كىمدەر ارناۋلى الەۋمەتتىك تولەم الادى؟

قازاقستاندا 1- قاڭتاردان باستاپ زيان ەڭبەك جاعدايىندا جۇمىس ىستەيتىندەر ءۇشىن ارناۋلى الەۋمەتتىك تولەم ەنگىزىلدى، - دەپ حابارلايدى ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتى.

ارناۋلى الەۋمەتتىك تولەمدەردى تاعايىنداۋدىڭ مىندەتتى شارتتارى مىناداي: 55 جاسقا تولۋ جانە ب ج ز ق- دا كەمىندە 7 جىل كولەمىندەگى كاسىپتىك زەينەتاقى اۋدارىمى بولۋى.

«ارناۋلى الەۋمەتتىك تولەم بىرنەشە كومپونەنتتەن تۇرادى جانە ءتورت قاراجات كوزىنەن جۇزەگە اسىرىلادى: رەسپۋبليكالىق بيۋدجەتتەن 2 ەڭ تومەن كۇنكورىس دەڭگەيى مولشەرىندە ارناۋلى كاسىپتىك جاردەماقى؛ ءومىردى ساقتاندىرۋ جونىندەگى كومپانيالاردان 1 ەڭ تومەن كۇنكورىس دەڭگەيى مولشەرىندە؛ جۇمىس بەرۋشىلەردىڭ قاراجاتى ەسەبىنەن 1 ەڭ تومەن كۇنكورىس دەڭگەيى مولشەرىندە، ب ج ز ق- دان مىندەتتى كاسىپتىك زەينەتاقى جارنالارى ەسەبىنەن. بۇدان بولەك جۇمىسكەرلەرگە ب ج ز ق- داعى زەينەتاقى جيناقتارىن ەسكەرە وتىرىپ، مىندەتتى زەينەتاقى جارنالارى ەسەبىنەن تولەم الۋ قۇقىعى بەرىلەدى»، - دەلىنگەن ۆەدومستۆو حابارلاماسىندا.

ارناۋلى الەۋمەتتىك تولەم ەكونوميكانىڭ 19 سالاسىندا، ونىڭ ىشىندە تاۋ-كەن ءوندىرۋ، وڭدەۋ ونەركاسىبىندە جانە تاعى باسقالارىندا جۇمىس ىستەيتىن قازاقستاندىقتارعا تيەسىلى.

«ءبىرىڭعاي جيناقتاۋشى زەينەتاقى قورىنىڭ دەرەكتەرى بويىنشا ارناۋلى الەۋمەتتىك تولەمدى تاعايىنداۋ ءۇشىن مىندەتتى شارتتاردى ەسكەرگەندە، 2024-جىلى وعان 37 مىڭنان اسا جۇمىسكەر، 2030-جىلى 58 مىڭنان اسا، 2035-جىلى 95 مىڭنان اسا جۇمىسكەر ۇمىتكەر بولا الادى. وسىلايشا، الەۋەتتى تولەم الۋشىلار سانى جىل سايىن ۇلعايادى. الدىن الا دەرەكتەر بويىنشا 2024-جىلى ارناۋلى الەۋمەتتىك تولەمنىڭ ورتاشا مولشەرى جالپى العاندا 208 مىڭ تەڭگەدەن اسادى. ءاربىر جۇمىسكەر ءۇشىن تولەم مولشەرى ب ج ز ق- داعى جيناققا بايلانىستى بولادى. بۇل رەتتە جىل سايىن ارناۋلى الەۋمەتتىك تولەم مولشەرى ەڭ تومەن كۇنكورىس مولشەرى ۇلعايۋىنا بايلانىستى وسەدى. الدىن الا ەسەپتەۋلەر بويىنشا 2030-جىلى تولەمنىڭ ورتاشا مولشەرى 339 مىڭ تەڭگە، ال 2035-جىلى 519 مىڭ تەڭگە بولادى»، - دەلىنگەن حابارلامادا.

ەسكە سالايىق، بۇعان دەيىن ەڭبەك جانە حالىقتى الەۋمەتتىك قورعاۋ ۆيتسە-ءمينيسترى نازگۇل ساعىندىقوۆا زيان ەڭبەك جاعدايىندا جۇمىس ىستەيتىن، 55 جاسقا تولعان كەنشىلەر ارناۋلى تولەمدى الۋ ءۇشىن نە ىستەۋ كەرەگىن تۇسىندىرگەن ەدى.