وتىرىس كۇن تارتىبىنە شىعارىلعان ماسەلە قارالىپ بولعاننان كەيىن باق وكىلدەرىنە ارنايى باسپا ءسوز ءماسليحاتى ۇيىمداستىرىلادى. ونىڭ بارىسىندا عىلىم جانە جوعارى ءبىلىم ءمينيسترى ساياسات نۇربەك، وقۋ- اعارتۋ ءبىرىنشى ۆيتسە-ءمينيسترى شىنار اقپاروۆا مەن وقۋ-اعارتۋ ۆيتسە-ءمينيسترى جايىق شاراباسوۆ تىلشىلەر تارابىنان تۋىندايتىن ساۋالدارعا جاۋاپ بەرەدى.
ايتا كەتەيىك، ەلىمىزدە 8028 مەكتەپ جۇمىس ىستەيدى. وسى جاڭا وقۋ جىلىندا 380 مىڭنان استام بالا وسى ءبىلىم وشاقتارىنىڭ تابالدىرىعىن اتتايدى دەپ كۇتىلۋدە. بۇگىندە بولجانعان بالا سانىنىڭ 320 مىڭعا جۋىعى، ياعني شامامەن 84 پايىزى مەكتەپتەرگە قۇجاتتارىن تاپسىرىپ ۇلگەردى. قابىلدانعان بالالاردىڭ 296 مىڭعا جۋىعى مەملەكەتتىك، 23 مىڭعا جۋىعى جەكەمەنشىك مەكتەپتەردە ءبىلىم الادى. قالالىق مەكتەپتەرگە 191 مىڭعا جۋىق، اۋىلدىق مەكتەپتەرگە 128 مىڭعا جۋىق بالا، سونداي- اق ءبىلىم بەرۋ ۇيىمدارىنا ەرەكشە ءبىلىم بەرۋ قاجەتتىلىكتەرى بار 4 مىڭعا جۋىق بالا قابىلداندى.
ءبىرىنشى سىنىپ وقۋشىلارىنىڭ ەڭ كوپ سانى تۇركىستان وبلىسىندا - 50 مىڭنان استام، الماتى وبلىسىندا - 35 مىڭنان استام، استانادا - 33 مىڭ، الماتىدا - 31 مىڭنان استام جانە شىمكەنتتە - 29 مىڭنان استام بولادى دەپ كۇتىلۋدە. بۇل وسى وڭىرلەردەگى حالىق سانىنىڭ كوپتىگىمەن جانە تۋۋ دەڭگەيىنىڭ جوعارى بولۋىمەن بايلانىستى.
ەلىمىزدە مىندەتتى مەكتەپ فورماسىنا قويىلاتىن تالاپتار بار. ۇلدار مەن قىزدارعا ارنالعان مەكتەپ فورماسى كۇندەلىكتى، مەرەكەلىك جانە سپورتتىق بولىپ بولىنەدى. ونى تاڭداۋدا ءبىلىم الۋشىلاردىڭ جاس ەرەكشەلىكتەرى، كليماتتىق جاعدايلار، ساباق وتەتىن ورىن، وقۋ عيماراتىنداعى تەمپەراتۋرالىق رەجيم جانە قاۋىپسىزدىك تالاپتارى ەسكەرىلەدى. قاۋىپسىزدىك تالاپتارىنا سايكەس مەكتەپ فورماسىندا جاراقات كەلتىرۋى مۇمكىن فۋرنيتۋرا مەن اكسەسسۋارلار بولماۋى ءتيىس. سونداي-اق ءبىلىم بەرۋ ۇيىمدارىنىڭ جارعىلارىندا بەلگىلەنگەن قاعيدالارعا سايكەس وقۋ عيماراتى ىشىندە باس كيىممەن جۇرۋگە جول بەرىلمەيدى.
الەۋمەتتىك وسال ساناتتاعى وتباسىلاردىڭ بالالارىنا جالپىعا بىردەي ءبىلىم بەرۋ قورى اياسىندا مەكتەپ فورماسىن، اياق كيىم مەن مەكتەپكە قاجەتتى قۇرالداردى ساتىپ الۋعا مەملەكەتتىك قولداۋ كورسەتىلەدى. 2026-2027 وقۋ جىلى قارساڭىندا مۇنداي قولداۋمەن 450 مىڭعا جۋىق بالانى قامتۋ جوسپارلانىپ وتىر. وسى ماقساتقا جەرگىلىكتى بيۋدجەتتەردەن شامامەن 23 ميلليارد تەڭگە قاراستىرىلعان.
