كىمدە قانداي پاتەر، كەمە، ۇشاق بارى ءتىزىلىپ تۇر - مينيستر ءسان-سالتانات سالىعى تۋرالى

استانا. KAZINFORM - ءسان-سالتانات سالىعىن ەسەپتەۋدىڭ وزىندىك مەتوديكاسى بار. ول تۋرالى تولىعىراق پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين Kazinform اگەنتتىگىنە ايتىپ بەردى.

- سالىقتىق مورال دەگەن بار، ونىڭ ءمانى - باي ادام كوبىرەك تولەۋ كەرەك. ول - اكسيوما ەمەس، مۇمكىندىگىڭ بولسا كوبىرەك تولەگەن ءجون. سوندىقتان العان دۇنيە 450 ميلليون تەڭگەدەن استام بولسا، وندا ءسان-سالتانات سالىعىن تولەيدى. نەگىزى ونىڭ ەسەبى كۇردەلى. سالىق باعالاۋعا بايلانىستى، ويتكەنى نارىقتىڭ باعاسى مەن رەسمي باعانىڭ ايىرماشىلىعى ەسكەرىلەدى. ەسەپتەۋدىڭ ءوز مەتوديكاسى بار، وبەكتىنىڭ باعاسى 450 ميلليون تەڭگەدەن استام بولسا، وندا جىلىنا 3 ميلليون تەڭگەگە جۋىق بازالىق سالىق، وعان قوسىمشا تاعى %2 تولەيسىڭ. ال اۆتوكولىك بويىنشا 75 ميلليون تەڭگەنىڭ ۇستىندە بولسا، سالىق قاراستىرىلادى، - دەدى سەرىك جۇمانعارين سۇحبات بارىسىندا.

سونىمەن قاتار ۆيتسە-پرەمەر قىمبات كەمە، ۇشاق، تەمەكى جانە الكوگول ونىمدەرىنە  اكتسيز تولەۋ كوزدەلگەنىن ءمالىم ەتتى.

- بىردەن ايتىپ كەتەيىن، بۇل - كوپ اقشا ەمەس. قازىر بىزدە كىمدە قانداي پاتەر بار، قانداي كەمەسى جانە ۇشاعى بارى تۋرالى ءتىزىم بار. سوندىقتان قاتتى اسەر ەتپەيدى، بۇل - قاعيدا، - دەيدى مينيستر.

ايتا كەتەيىك، 9-ساۋىردە ءماجىلىس سالىق كودەكسىنىڭ جاڭا جوباسىن ءبىرىنشى وقىلىمدا ماقۇلدادى.

سالىق كودەكسىنىڭ جاڭا جوباسى بويىنشا سالىق ەسەبىن تاپسىراتىندار سانى 30 پايىزعا قىسقارادى.

ەسكە سالساق، قوسىلعان قۇن سالىعى سالىناتىن اينالىمنىڭ تومەنگى شەگى 40 ميلليون تەڭگە بولادى.

سونداي-اق سەرىك جۇمانعارين كورپوراتيۆتىك تابىس سالىعىنىڭ مولشەرلەمەسى وسەتىن سالالاردى اتادى.