كىمدەرگە رەسپۋبليكا كۇنىنە وراي ءبىر رەتتىك تولەم بەرىلەدى

استانا. KAZINFORM - استانادا كەيبىر تۇرعىندارعا رەسپۋبليكا كۇنىنە وراي 4,5 ا ە ك كولەمىندە ءبىرجولعى تولەم بەرىلەدى.

قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ مالىمەتىنشە، بۇل كومەك الەۋمەتتىك جاعىنان وسال ساناتتاعى ازاماتتارعا قاراستىرىلعان. تولەمدەر 2023-جىلدىڭ قازانىندا استانا ءماسليحاتى بەكىتكەن الەۋمەتتىك كومەك كورسەتۋ ەرەجەلەرىنە سايكەس جۇزەگە اسىرىلادى.

قۇجاتقا ساي، مەرەكەلىك تولەم جىلىنا ءبىر رەت جانە تەك ءبىر نەگىز بويىنشا - ەڭ جوعارى مولشەردە تاعايىندالادى. بيىل 25-قازانعا دەيىن ءوتىنىش بەرگەن تۇرعىندار 4,5 ايلىق ەسەپتىك كورسەتكىش (17694 تەڭگە) كولەمىندە تولەم الادى.

تولەم الۋشىلاردىڭ ءتىزىمىن جۇمىسپەن قامتۋ جانە الەۋمەتتىك قورعاۋ باسقارماسى قالىپتاستىرادى.

ايتا كەتەيىك، 2025-جىلى رەسپۋبليكا كۇنىنە وراي بەس كۇندىك جۇمىس كەستەسىمەن ەڭبەك ەتەتىن قازاقستاندىقتار ءۇش كۇن – 25، 26 جانە 27-قازان كۇندەرى دەمالاتىن بولادى.