جاڭا وقۋ جىلى 2026 -جىلعى 1-قىركۇيەكتە باستالىپ، 2027 -جىلعى 25-مامىردا اياقتالادى. ءبىرىنشى توقسان 8 وقۋ اپتاسىنا سوزىلادى. كۇزگى دەمالىس 7 كۇنگە جالعاسىپ، 2026 -جىلعى 26-قازان مەن 1-قاراشا ارالىعىن قامتيدى. ەكىنشى توقسان دا 8 وقۋ اپتاسىن قۇرايدى. قىسقى دەمالىس 14 كۇنگە سوزىلىپ، 2026 -جىلعى 28-جەلتوقسان مەن 2027 -جىلعى 10-قاڭتار ارالىعىندا وتەدى.
ءبىرىنشى سىنىپ وقۋشىلارى ءۇشىن 2027 -جىلعى 8-14-اقپان ارالىعىندا 7 كۇندىك قوسىمشا دەمالىس قاراستىرىلعان. ءۇشىنشى توقسان 10 وقۋ اپتاسىنا سوزىلادى. كوكتەمگى دەمالىس 7 كۇنگە جالعاسىپ، 2027 -جىلعى 22-28-ناۋرىز ارالىعىن قامتيدى.
ءتورتىنشى توقسان 8 وقۋ اپتاسىنا سوزىلىپ، 2027 -جىلعى 25-مامىردا اياقتالادى.
ەستەرىڭىزگە سالا كەتسەك، وتكەن اپتاداعى ۇكىمەت وتىرىسىندا جاساندى ينتەللەكت نەگىزىندەگى مەملەكەتتىك قىزمەتتەر ەكوجۇيەسى قارالدى. كۇن تارتىبىنە شىعارىلعان ماسەلە بويىنشا نەگىزگى بايانداما جاساعان پرەمەر-ءمينيستردىڭ ورىنباسارى - جاساندى ينتەللەكت جانە سيفرلىق دامۋ ءمينيسترى جاسلان ماديەۆ ەلىمىزدىڭ اتالعان سالاداعى جەتىستىكتەرىنە توقتالدى. سونىمەن قاتار جۋىردا ىسكە قوسىلعان eGov GPT-دىڭ تيىمدىلىگى جونىندە مالىمەتتەرمەن ءبولىستى.
- ازاماتتار eGov GPT مۇمكىندىكتەرىن 150 مىڭنان استام رەت قولدانىپ ۇلگەردى. ول مەملەكەت پەن ازاماتتار اراسىنداعى بارلىق ماسەلە بويىنشا امبەباپ AI- اسسيستەنتكە اينالۋى ءتيىس. سوندىقتان ورتالىق مەملەكەتتىك ورگاندار ازاماتتار مەن بيزنەسكە ارنالعان ۆەدومستۆولىق AI- اگەنتتەردى eGov GPT- مەن بايلانىستا ازىرلەۋ قاجەت، - دەدى ۆيتسە-پرەمەر.
ال ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆ جىل سوڭىنا دەيىن الەۋمەتتىك- ەڭبەك سالاسىندا جاساندى ينتەللەكتىنى تاعى بەس باعىت بويىنشا ەنگىزۋ جوسپارلانىپ وتىرعانىنا توقتالسا، ادىلەت ءمينيسترى ەرلان سارسەمبايەۆ جاڭا سيفرلىق E- Notary پلاتفورماسى ىسكە قوسىلاتىنىن ايتتى.
ۇلتتىق ەكونوميكا ۆيتسە-ءمينيسترى بەكبولات مولدابەكوۆ بيزنەستىڭ ءبىرىڭعاي سيفرلىق ەكوجۇيەسىن قۇرۋ اياسىندا ءار كاسىپكەردىڭ سيفرلىق ءپروفيلى قالىپتاستىرىلاتىنان توقتالدى.
