ۇكىمەت ازاماتتارعا الەۋمەتتىك كومەك بەرۋ جۇيەسىن قايتا قارايدى

استانا. KAZINFORM - ۇكىمەت ازاماتتارعا الەۋمەتتىك كومەك بەرۋ جۇيەسىن قايتا قاراۋى كەرەك. بۇل تۋرالى اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا مەملەكەت باسشىسى قاسىم-جومارت توقايەۆ ايتتى.

«ۇكىمەت ازاماتتارعا الەۋمەتتىك كومەك بەرۋ جۇيەسىن قايتا قاراۋى كەرەك. سوعان سايكەس ءتيىستى تاپسىرما بەرىلدى. مەملەكەتتەن بەرىلەتىن اتاۋلى الەۋمەتتىك كومەكتى شىن مانىندە مۇقتاج ازاماتتار الۋعا ءتيىس. الايدا كەيبىر اۋىلدىق جەردە ءبىر وتباسىدان بىرنەشە ادام اتاۋلى الەۋمەتتىك كومەك الاتىن جاعدايلار ءجيى كەزدەسەدى. وكىنىشكە قاراي ونداي ازاماتتارىمىز جۇمىس ىستەپ، ەڭبەك ەتۋگە دە قۇلىقسىز. سەبەبى مەملەكەتتەن تۇسەتىن جاردەمگە سەنەدى. بۇل، ارينە، دۇرىس ەمەس. تۇپتەپ كەلگەندە، مۇنداي ارەكەت الەۋمەتتىك ماسىلدىقتى تۋعىزىپ وتىر»، - دەدى مەملەكەت باسشىسى.

پرەزيدەنت ادىلەتتى قازاقستاندى قۇرۋ جولىندا ناقتى قادامدار جاساپ جاتقانىمىزدى ايتتى.

«بارلىق سالاداعى جۇمىستىڭ اشىق بولۋىنا كوڭىل ءبولىپ وتىرمىز. وسى ورايدا ازاماتتارىمىزدىڭ تابىسىن جاپپاي دەكلاراتسيالاۋدىڭ ءمان- ماڭىزى زور. بۇل تالاپ 2021 -جىلدان بەرى بىرتىندەپ ەنگىزىلىپ جاتىر. العاشقى ءۇش كەزەڭدە 4 ميلليوننان استام ادام دەكلاراتسيا تاپسىردى. ولاردىڭ قاتارىندا مەملەكەتتىك قىزمەتشىلەر، كۆازيمەملەكەتتىك سەكتورداعى باسشىلار، كاسىپكەرلەر جانە وسى ساناتقا كىرەتىن ازاماتتاردىڭ جۇبايلارى بار. كەلەسى جىلى تاعى 8 ميلليونعا جۋىق ادام دەكلاراتسيا تاپسىرادى دەپ جوسپارلانىپ وتىر. الايدا ءبىر ماسەلەنى ەسكەرۋ قاجەت. جاپپاي دەكلاراتسيا تاپسىرۋ تۇجىرىمداماسى وسىدان 14 جىل بۇرىن قابىلدانعان. سودان بەرى ەلىمىزدە سيفرلاندىرۋ ءىسى جانە فينتەح سالاسى قارقىندى دامىپ كەلە جاتىر. ءتۇرلى مەملەكەتتىك مەكەمەلەرگە ورتاق مالىمەتتەر بازاسى پايدا بولدى. قارجى جانە سالىق باقىلاۋى كۇشەيدى. دەمەك وسىنداي اۋقىمدى وزگەرىستەردەن كەيىن ءتورتىنشى، ياعني، سوڭعى كەزەڭدە ازاماتتاردى دەكلاراتسيا تاپسىرۋعا مىندەتتەۋ قانشالىقتى ورىندى دەگەن سۇراق تۋادى. ۇكىمەت بۇل ماسەلەنى جان-جاقتى پىسىقتاۋى قاجەت»، - دەدى مەملەكەت باسشىسى.

اۆتور

مارلان جيەمباي