ۇكىمەت الداعى 3 جىلدا قارىزدارعا قىزمەت كورسەتۋ ءۇشىن 7,2 تريلليون تەڭگە جۇمسايدى

استانا. KAZINFORM - قارجى مينيسترلىگى Kazinform ساۋالىنا جولداعان جاۋابىندا ۇكىمەتتىك بورىشقا قىزمەت كورسەتۋدىڭ شىعىندارى تۋرالى اقپارات بەردى.

2024- 2026 -جىلدارعا ارنالعان رەسپۋبليكالىق بيۋدجەت تۋرالى» ق ر زاڭىمەن 2024 -جىلى ۇكىمەتتىك بورىشقا قىزمەت كورسەتۋگە 2,02 تريلليون تەڭگە سوماسىندا شىعىستار كوزدەلگەن. «2025- 2027 -جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىندا ۇكىمەت بورىشىنا قىزمەت كورسەتۋگە كەلەسى شىعىستار كوزدەلگەن:

- 2025 -جىلى - 2 تريلليون 502 ميلليارد تەڭگە؛

- 2026 -جىلى - 2 تريلليون 294 ميلليارد تەڭگە؛

- 2027 -جىلى - 2 تريلليون 432 ميلليارد تەڭگە.

«سوڭعى ەسەپتى كۇنگە (2024 -جىلعى 1-قازاندا) مەملەكەتتىك بورىش 30 تريلليون 504,8 ميلليارد تەڭگەنى (نەمەسە 63,6 ميلليارد دوللار، ونىڭ ىشىندە سىرتقى 7 تريلليون 217,0 ميلليارد تەڭگەنى (نەمەسە 15,1 ميلليارد دوللار) قۇرايدى»، - دەپ جازىلعان جاۋاپتا.

بۇعان دەيىن قازاقستان ۇكىمەتى قاي ەلگە قانشا قارىز ەكەنىن جازعان بولاتىنبىز.

جىل باسىنان بەرى ۇكىمەت ىشكى نارىققا مەملەكەتتىك باعالى قاعاز شىعارۋ ارقىلى 4 تريلليون 996,6 ميلليارد تەڭگە قارىز تارتقان.

اۆتور
ەسىمجان ناقتىباي