ۇكىمەت باسشىسى ينتەرنەتتەگى الاياقتىقتىڭ الدىن الۋدى تاپسىردى

استانا. قازاقپارات - ازاماتتاردىڭ دەربەس دەرەكتەرىن بوگدە ادامدارعا قاساقانا بەرگەندەردى جاۋاپقا تارتۋ قاجەت. پرەمەر- مينيستر ولجاس بەكتەنوۆ بۇل ماسەلەنى ارنايى پىسىقتاۋدى تاپسىردى. ياعني، بانك شوتتارى، كارتالار، جەكە كۋالىك دەرەكتەرى جانە تەلەفون نومىرلەرىن تاراتۋ قىلمىس سانالۋى مۇمكىن.

بۇل تۋرالى ينتەرنەت الاياقتىققا قارسى كۇرەس شارالارى، قۇقىقبۇزۋشىلىقتىڭ الدىن الۋ جونىندەگى ۆەدومستۆوارالىق كوميسسيادا تالقىلاندى. ۇكىمەت باسشىسىنىڭ ايتۋىنشا، مۇنداي قىلمىستاردىڭ كوپشىلىگى شەتەلدە جاسالادى. جۇرتتى الداپ، جەڭىل جولمەن اقشا تاپقىسى كەلەتىندەر بۇنى كاسىپكە اينالدىرىپ العان. الايدا ولاردى زاڭداعى ولقىلىقتارعا بايلانىستى جازالاۋ قيىنعا ءتۇسىپ وتىر. ال اككى ايلاكەرلەردىڭ شابۋىلداۋ ءتاسىلى كۇن ساناپ تۇرلەنە تۇسكەن.

ىشكى ىستەر ءمينيسترى ەرجان سادەنوۆتىڭ مالىمەتىنشە، ەلىمىزدە جىل باسىنان بەرى ينتەرنەت الاياقتىققا قاتىستى 2,5 مىڭنان استام قىلمىس اشىلدى. «كيبەرپول» ارنايى توپتارىنىڭ جۇرگىزگەن تەكسەرۋىنەن كەيىن 962 ميلليون تەڭگە كولەمىندەگى شىعىن وتەلگەن. سونىمەن قاتار كوميسسيا وتىرىسىندا كامەلەتكە تولماعاندار اراسىنداعى قۇقىقبۇزۋشىلىقتىڭ الدىن الۋ ماسەلەسى دە ءسوز بولدى.