ۇكىمەت بۇگىن ەگىس جۇمىستارىن جۇرگىزۋدىڭ بارىسىن پىسىقتايدى
استانا. KAZINFORM - بۇگىن ساعات 10:00-دە ۇكىمەتتىڭ كەزەكتى وتىرىسى وتەدى. وندا مينيسترلەر كابينەتىنىڭ مۇشەلەرى 1 ماسەلەنى تالقىعا سالۋدى كوزدەپ وتىر.
ۇكىمەت وتىرىسىنىڭ كۇن تارتىبىنە مىنا ماسەلە شىعارىلادى:
- كوكتەمگى ەگىس جۇمىستارىن جۇرگىزۋ جانە ۆەگەتاتسيالىق كەزەڭدى وتكىزۋ.
كوتەرىلگەن ماسەلە بويىنشا اۋىل شارۋاشىلىعى ءمينيسترى ايداربەك ساپاروۆ پەن سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ نەگىزگى بايانداما جاسايدى، مۇنان بولەك ۇكىمەت باسشىسى كەيبىر ءوڭىر اكىمىنىڭ ەسەبىن تىڭداۋى مۇمكىن.
ەنەرگەتيكا ءمينيسترى ەرلان اقكەنجەنوۆ ۇكىمەت وتىرىسىندا كوكتەمگى ەگىس جۇمىستارىن جۇرگىزۋ ءۇشىن اۋىل شارۋاشىلىعى تاۋار وندىرۋشىلەرىن ديزەل وتىنىمەن قامتاماسىز ەتۋ بارىسى تۋرالى ەسەپ بەرەدى. ول جەڭىلدەتىلگەن وتىن جەتكىزۋ كەستەسىنىڭ ورىندالۋىنا جانە جونەلتىلىمدەردىڭ اشىقتىعىن قامتاماسىز ەتۋ شارالارىنا توقتالادى. سونداي-اق قازىرگى جەتكىزىلىم جاعدايى مەن ۆەدومستۆو تاراپىنان پروتسەستى باسىمدىقپەن باقىلاۋ جونىندە بايانداماق.
ەستە بولسا، وسى جىلدىڭ 11-اقپانىندا وتكەن ۇكىمەت وتىرىسىندا كوكتەمگى دالا جۇمىستارىنا دايىندىق ماسەلەلەرى قارالعان ەدى. اۋىل شارۋاشىلىعى ءمينيسترىنىڭ سول كەزدەگى دەرەگىنە سايكەس، 2025 -جىلى 23,8 ميلليون گەكتار القاپقا اۋىل شارۋاشىلىعى داقىلدارىن ەگۋ جوسپارلانعان. بۇل - 2024 -جىلمەن سالىستىرعاندا 518 مىڭ گەكتارعا ارتىق. ءداندى جانە بۇرشاقتى داقىلداردىڭ ەگىستىك القاپتارى - شامامەن 16,6 ميلليون گەكتار (2024 -جىلى - 16,7 ميلليون گەكتار). مايلى داقىلداردىڭ اۋدانى 365 مىڭ گەكتارعا ارتىپ، 3,3 ميلليون گەكتارعا جەتەدى، ونىڭ ىشىندە كۇنباعىس داقىلدارى 50,6 مىڭ گەكتارعا ءوسىپ، 1,3 ميلليون گەكتارعا دەيىن ۇلعايادى. سونداي-اق كارتوپ القابىن 14,9 مىڭ گەكتارعا ۇلعايتىپ، اۋماقتى 136,8 مىڭ گەكتارعا دەيىن جەتكىزۋ جوسپارلانعان. ال قاراقۇمىق داقىلدارى 41,5 مىڭ گەكتارعا ارتىپ، 147 مىڭ گەكتار جەرگە ەگىلەدى. 2025 -جىلى قانت قىزىلشاسىنىڭ اۋدانى 18,4 مىڭ گەكتار بولادى. جەمشوپ داقىلدارىنىڭ اۋدانى 184 مىڭ گەكتارعا ۇلعايىپ، 3,4 ميلليون گەكتارعا جەتەدى. ماقتا داقىلدارى - 135,2 مىڭ گەكتار، ال كۇرىش 90,2 مىڭ گەكتاردى الادى.
پرەمەر-مينيستر وتىرىس قورىتىندىسىندا مينيسترلىكتەر مەن اكىمدىكتەرگە مىناداي تاپسىرمالار بەردى:
اۋىل شارۋاشىلىعى مينيسترلىگىنە «بايتەرەك» حولدينگىمەن بىرلەسىپ، ەگىنشىلەردى ءتيىمدى مەملەكەتتىك قولداۋ ماقساتىندا نەسيە مەن سۋبسيديا بەرۋ راسىمدەرىن وڭتايلاندىرۋ جانە جەڭىلدەتۋ شارالارىن قابىلداۋ.
