لارناكا قالاسىندا ورنالاسقان بىرىككەن ىزدەستىرۋ-قۇتقارۋ ورتالىعىنىڭ (JRCC) مالىمەتىنشە، وقيعا 30-قازاندا پافوس قالاسىنان باتىسقا قاراي 90 تەڭىز ءميلى قاشىقتىقتا بولعان.
تانزانيا تۋىمەن جۇزگەن As Dream ساۋدا كەمەسى سۋعا باتا باستاعان. بورتىندا 10 تەڭىزشى بولعان.
- 30-قازاندا بىرىككەن ىزدەستىرۋ-قۇتقارۋ ورتالىعىنا پافوس قالاسىنان باتىسقا قاراي 90 تەڭىز ءميلى قاشىقتىقتا تانزانيا تۋىمەن جۇزگەن As Dream ساۋدا كەمەسىنىڭ سۋعا باتىپ بارا جاتقانى تۋرالى اقپارات ءتۇستى. كەمەدە 10 ەكيپاج مۇشەسى بولعان. قۇتقارىلعانداردىڭ بارلىعى الدىمەن MSC Hannah III جۇك كەمەسىنە جەتكىزىلدى. كەيىن ولاردى پورت جانە تەڭىز پوليتسياسىنىڭ Pentadaktylos كاتەرى ليماسول پورتىنا الىپ كەلدى، - دەپ حابارلادى ورتالىق.
قۇتقارىلعان تەڭىزشىلەر مەديتسينالىق تەكسەرۋدەن ءوتتى. دارىگەرلەر ولاردىڭ دەنساۋلىق جاعدايىن جاقسى دەپ باعالادى.
JRCC مالىمەتىنشە، قۇتقارۋ وپەراتسياسىنا كيپر ۇلتتىق گۆاردياسىنىڭ تىكۇشاعى مەن جاعالاۋ كۇزەتىنىڭ پاترۋلدىك كاتەرى دە جۇمىلدىرىلعان.
ايتا كەتەيىك، بۇعان دەيىن يندونەزيانىڭ بالي ارالى جاعالاۋىندا رەسەيلىك تۋريستەر مىنگەن قايىق جارىلعانى حابارلانعان ەدى.