ۇكىمەت باسشىسى بيىل مول استىق جيناۋعا نە ىقپال ەتكەنىن ايتتى

  استانا. KAZINFORM - پرەمەر- مينيستر ولجاس بەكتەنوۆ بيزنەسكە قولايلى جاعداي جاساۋ بويىنشا اتقارىلىپ جاتقان ءىس- شارالار جايىندا ايتىپ بەردى.

«كاسىپكەرلىكتى قولداۋ ءىس- شارالارى جەتىلدىرىلىپ جاتىر. بىلتىردان بەرى ەنگىزىلگەن «ءبارىن باسىنان باستاپ رەتتەۋ» قاعيداسىنا سايكەس، بيزنەسكە قاتىستى 10 مىڭنان استام تالاپ جويىلدى. ولار جاڭا رەتتەۋ ساياساتىنىڭ بازالىق تالاپتارىنا سايكەس كەلمەدى. وسى تەكتەس جۇمىس وڭىرلىك دەڭگەيدە دە ىسكە اسىرىلىپ جاتىر»، - دەدى و. بەكتەنوۆ ەلورداداعى «ادال ازامات. ادال ەڭبەك. ادال بيزنەس» فورۋمىندا.

بۇل تۇرعىدا ول كاسىپكەرلەر الدىنداعى كەدەرگىلەر ءالى دە بار ەكەنىن، سوندىقتان بيزنەس جۇمىسىن وڭتايلى ەتۋگە ارنالعان ءىس-شارالار جالعاساتىنىن اتاپ ءوتتى.

«قازىر شاعىن جانە ورتا بيزنەستىڭ ەل ەكونوميكاسىنداعى ۇلەسى 37 پايىزعا جۋىق. 4 ميلليوننان استام قازاقستاندىق بيزنەس سالاسىندا قىزمەت ەتىپ ءجۇر. تەك وتكەن جارتى جىلدا شوب سۋبەكتىلەرى 34 تريلليون تەڭگەنىڭ ءونىمىن شىعاردى، ياعني ءوسىم 20 پايىزعا جۋىق بولدى»، - دەدى ۇكىمەت باسشىسى.

ونىڭ ايتۋىنشا، مەملەكەتتىك قولداۋدىڭ تيىمدىلىگى ارقاسىندا اگروونەركاسىپ كەشەنى سالاسىندا ەلەۋلى ءوسىم بولدى. بيىل كوكتەمدە ەگىن ەگۋ مەن كۇزگى ەگىن وراعى ناۋقانىنا جەڭىلدەتىلگەن نەسيە بەرۋ 2,5 ەسەگە ارتىپ، 580 ميلليارد تەڭگەنى قۇرادى. وسىنىڭ ارقاسىندا تىڭايتقىشتار كولەمى ارتىپ، تۇقىم ساپاسى جاقسارىپ، تەحنيكا پاركى جاڭارتىلىپ، زيانكەستەرمەن كۇرەس جۇمىستارى كۇشەيتىلدى.

«مۇنىڭ ناتيجەسىندە قازاقستان 26 ميلليون توننادان استام استىق جينادى. بۇل ءوز كەزەگىندە كەيىنگى 10 جىلداعى ۇزدىك ناتيجە. ورتا ەسەپپەن گەكتارىنان شامامەن 16 سەنتنەردەن ءونىم الىندى. كەيبىر القاپتاردان ديقاندار 40-50 سەنتنەردەن ءونىم جينادى. وسىنداي جۇمىستاردى شاعىن جانە ورتا بيزنەس سالاسىندا دا جۇرگىزۋ قاجەت. مەملەكەتتىك قولداۋ بيزنەستىڭ دە ءتيىستى مىندەتتەردى ورىنداۋىن تالاپ ەتەدى. وسى ورايدا ىشكى نارىقتى ساپالى ءارى قىمبات ەمەس ونىممەن قامتاماسىز ەتۋ مىندەتى بار. سونداي- اق وڭدەۋ دەڭگەيىن ارتتىرۋ، تۇراقتى جۇمىس ورىندارىن قۇرۋ جانە ەكسپورت باعىتىندا بيزنەستى كەزەڭ-كەزەڭىمەن ىرىلەندىرۋ جۇمىستارىنا نازار اۋدارۋى كەرەك»، - دەدى پرەمەر- مينيستر.