ەندى مارافونعا جۇلدە مەن ورىن ءۇشىن باسەكەگە تۇسپەي-اق، جەكە ۇلگىسى ارقىلى وقۋ مادەنيەتىن قولداعىسى كەلەتىن كەز كەلگەن ادام قاتىسا الادى.
نەگىزگى مارافون جارىس فورماتىندا وتەدى. الايدا تاجىريبە كورسەتكەندەي، «كىتاپ وقيتىن ۇلت» قوزعالىسىنا قوسىلعىسى كەلەتىن، ءبىراق باسەكەگە ءتۇسىپ، جۇلدە ءۇشىن تالاسۋعا نيەتى جوق ادامدار دا كوپ. وسى ازاماتتار ءۇشىن Parasat باعىتى قۇرىلدى.
جاڭا باعىت كىتاپ وقۋدى جەكە دامۋىنىڭ ماڭىزدى بولىگى دەپ سانايتىن جانە بۇل يدەيانى كوپشىلىك الدىندا قولداۋعا دايىن ادامداردى بىرىكتىرەدى. وعان مەملەكەتتىك ورگانداردىڭ وكىلدەرى، دەپۋتاتتار، عالىمدار، مادەنيەت جانە ونەر قايراتكەرلەرى، كاسىپكەرلەر، قوعام بەلسەندىلەرى، كاسىبي قاۋىمداستىق وكىلدەرى، سونداي-اق قازاقستان ازاماتتارى مەن شەتەلدە تۇراتىن قانداستار قاتىسا الادى.
سونىمەن قاتار Parasat باعىتى بارشاعا اشىق. قاتىسۋشىنىڭ كاسىبى، قىزمەتى، تۇرعىلىقتى جەرى مەن ازاماتتىعىنا شەكتەۋ قويىلمايدى.
- «كىتاپ وقيتىن ۇلت» - تەك بايقاۋ نەمەسە جۇلدەلى ورىندار ءۇشىن كۇرەس ەمەس. بۇل، ەڭ الدىمەن، كىتاپ وقۋدى قوعامنىڭ كۇندەلىكتى مادەنيەتىنىڭ ءبىر بولىگىنە اينالدىرۋ يدەياسى. Parasat باعىتى وسى يدەيانى جەكە ۇلگى ارقىلى قولداۋعا مۇمكىندىك بەرەدى: كىتاپ وقۋ، ءوز ويىمەن ءبولىسۋ جانە وقۋ مادەنيەتىنىڭ الەۋمەتتىك مارتەبە مەن ماماندىققا قاراماستان ادامداردى بىرىكتىرەتىنىن كورسەتۋ، — دەيدى مارافون ۇيىمداستىرۋشىلارى.
Parasat قاتىسۋشىلارى رەسپۋبليكالىق مارافوننىڭ ءبىرىڭعاي تىزىمىنە ەنگەن 15 شىعارمانى وقۋى ءتيىس. تىزىمگە قازاق جانە ورىس تىلدەرىندەگى كىتاپتار ەنگىزىلگەن.
ءار كىتاپتى وقىپ بولعان سوڭ قاتىسۋشى جەكە كابينەتىندە قىسقاشا پىكىر قالدىرىپ، شىعارما تۋرالى ءوز ويى مەن اسەرىن ءبولىسۋى قاجەت.
قورىتىندى كەزەڭدە بارلىق 15 شىعارما بويىنشا ونلاين- تەستىلەۋ وتكىزىلەدى. ول قاتىسۋشىنىڭ كىتاپتاردى وقىعانىن راستاۋعا مۇمكىندىك بەرەدى.
Parasat باعىتىنا تىركەلۋ اشىق جانە 2026 -جىلعى 30-قازانعا دەيىن جالعاسادى.
بۇعان دەيىن «كىتاپ وقيتىن ۇلت» جوباسىنا ەكى اپتادا ميلليوننان استام ادام تىركەلگەنىن جازعانبىز.