- جاڭا جۇيەنى نولدەن قۇرۋدىڭ ورنىنا كاسىپكەرلىك سۋبەكتىلەرىنىڭ ءتىزىلىمىن دامىتىپ، ونى ءبىرىڭعاي سيفرلىق پلاتفورمانىڭ وزەگىنە اينالدىرۋ ۇسىنىلادى. بۇل پلاتفورمادا مەملەكەتتىك دەرەكتەر، بيزنەستىڭ سيفرلىق پروفيلى، اناليتيكالىق سەرۆيستەر، جاساندى ينتەللەكت قۇرالدارى جانە مەملەكەتتىك قولداۋ شارالارىن ۇسىنۋ پروتسەستەرى بىرىكتىرىلەدى. ءىس جۇزىندە مەملەكەت، بيزنەس جانە مەملەكەتتىك قولداۋ وپەراتورلارى ءۇشىن ءبىرىڭعاي سيفرلىق ەكوجۇيە قالىپتاسادى، - دەدى ۆيتسە-مينيستر.
سونداي- اق BTS Digital كومپانيالار توبىنىڭ باسقارۋشى ديرەكتورى ماقسات نۇريدەن ۇلى Aitu پلاتفورماسىن دامىتۋعا قاتىستى ءبىرقاتار جاڭا باستامانى تانىستىردى. ونىڭ ايتۋىنشا، Aitu-دا ۇلتتىق داستۇرلەرگە نەگىزدەلگەن قارجىلىق سەرۆيستەر دە ىسكە قوسىلماق. اتاپ ايتقاندا، پايدالانۋشىلار «ءسۇيىنشى»، «كورىمدىك»، «اسار» جانە «ساداقا» سياقتى تولەمدەردى ارنايى فورماتتا جىبەرە الادى. بۇل قىزمەتتەر اقشا اۋدارىمدارىن ۇلتتىق مادەنيەتپەن بايلانىستىرىپ، راسىمدەۋدى جەڭىلدەتۋگە باعىتتالعان.
وتىرىستى تۇيىندەگەن پرەمەر-مينيستر ولجاس بەكتەنوۆ جاساندى ينتەللەكت نەگىزىندەگى مەملەكەتتىك قىزمەتتەردى دامىتۋ ءۇشىن مينيسترلىكتەر مەن وزگە دە مەملەكەتتىك ورگاندارعا مىناداي مىندەتتەر جۇكتەدى:
- مەملەكەتتىك ورگاندار اقپاراتتىق جۇيەلەردى جاڭا ءبىرىڭعاي «QazTech» پلاتفورماسىنا كوشىرۋ جانە ينتەگراتسيالاۋ ۇدەرىستەرىن جانداندىرۋى؛
- اكىمدىكتەر جاساندى ينتەللەكت مينيسترلىگىمەن جانە «ازاماتتارعا ارنالعان ۇكىمەت» كورپوراتسياسىمەن بىرلەسىپ، وڭىرلىك جاڭا سيفرلىق ينفراقۇرىلىمدى قالىپتاستىرۋدى وسى جىلدىڭ سوڭىنا دەيىن اياقتاۋى؛
- جاساندى ينتەللەكت مينيسترلىگى مۇددەلى مەملەكەتتىك ورگاندارمەن بىرلەسىپ، بيىل بىردەن كورسەتىلەتىن فورماتقا كوشىرۋگە بولاتىن قىزمەتتەردىڭ تىزبەسىن ايقىنداۋى؛
- ۇلتتىق ەكونوميكا مينيسترلىگى اكىمدىكتەرمەن بىرلەسىپ، ەكى اي ىشىندە مونوپوليا سۋبەكتىلەرىنىڭ بەلگىلەنگەن مەرزىمدەردى قاتاڭ ساقتاي وتىرىپ، قىزمەتتەردى سيفرلىق فورماتتا كورسەتۋىن قامتاماسىز ەتۋى؛
- جاساندى ينتەللەكت مينيسترلىگى مۇددەلى مەملەكەتتىك ورگاندارمەن جانە اكىمدىكتەرمەن بىرلەسىپ، ازاماتتاردىڭ كوممۋنالدىق قىزمەتتەرمەن شارتتاردى پرواكتيۆتى تۇردە بەكىتۋ قىزمەتىن بارلىق وڭىردە تولىققاندى ەنگىزۋى.
- جاساندى ينتەللەكت مينيسترلىگى«Digital Qazaqstan» ستراتەگياسىن ىسكە اسىرۋ جونىندەگى ءىس-قيمىل جوسپارىن ءبىر اپتا ىشىندە ۇكىمەتكە ەنگىزۋى قاجەت.