ەنەرگەتيكا، اۋىل شارۋاشىلىعى مينيسترلىكتەرى مەن ءوڭىر اكىمدەرى ارزانداتىلعان وتىننىڭ ءتيىستى كولەمىن جەتكىزۋدى باقىلاۋدا ۇستاۋ. شارۋالارعا تيەسىلى وتىننىڭ ساتىلىپ كەتۋىنە جول بەرەتىن كومپانيالار مەن جەكە تۇلعالارعا قاتىستى قاتاڭ شارالار قابىلداۋ.
سۋ رەسۋرستارى مينيسترلىگى اۋىل شارۋاشىلىعى مينيسترلىگىمەن جانە اكىمدىكتەرمەن بىرگە فەرمەرلەردى سۋارمالى سۋمەن ۇزدىكسىز قامتاماسىز ەتۋ شارالارىن قابىلداۋ.
بۇگىنگى وتىرىس بارىسىندا ءسۋ مينيسترى نۇرجان نۇرجىگىتوۆ 2025 -جىلعى ۆەگەتاتسيالىق كەزەڭگە دايىندىق بارىسى جايلى بايانداما جاسايدى. مينيستر اگرارلىق سەكتور ءۇشىن اسا ماڭىزدى سانالاتىن ۆەگەتاتسيالىق ماۋسىمداعى سۋ تاپشىلىعىنىڭ الدىن الۋ، سۋارۋ جۇيەلەرىنىڭ دايىندىعى جانە سۋ رەسۋرستارىن ءتيىمدى باسقارۋ شارالارى بويىنشا قابىلدانىپ جاتقان ءىس-شارالاردى تانىستىرادى.
سونىمەن قاتار ۇكىمەت وتىرىسىندا وڭىرلەردىڭ دايىندىق دەڭگەيى، ترانسشەكارالىق سۋ ماسەلەلەرى جانە شارۋالارمەن ءوزارا ءىس-قيمىل جايى دا ءسوز بولادى.
وتىرىس بىتكەننەن كەيىن باسپا ءسوز ءماسليحاتى وتكىزىلەدى. وندا اۋىل شارۋاشىلىعى ءمينيسترى ايداربەك ساپاروۆ پەن سۋ رەسۋرستارى جانە يرريگاتسيا ۆيتسە- ءمينيسترى نۇرلان الدامجاروۆ ب ا ق وكىلدەرىنىڭ ساۋالدارىنا جاۋاپ بەرەدى.
ايتا كەتەرلىگى، كەشە ماجىلىستە سۋ شارۋاشىلىعى سالاسىن رەفورمالاۋ بويىنشا قابىلدانىپ جاتقان شارالارعا ارنالعان ۇكىمەت ساعاتى ءوتتى. ءىس-شارا اياسىندا تاقىرىپتىق كورمە ۇيىمداستىرىلىپ، وندا سۋ جانە بالىق شارۋاشىلىعى، سۋدى ۇنەمدەۋ، كليماتقا ءتوزىمدى سۋ رەسۋرستارىن دامىتۋ، يرريگاتسيالىق ارنالارداعى سۋدى ەسەپكە الۋ جانە باسقا دا باعىتتارداعى يننوۆاتسيالىق جوبالار ۇسىنىلدى.
نەگىزگى ماسەلە بويىنشا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ نەگىزگى بايانداما جاساپ، دەپۋتاتتار تاراپىنان تۋىنداعان ساۋالدارعا جاۋاپ بەردى. ول رەسەي تاراپى كەي جىلى قازاقستانعا تيەسىلى سۋدىڭ تەڭ جارتىسىن بەرىپ كەلگەنىن جاسىرعان جوق.
- سۋ كولەمىنە كەلسەك، 2019 -جىلى جايىق وزەنىنەن ەڭ تومەن كولەمدە سۋ بەرىلگەن. جالپى كەلىسىم بويىنشا جىل سايىن ەڭ كەم دەگەندە 7,8 ميلليارد تەكشە مەتر سۋ الۋىمىز كەرەك. ال 2019 -جىلى 3,5 ميلليارد تەكشە مەتر عانا سۋ الدىق. سوندىقتان مەملەكەت باسشىلارى تاپسىرما بەرىپ، ارنايى جول كارتاسى ازىرلەنگەن. جول كارتاسىنىڭ اياسىندا جايىقتىڭ بويىنداعى سۋ قويمالارى مەن بوگەتتەرىن تۇگەندەۋ كەرەك. ول جول كارتاسىنىڭ دا مەرزىمى ۇزارتىلدى، - دەدى مينيستر.
سونىمەن قاتار نۇرجان نۇرجىگىتوۆ ءماجىلىس دەپۋتاتى ەرلان سايروۆتىڭ ساۋالىنا جاۋاپ بەرە كەلە، سۋدىڭ زاڭسىز ساۋداسى تولىق جويىلماي تۇرعانىن مويىندادى.
