتتىڭ قاتارىنا قوسۋ.
ايتا كەتەيىك، جوبا بۇعان دەيىن قوستاناي جانە قاراعاندى وبلىستارىندا، سونداي-اق شىمكەنت قالاسىندا پيلوتتىق رەجيمدە وتكىزىلىپ، 189 مىڭعا جۋىق ادامدى قامتىعان. ەندى مارافونعا 2 ميلليونعا جۋىق تۇرعىندى تارتۋ جوسپارلانىپ وتىر. قازىردىڭ وزىندە وعان ميلليوننان اسا ادام قىزىعۋشىلىق تانىتقان.
بۇعان قوسا جاقىندا نوبەل سىيلىعىنىڭ لاۋرەاتى، بەلگىلى قىتاي جازۋشىسى مو يان «كىتاپ وقيتىن ۇلت» قاتىسۋشىلارىنا ۇندەۋ جولداپ، قازاقستاندىق وقىرماندارعا شابىت تىلەگەن ەدى.