كىتاپ وقىپ، سپورتپەن شۇعىلداناتىن جاستار اراسىندا بايقاۋ باستالدى

استانا. KAZINFORM - مادەنيەت جانە اقپارات مينيسترلىگى جاستار اراسىندا sportاrtfest بايقاۋى باستالعانىن حابارلادى.

بارلىق وڭىردەن كەلگەن كوماندالار ءبىلىم، سپورت جانە شىعارماشىلىق قابىلەتى بويىنشا ۇزدىك اتانۋ ءۇشىن باق سىنايدى.

SportArtFest بايقاۋى ق ر مادەنيەت جانە اقپارات مينيسترلىگىنىڭ قولداۋىمەن «Ules» جوباسى اياسىندا وتكىزىلىپ جاتىر.

اتالمىش ءىس-شارا جاستاردى وقۋعا، ونەرگە جانە سپورتقا باۋلۋ، سونداي-اق ەلىمىزدە سالاۋاتتى ورتا قالىپتاستىرۋعا باعىتتالعان.

بايقاۋدىڭ العاشقى ءۇش كەزەڭى وڭىرلىك دەڭگەيدە، ءتورتىنشىسى رەسپۋبليكالىق دەڭگەيدە وتەدى. ءار كوماندادا 5 ادام بار.

اۋەلى توپتار قازاقستان تاريحى، وتاندىق جانە الەمدىك سپورت، مادەنيەت سالاسى بويىنشا سۇراقتاردان تۇراتىن زياتكەرلىك تەست تاپسىرادى.

سودان كەيىن كوماندالار سپورتتىق چەللەندجدەن ءوتۋى كەرەك. ال، ءۇشىنشى كەزەڭدە ولاردى ۇيىمداستىرۋشىلار بەكىتكەن بەس كىتاپ بويىنشا IQ-buttle كۇتەدى.

فيناليستەر الماتىدا وتەتىن رەسپۋبليكالىق كەزەڭدە ءوڭىر نامىسىن قورعاۋعا بارادى. جۇلدە قورى - 1600000 تەڭگە.

كونكۋرسقا 8-تامىزعا دەيىن مىنا سىلتەمەدە تىركەلۋگە بولادى.