وڭىرلىك كوممۋنيكاتسيالار قىزمەتىندە قۇقىقتىق ءتۇسىندىرۋ جۇمىسى مەن زاڭ قىزمەتىن كورسەتۋ ءبولىمىنىڭ باسشىسى ايگۇل باقتىمبەتوۆانىڭ سوزىنشە، ازاماتتارعا تابىس دەڭگەيى مەن الەۋمەتتىك جاعدايىنا قاراماستان ءوز قۇقىعىن قورعاۋعا مۇمكىندىك بەرەتىن جاعداي جاسالعان.
- كونستيتۋتسيا اركىمگە بىلىكتى زاڭ كومەگىن الۋعا، زاڭدا كوزدەلگەن جاعدايلاردا زاڭ كومەگىن تەگىن الۋعا قۇقىق بەرەدى. مەملەكەت كەپىلدىك بەرگەن زاڭ كومەگى جۇيەسى از قامتىلعان جانە الەۋمەتتىك وسال توپتاردىڭ قۇقىعىن، بوستاندىعى مەن زاڭدى مۇددەسىن قورعاۋعا، سونداي- اق سوت تورەلىگىنە قولجەتىمدىلىكتى قامتاماسىز ەتۋگە باعىتتالعان. بۇل سالاداعى نەگىزگى نورماتيۆتىك اكت - «ادۆوكاتتىق قىزمەت پەن زاڭ كومەگى تۋرالى» قازاقستان رەسپۋبليكاسىنىڭ زاڭى»، - دەدى ايگۇل باقتىمبەتوۆا.
زاڭ كومەگىنىڭ ەڭ قولجەتىمدى ءتۇرى - قۇقىقتىق اقپارات بەرۋ. زاڭناما تۋرالى جالپى اقپاراتتى بارلىق جەكە جانە زاڭدى تۇلعالار ەش شەكتەۋسىز الا الادى. بۇل زاڭ نورماسىن ءتۇسىندىرۋ، بەلگىلى ءبىر جاعدايدا قانداي ارەكەت جاساۋ كەرەگى تۋرالى اقپارات بەرىپ، قۇقىقتىق ماتەريالدى جاريالاۋدى قامتيدى.
ال قۇقىقتىق كەڭەس ءبىر ماسەلەگە قاتىستى نەعۇرلىم جان-جاقتى كومەك كورسەتۋدى كوزدەيدى. كەڭەس اۋىزشا نەمەسە جازباشا تۇردە بەرىلۋى مۇمكىن. الايدا مۇنداي كومەكتى زاڭ بويىنشا وعان قۇقىعى بار ازاماتتارعا عانا كورسەتەدى.
مەملەكەت كەپىلدىك بەرگەن كومەكتىڭ تاعى ءبىر ءتۇرى - قورعاۋ مەن وكىلدىك ەتۋ. ادۆوكاتتار سوتقا دەيىنگى تەرگەپ-تەكسەرۋگە، قىلمىستىق، ازاماتتىق جانە اكىمشىلىك پروتسەسكە قاتىسا الادى، سونداي-اق ازاماتتاردىڭ مەملەكەتتىك ورگانداعى مۇددەسىن بىلدىرەدى.
تەگىن كونسۋلتاتسيا، قورعاۋ مەن وكىلدىك ەتۋ كومەگىن كىم الا الادى:
* اتاۋلى الەۋمەتتىك كومەك الۋعا قۇقىعى بار از قامتىلعان ازاماتتار،
* ەكىنشى دۇنيەجۇزىلىس سوعىس ارداگەرلەرى مەن ولارعا تەڭەستىرىلگەن ادامدار،
* مۇگەدەكتىگى بار ادامدار،
* جەتىم بالالار مەن اتا-اناسىنىڭ قامقورلىعىنسىز قالعان بالالار الا الادى.
مۇنداي كومەك تۇرمىستىق زورلىق-زومبىلىقتان، ادام ساۋداسىنان زارداپ شەككەندەرگە دە كورسەتىلەدى. كەيدە قىلمىستىق جانە ازاماتتىق پروتسەستىك زاڭنامادا كورسەتىلگەن ازاماتتاردىڭ باسقا دا ساناتى بۇل قۇقىققا يە.
الماتى قالالىق ادۆوكاتتار القاسى پرەزيديۋمى ءتوراعاسىنىڭ ورىنباسارى گۇلنار بايعازينا مۇنداي كومەكتى ناقتى كىمدەر كورسەتەتىنىن ءتۇسىندىردى.
- تەگىن زاڭ كومەگىن كورسەتۋ كاسىبي زاڭ قوعامداستىعىنا جۇكتەلگەن. ادۆوكاتتار ازاماتتارعا كونسۋلتاتسيا بەرەدى، ولاردى قورعاپ، سوتتاردا، سونداي-اق سوتقا دەيىنگى تەرگەپ-تەكسەرۋ ورگاندارىندا مۇددەسىن بىلدىرەدى. زاڭ كەڭەسشىلەرى زاڭدا بەلگىلەنگەن ءراسىم شەڭبەرىندە مەملەكەت كەپىلدىك بەرگەن زاڭ كومەگىن كورسەتۋگە قاتىسادى. نوتاريۋستار جەكەلەگەن جاعدايدا جەڭىلدىكتى ساناتتارعا جاتاتىن ازاماتتارعا نوتارياتتىق ارەكەتتى ىسكە اسىرادى،-دەدى مامان.
كورسەتىلگەن كومەكتىڭ ساپاسى مەن كولەمىن ادىلەت مينيسترلىگى، ادۆوكاتتار القاسى مەن زاڭ كەڭەسشىلەرى پالاتالارى باقىلايدى. ولار سونداي-اق ەسەپتىلىكتى جيناقتاپ، قالىپتاستىرادى. جۇيەنى ودان ءارى دامىتۋدىڭ نەگىزگى باعىتىنىڭ ءبىرى - سيفرلاندىرۋ. ازاماتتارعا زاڭ كومەگىن ونلاين فورماتتا قولجەتىمدى ەتۋ، ال مامانداردىڭ جۇمىسىن بارىنشا اشىق ەتۋ جوسپارلانىپ وتىر.