قازاقستان ۇلتتىق قۇراماسىنىڭ جانە شىمكەنتتىك «ورداباسى» كلۋبىنىڭ كاپيتانى اسحات تاعىبەرگەن 1990-جىلى 9- تامىزدا دۇنيەگە كەلگەن.
ا. تاعىبەرگەن سپورتتىق جولىن 2008-جىلى قىزىلوردانىڭ «قايسار» كلۋبىندا باستادى. 2013-جىلى «اقتوبە» كومانداسىنا اۋىسىپ، ەل چەمپيونى، كۇمىس جانە قولا جۇلدەگەر اتاندى. قازاقستان سۋپەركۋبوگىن جەڭىپ الدى. ەۋروپا ليگاسى مەن ۋەفا چەمپيوندار ليگاسىنىڭ ىرىكتەۋ كەزەڭدەرىنە قاتىستى.
2016-جىلدان «استانا» ساپىندا دوپ تەۋىپ، ەكى جىل قاتارىنان قازاقستان چەمپيونى اتاندى. ەل كۋبوگىنە دە قول جەتكىزدى.
قوستانايدىڭ «توبىلى» قۇرامىندا 2021-جىلى جانە بيىل شىمكەنتتىك «ورداباسى» ساپىندا رەسپۋبليكا چەمپيونى بولدى.
قازاقستان قۇراماسىنا 2014-جىلى العاش رەت شاقىرىلعان اسحات تاعىبەرگەن بيىل استانادا 2024-جىلعى ەۋروپا چەمپيوناتىنىڭ ىرىكتەۋ تۋرنيرىندە دانيا قۇراماسىنىڭ قاقپاسىنا الىستان قاقىراتا گول سوقتى. وسى گول فەرەنتس پۋشكاش اتىنداعى حالىقارالىق فۋتبول فەدەراتسياسى (ف ي ف ا) سىيلىعىنىڭ «جىلدىڭ ۇزدىك گولى» نوميناتسياسىنا ەندى.
باحتيەر زاينۋتدينوۆ 1998-جىلى 2- ساۋىردە تاراز قالاسىندا ءومىر ەسىگىن اشتى. ول 19 جاسىندا-اق «تاراز» كلۋبىندا ويناپ، بىردەن جارق ەتىپ، كوزگە ءتۇستى.
2017-جىلى 25- قاراشادا «استاناعا» اۋىسىپ، سۋپەركۋبوكتى جەڭىپ الدى. ءبىر جىلدان كەيىن ەل چەمپيونى اتاعىنا قول جەتكىزدى.
2019-جىلى 12- قاڭتاردا رەسەيلىك «روستوۆ» كلۋبىمەن كەلىسىم-شارت جاساستى.
2020-جىلدىڭ 25- تامىزىنان ماسكەۋدىڭ تسسكا كومانداسىندا وينادى. بيىلعى تامىزدان بەرى تۇركيانىڭ «بەشيكتاش» كلۋبى قۇرامىندا الاڭعا شىعىپ كەلەدى.
قازاقستان ۇلتتىق قۇراماسىنا العاش 2018-جىلى الىندى. بيىل 17- قازاندا فينليانديامەن وتكەن ماتچتا قوس گولدىڭ اۆتورى اتاندى. ءسويتىپ كوماندا ساپىندا 14 گول سوعىپ، رۋسلان بالتيەۆتى (13) باسىپ وزىپ، قازاقستان ۇلتتىق قۇراماسى تاريحىندا ۇزدىك سۇرمەرگەن اتاندى.
ماكسيم سامورودوۆ 2002-جىلى 29- ماۋسىمدا اقتوبە قالاسىندا تۋعان.
«اقتوبە» ساپىندا 2019-جىلى 5- قازاندا «قايراتپەن» (الماتى) وتكەن كەزدەسۋدە العاش رەت الاڭعا شىقتى. 2021-جىلى 2- شىلدەدە «اقجايىق» قاقپاسىنا قوس دوپ ەنگىزىپ، كومانداسىنا جەڭىس اپەردى. 2022-جىلعى قازاقستان چەمپيوناتىنىڭ كۇمىس جۇلدەگەرى.
قازاقستان قۇراماسىنا 2021 -جىلى 17 ناۋرىزدا سول كەزدەگى باس باپكەر تالعات بايسۋفينوۆتان شاقىرتۋ الدى. 28- ناۋرىزدا 2022-جىلعى الەم چەمپيوناتىنىڭ ىرىكتەۋ تۋرنيرىندە فرانسيامەن وتكەن ويىندا (0:2) 83-مينۋتتا رۋسلان ۆاليۋلليننىڭ ورنىنا شىقتى.
م. سامورودوۆ 2024-جىلعى ەۋروپا چەمپيوناتىنىڭ ىرىكتەۋ ساتىسىندا قازاقستان قۇراماسى نەگىزگى شابۋىلشىلارىنىڭ بىرىنە اينالىپ ۇلگەردى.