ۇكىمەتتە ازىق-تۇلىك قاۋىپسىزدىگى ماسەلەلەرى قارالدى

استانا. KAZINFORM - ۇكىمەتتە ۆيتسە-پرەمەر سەرىك ءجۇمانعاريننىڭ توراعالىعىمەن الەۋمەتتىك ماڭىزى بار ازىق-تۇلىك ونىمدەرىنىڭ باعاسىن تۇراقتاندىرۋ ماسەلەلەرى بويىنشا كەڭەس ءوتتى.

ساۋدا جانە ينتەگراتسيا مينيسترلىگى قازاقستاندا جارمەڭكەلەر مەن رەسپۋبليكالىق كورمەلەر وتكىزۋ ستاندارتتارىن ازىرلەپ، بەكىتتى.

جارمەڭكەلەردىڭ بارلىعى بەس ءتۇرى انىقتالدى: ماۋسىمدىق، وندا مەكتەپ كەرەك- جاراقتارى، كومىر، ءشوپ جانە ت. ب؛ تاقىرىپتىق - وتاندىق تاۋار وندىرۋشىلەردى قولداۋ ماقساتىندا؛ اۋىل شارۋاشىلىق - اگرارلىق ءونىمدى حالىققا قولجەتىمدى باعامەن ساتۋ ءۇشىن؛ بىرنەشە ءوڭىردىڭ قاتىسۋىمەن مەرەكەلىك جانە ايماقتىق مامانداندىرىلعان كورمەلەر.

«ءاربىر جارمەڭكە تۇرىنە ارنالعان كۇنتىزبەلىك كەستە جانە وتكىزۋ مەرزىمى بەلگىلەنگەن. مىسالى، اۋىل شارۋاشىلىعى جارمەڭكەلەرى اۋدانداردا ەكى اپتادا ءبىر رەتتەن كەم ەمەس، رەسپۋبليكالىق جانە وبلىستىق ماڭىزى بار قالالاردا اپتاسىنا ءبىر رەتتەن كەم ەمەس وتكىزىلۋگە ءتيىس. ەلوردادا جارمەڭكەلەر ماۋسىمنان قاراشاعا دەيىن ءوتۋى كەرەك. ۇيىمداستىرۋ پروتسەسى تسيفرلاندىرىلۋى قاجەت، سوندىقتان بارلىق نيەت بىلدىرۋشىلەر ونلاين قاتىسىپ، ءوتىنىش بەرە الادى. اۋىل شارۋاشىلىعى، مەرەكەلىك جانە ماۋسىمدىق جارمەڭكەلەردەگى باعالار نارىقتىق باعادان تومەن بەلگىلەنەدى»، - دەپ ءتۇسىندىردى ساۋدا جانە ينتەگراتسيا ءبىرىنشى ۆيتسە- ءمينيسترى ايجان بيجانوۆا.

ءوز كەزەگىندە سەرىك جۇمانعارين استانا اكىمدىگىنە ءداستۇرلى كۇزگى وڭىرلىك جارمەڭكەلەردى ۇيىمداستىرۋدى باستاۋدى تاپسىردى، بۇل رەتتە ولاردىڭ حالىق ءۇشىن الەۋمەتتىك ماڭىزىن اتاپ ءوتتى.

ق ر ا ش م مالىمەتىنشە، ەلىمىزدەگى ءامات قورلارىنىڭ كولەمى 725,8 مىڭ توننانى قۇرايدى. ازىق-تۇلىك قورى ازىق-تۇلىكتىڭ 29 تۇرىنەن قۇرالادى، ونىڭ ىشىندە: قوي ەتى، سيىر ەتى، كوكونىستەر، اشىتىلعان ءسۇت ونىمدەرى، الما، بالىق، ىرىمشىك، سۇزبە جانە ت. ب. ونىمدەر ا ك ك قويمالارىندا، ساۋدا جەلىلەرىندە، اۋىل شارۋاشىلىعى وندىرۋشىلەرىندە جانە ءىرى كوتەرمە جەتكىزۋشىلەردە ساقتالادى.

«ەگىن جيناۋ جۇمىستارىنىڭ جالعاسۋىن ەسكەرە وتىرىپ، نەگىزگى ازىق-تۇلىك ونىمدەرىمەن حالىقتى قامتاماسىز ەتۋگە جەتكىلىكتى قور بار»، - دەپ اتاپ ءوتتى ازات سۇلتانوۆ.

وتكەن اپتادا الەۋمەتتىك ماڭىزى بار ازىق-تۇلىك ونىمدەرىنە باعانىڭ ورتاشا يندەكسى تۇراقتى (ءوسۋ %0) بولىپ قالدى. جىل باسىنان باستاپ قازاقستاندا دەفلياتسيا - %0,2 دەڭگەيىندە ساقتالىپ وتىر.