كيم چەن ىن وڭتۇستىك كورەيا مەن ا ق ش- تىڭ بىرلەسكەن جاتتىعۋلارىن سىنعا الدى
استانا. KAZINFORM – ك ح د ر باسشىسى وڭتۇستىك كورەيا مەن ا ق ش- تىڭ بىرلەسكەن اسكەري وقۋ-جاتتىعۋلارىن سىناپ، ولار سولتۇستىك كورەياعا قاتىستى «دۇشپاندىق» ۇستانىمدا ەكەنىن ايتتى، دەپ حابارلايدى Yonhap.
ونىڭ مالىمدەمەسى سەۋل مەن ۆاشينگتون سولتۇستىك كورەياعا قارسى بىرلەسكەن قورعانىس دايىندىعىن كۇشەيتۋ ءۇشىن جىل سايىنعى جازعى Ulchi Freedom Shield (UFS) جاتتىعۋلارىن باستاعان كەزدە ايتىلدى. جاتتىعۋلار دۇيسەنبىدە باستالىپ، 11 كۇن بويى 28-تامىزعا دەيىن جالعاسادى.
كيم چەن ىن سەۋل مەن ۆاشينگتوندى اۋقىمدى جاتتىعۋلار وتكىزۋ ارقىلى پحەنيانعا قارسى «دۇشپاندىق جانە قاراما-قايشىلىقتى ۇستانۋعا نيەتتەرىن اشىق ءبىلدىردى» دەپ ايىپتادى.
- ا ق ش پەن كورەيا رەسپۋبليكاسىنىڭ كۇشەيتىلگەن اسكەري وداعى - بۇل كۇش كورسەتۋ، سوعىس ءورتىن تۇتاتۋدىڭ ايقىن كورىنىسى، وڭىردە بەيبىتشىلىك پەن قاۋىپسىزدىكتى بۇزۋدىڭ كوزى، - دەپ كەلتىرەدى سولتۇستىك كورەيانىڭ ورتالىق اقپارات اگەنتتىگى (KCNA) كيمنىڭ ءسوزىن.
ول سونىمەن قاتار ۋاقىت وتكەن سايىن كۇردەلەنىپ كەلە جاتقان قاۋىپسىزدىك باعىتىنداعى جاعداي ق ح د ر- دىڭ يادرولىق الەۋەتىن جەدەل كەڭەيتۋدى تالاپ ەتەتىنىن جەتكىزدى. ول جاۋ جاعى وزدەرىنىڭ وقۋ-جاتتىعۋلارىنا يادرولىق ەلەمەنتتەردى قوسا وتىرىپ، اسكەري اليانس قۇرىپ جاتىر دەپ مالىمدەدى.
سولتۇستىك كورەيا سەۋل مەن ۆاشينگتون وتكىزىپ كەلە جاتقان بىرلەسكەن اسكەري جاتتىعۋلاردى بۇرىننان ايىپتايدى جانە ولاردى باسىپ الۋ دايىندىعى دەپ اتادى. ال وداقتاستار جاتتىعۋلاردىڭ قورعانىس ماقساتىندا ەكەنىن ايتادى.
سولتۇستىك كورەيا كوشباسشىسى مالىمدەمەسىن پرەزيدەنت لي چجە مەننىڭ بوستاندىق كۇنىنە وراي سويلەگەن سوزىندە سولتۇستىككە تاتۋلىققا بەيىم ەكەنىن كورسەتەتىن قادام جاساعاننان كەيىن جاريالادى.
ول سولتۇستىك كورەيانىڭ ساياسي جۇيەسىن قۇرمەتتەيتىنىن ايتتى. ول سونداي-اق شيەلەنىستى ازايتۋعا باعىتتالعان 2018-جىلى توقتاتىلعان كورەياارالىق اسكەري كەلىسىمدى قالپىنا كەلتىرۋ بويىنشا شارالار قابىلداۋعا ۋادە بەردى.
الايدا، سولتۇستىك كورەيا كوشباسشىسىنىڭ اپكەسى كيم ە چجون سولتۇستىك كورەيانىڭ وڭتۇستىك كورەيامەن قارىم-قاتىناسىن جاقسارتۋعا نيەتى جوق ەكەنىن ايتتى.
وسىعان دەيىن ماسكەۋدەن سولتۇستىك كورەياعا العاشقى تىكەلەي رەيس پحەنيانعا قونعانى تۋرالى جازدىق.