- الدىمىزدا تۇرعان تاعى ءبىر ماڭىزدى مىندەت - مال شارۋاشىلىعىن دامىتۋ. مەملەكەت بۇل سالاعا ناقتى قولداۋ كورسەتىپ كەلە جاتىر. كەيىنگى جىلداردا اتا كاسىپپەن اينالىساتىن بيزنەس وكىلدەرىنە نەسيە بەرۋ كولەمى ۇلعايدى. اسىل تۇقىمدى مال ساتىپ الۋعا باسا نازار اۋدارىلاتىن بولدى. جاڭا فەرمالار مەن بورداقىلاۋ الاڭدارى سالىنىپ جاتىر. ماسەلەن، بىلتىردان بەرى 71 تاۋارلى- ءسۇت فەرماسى ىسكە قوسىلدى، 33 بورداقىلاۋ الاڭى سالىندى. ەندى وسى ءوندىرىس ورىندارىنىڭ ءتيىمدى ءارى تۇراقتى جۇمىس ىستەۋى ءۇشىن قاجەتتى جاعداي جاساۋ قاجەت، - دەدى مەملەكەت باسشىسى.
پرەزيدەنتتىڭ ايتۋىنشا، شارۋاشىلىقتاردى ساپالى جەمشوپپەن قامتاماسىز ەتكەن ءجون. دايىن ءونىمدى وتكىزۋ ماسەلەسى دە شەشىمىن تابۋعا ءتيىس. جايىلىمداردىڭ ونىمدىلىگىن قالپىنا كەلتىرۋگە جانە ەگىستىك كولەمىن ۇلعايتۋعا ەرەكشە كوڭىل بولگەن ابزال. سۋ كوزدەرى دە شارۋا قوجالىقتارى ءۇشىن قولجەتىمدى بولۋى كەرەك.
- بۇعان قوسا، ۆەتەريناريا سالاسىن جاڭعىرتۋعا ايرىقشا ءمان بەرۋ قاجەت. دۇنيەجۇزىلىك جانۋارلار دەنساۋلىعىن ساقتاۋ ۇيىمىنىڭ ۇيعارىمىنا سايكەس، قازاقستان ياشۋر اۋرۋىنان تازا ايماق رەتىندە مويىندالدى. بۇل - ەت جانە باسقا دا مال شارۋاشىلىعى ونىمدەرىن سىرتقى نارىققا شىعارۋ ءۇشىن جاڭا مۇمكىندىكتەرگە جول اشىلادى دەگەن ءسوز. سونى ءتيىمدى پايدالانۋ كەرەك. مال باسىن ەسەپكە الۋ جۇيەسىن جەتىلدىرىپ، زەرتحانالىق دياگنوستيكانىڭ ساپاسىن ارتتىرۋ قاجەت. ۇكىمەت ونىمدەردى ەكسپورتقا شىعارۋعا كەدەرگى كەلتىرەتىن توسقاۋىلداردى جويۋعا ءتيىس، - دەدى قاسىم-جومارت توقايەۆ.