- قارا نارىققا بايلانىستى ايتقانىڭىز راس. بۇگىنگى تاڭدا بۇكىل رەسپۋبليكا كولەمىندە «قازسۋشارمەن» كەلىسىمشارت جاساماي، سۋدى الۋ دەگەن ماسەلەلەر بار. ءبىز ونى قالاي شەشىپ جاتىرمىز؟ «قازسۋشار» مەكەمەسىمەن قازىر كەلىسىمشارتتاردى جاساۋدى ەلەكتروندى فورماتقا كوشىرۋگە كىرىستىك. سەبەبى ەلەكتروندى تۇرگە كوشىرسەك، قاداعالاۋ ماسەلەسى رەتتەلەدى. ودان بولەك ءوزىمىزدىڭ اقپاراتتىق تالداۋ ورتالىعى ارقىلى شارۋا قوجالىعى سۋدى كەلىسىمشارتقا ساي الدى نەمەسە كوپ الدى، كاسساعا قانشا اقشا ءتۇستى نەمەسە تۇسكەن جوق دەگەن ماسەلەگە عارىشتان مونيتورينگ جاساۋدى ەنگىزەيىن دەپ جاتىرمىز. ول جالپى 100 پايىز پروبلەمانى شەشپەيتىن شىعار. ءبىراق بىزگە ۇلكەن قۇرال رەتىندە جاردەم كورسەتەدى، - دەدى ۆەدومستۆو باسشىسى.
ال وتكەن اپتاداعى ۇكىمەت وتىرىسىندا حيميا جانە مۇناي حيمياسى سالاسىن دامىتۋ ماسەلەسى تالقىعا تۇسكەن بولاتىن. وندا ەنەرگەتيكا ءمينيسترى ەرلان اقكەنجەنوۆ مۇددەلى تاراپتارمەن، ونىڭ ىشىندە «قازمۇنايگاز» ۇلتتىق كومپانياسى، «KazEnergy» قاۋىمداستىعى، مۇناي- گاز-حيميا ونىمدەرىن وندىرۋشىلەر مەن تۇتىنۋشىلار قاۋىمداستىعىمەن، سونداي-اق مەملەكەتتىك ورگاندارمەن بىرلەسىپ «مۇناي- گاز- حيميا ونەركاسىبى تۋرالى» زاڭ جوباسىن ازىرلەۋ قولعا الىنعانىن ايتقان ەدى.
كولىك ءمينيسترى مارات قارابايەۆ تاپسىرىستار ۋاقتىلى بەرىلىپ، ۋاقتىلى ورىندالىپ جاتقانىمەن ءبارى ءبىر بيتۋم يمپورتى توقتامايتىنىن اتاپ ءوتتى.
وتىرىستى قورىتىندىلاعان ۇكىمەت باسشىسى ولجاس بەكتەنوۆ حيميا سالاسى ونىمدەرىن سىرتقا شيكىزات ەمەس، دايىن ءونىم رەتىندە شىعارۋ كەرەكتىگىن ايتتى.
- بۇگىندە حيميا ءوندىرىسى سالاسى شيكىزاتىنىڭ شامامەن E تەرەڭ وڭدەلمەي، بىردەن ەكسپورتقا شىعارىلادى. ەلىمىز جىل سايىن 800 مىڭ تونناعا جۋىق فوسفوريت شيكىزاتىن ەكسپورتتايدى. ونەركاسىپ مينيسترلىگى شيكىزاتتى قايتا وڭدەۋ بويىنشا جوعارى تەحنولوگيالىق جاڭا جوبالارعا جەكە ينۆەستيسيا تارتۋ ءۇشىن جاعداي جاساۋى قاجەت، - دەدى ۇكىمەت باسشىسى.
سونىمەن قاتار پرەمەر-مينيستر ەكولوگيا جانە تابيعي رەسۋرستار مينيسترلىگىنە، ونەركاسىپ جانە قۇرىلىس مينيسترلىگى جانە ەنەرگەتيكا مينيسترلىگىمەن بىرلەسىپ، بيىل زاماناۋي ەكولوگيالىق سۇزگىلەر مەن ۋتيليزاتسيالاۋ تەحنولوگيالارىن ءالى دە پايدالانباي وتىرعان كاسىپورىنداردى تۇگەندەۋدى اياقتاپ، ولاردى جاڭعىرتۋ مەن جاسىل تەحنولوگيالاردى ەنگىزۋدىڭ ارنايى جوسپارىن قابىلداۋدى تاپسىردى.
ايتا كەتەيىك، ۇكىمەت وتىرىسىنىڭ تىكەلەي تاراتىلىمىن PrimeMinister.kz سايتىنان، YouTube رەسمي ارناسىنان، Facebook الەۋمەتتىك جەلىسىنەن، سونداي-اق UKIMET Telegram-كانالىنان كورۋگە بولادى.
باسپا ءسوز كونفەرەنسياسى YouTube رەسمي ارناسى مەن Facebook الەۋمەتتىك جەلىسىنەن تىكەلەي كورسەتىلەدى.
اۆتور
مارلان جيەمباي