ۇكىمەت ەكونوميكالىق پاتريوتيزم قاعيداتىن قاتاڭ ۇستانادى - ولجاس بەكتەنوۆ

استانا. KAZINFORM - ۇكىمەت ەكونوميكالىق پاتريوتيزم قاعيداتىن قاتاڭ ۇستانادى. بۇل تۋرالى ۇكىمەت وتىرىسىندا پرەمەر- مينيستر ولجاس بەكتەنوۆ ايتتى.

«جاڭا تەتىكتەردىڭ ءبىرى - وتاندىق تاۋار وندىرۋشىلەردىڭ ءبىرىڭعاي ءتىزىلىمى ەنگىزىلۋدە. تىزىلىمگە ءونىم شىعارىپ وتىرعان، وندىرىستىك قۋاتتارى جەتەرلىك، ءارى قاراي دامۋ ءۇشىن الەۋەتى مەن جوسپارلارى بار ناقتى كاسىپورىنداردىڭ عانا ەنۋى وتە ماڭىزدى. تىزىلىمگە ەنگەن كاسىپورىندار مەملەكەتتىك قولداۋ شارالارىن باسىم تارتىپپەن الاتىن بولادى. بۇل رەتتە ولارعا ءوندىرىستى جاڭعىرتۋ، ەڭبەك ونىمدىلىگى مەن باسەكەگە قابىلەتتىلىكتى ارتتىرۋ، جالاقىنى ءوسىرۋ بويىنشا قارسى مىندەتتەمەلەر قويىلادى»، - دەدى پرەمەر- مينيستر.

ونىڭ اتاپ وتۋىنشە، كاسىپورىنداردىڭ قىزمەتىنە مونيتورينگ جۇرگىزۋ سالىق جانە كەدەن قىزمەتتەرى، ەڭبەك ينسپەكتسيالارى مەن باسقا دا مەكەمەلەر تاراپىنان باقىلاۋ جاسالاتىن سيفرلىق سكرينينگ نەگىزىندە جۇزەگە اسىرىلاتىن بولادى.

«مۇنداي سكرينينگ سىبايلاس جەمقورلىق تاۋەكەلدەرىن ازايتۋ ءۇشىن ونلاين فورماتتا وتەدى. جالپى ۇيلەستىرۋدى ونەركاسىپ مينيسترلىگى جۇزەگە اسىرادى. ۇكىمەت ەكونوميكالىق پاتريوتيزم قاعيداتىن قاتاڭ ۇستانادى. ءبىز قاشاندا ءوزىمىزدىڭ وتاندىق وندىرۋشىلەردى قولدايتىن بولامىز. بۇل - ءاربىر اكىمنىڭ، ءاربىر ءمينيستردىڭ مىندەتى. ءبىز بۇل جايلى ۇنەمى ايتىپ جۇرەمىز. ول تەك ءسوز جۇزىندە عانا ەمەس، ناقتى ءىس جۇزىندە ورىندالۋعا ءتيىس»، - دەدى ول.

ولجاس بەكتەنوۆ يمپورتتى الماستىرۋ جۇمىستارىن، ونىڭ ىشىندە وفتەيك- كەلىسىمشارتتار ارقىلى جانداندىرا ءتۇسۋ قاجەتتىگىن باسا ايتتى.

«بۇل وتاندىق كومپانيالارعا وزدەرىن الداعى بىرنەشە جىلدار بويىنا تاپسىرىستارمەن قامتاماسىز ەتۋگە، جاڭا وندىرىستەردى كەڭەيتۋگە جانە يگەرۋگە مۇمكىندىك بەرەدى. مەملەكەتتىك ساتىپ الۋ اياسىندا تەك قانا جەرگىلىكتى وندىرۋشىلەردەن ساتىپ الىناتىن وتاندىق تاۋارلاردىڭ تىزبەسى ايقىندالدى. ءىرى مۇناي- گاز جوبالارىنداعى نەگىزگى جەر قويناۋىن پايدالانۋشىلار قازىردىڭ وزىندە وتاندىق تاۋار وندىرۋشىلەرمەن جالپى قۇنى 240 ميلليون دوللاردى قۇرايتىن كەلىسىمشارتتارعا قول قويدى. بۇل جۇمىستى جالعاستىراتىن بولامىز»، - دەدى ۇكىمەت باسشىسى.

اۆتور

مارلان جيەمباي