كىشى ارالعا 51 ميلليارد تەكشە مەتر سۋ جيناۋ مۇمكىن بە - ەكس-مينيستر جاۋاپ بەردى

استانا. KAZINFORM - بۇرىنعى مەليوراتسيا جانە سۋ شارۋاشىلىعى ءمينيسترى ناريمان قىپشاقبايەۆ كوكارال بوگەتىن 2 مەترگە كوتەرۋدى ۇسىنىپ وتىر. سۋ شارۋاشىلىعى سالاسىنىڭ ارداگەرى سولتۇستىك ارال تەڭىزىن ساقتاۋدىڭ ءوز نۇسقاسىن تانىستىردى. ونىڭ ايتۋىنشا، كىشى ارالعا 30 ميلليارد تەكشە مەتردەن ارتىق سۋ جينالمايدى.

- كىشى ارالعا 51 ميلليارد تەكشە مەتر سۋ جيناۋ مۇمكىن ەمەس. سۋ مول كەلگەننىڭ وزىندە 30 ميللياردتان ارتىق جيناي المايمىز. سەبەبى، سىرداريانىڭ جالپى سۋ كولەمى 37 ميلليارد تەكشە مەتر. بۇگىنگى تاڭدا وزەن بويىنداعى 4 مەملەكەتتىڭ سۋعا دەگەن سۇرانىسى 3 ەسە ارتىپ كەتتى. 100 ميلليارد سۋ سۇراپ وتىر. حالىق سانى كوبەيىپ جاتىر، جاڭادان زاۋىت-فابريكالار سالىنىپ جاتىر، ەلدى مەكەندەر بوي كوتەرىپ جاتىر. ودان ارتىق سۋ كەلەدى دەگەن بوس اڭگىمە، - دەدى بۇرىنعى سۋ شارۋاشىلىعى ءمينيسترى ناريمان قىپشاقبايەۆ.

سۋ سالاسىنىڭ ارداگەرى سىرداريا وزەنىنىڭ سۋ كولەمى تۇراقتى ەمەس ەكەنىن دە ايتادى. ءتىپتى 4-5 جىل قاتارىنان سۋى از جىلدار سيكلى قايتالانىپ وتىرعان.

- مەن «كىشى ارال» جوباسىن 1988 -جىلى باستاعانمىن. 2006 -جىلعا دەيىن ارال تەڭىزىنەن ءبىر دە ءبىر شاباق اۋلانعان جوق. بالىقشىلاردىڭ ءبارى جان-جاققا كوشىپ كەتتى. ءبىز 12 شاقىرىم بوگەتتى سالعالى تەڭىزدىڭ سۋ تۇشىلانىپ، قازىر جىلىنا 8-10 توننا بالىق اۋلايتىن بولدى. ارال قالاسىندا 8 بالىق زاۋىتى سالىندى. بوگەت ءوزىنىڭ كەرەك ەكەنىن دالەلدەدى. ەندى تەك سول بوگەتتى 2 مەترگە كوتەرىپ، بەرىكتىگىن نىعايتۋ كەرەك، - دەدى قازاقستاننىڭ ەڭبەك سىڭىرگەن گيدروتەحنيگى.

سۋ رەسۋرستارى جانە يرريگاتسيا مينيسترلىگىنىڭ مالىمەتىنشە، بۇگىنگى تاڭدا مينيسترلىك سولتۇستىك ارال تەڭىزىن ساقتاۋ جوباسىنىڭ بىرنەشە نۇسقاسىن پىسىقتاپ جاتىر. وسىعان قاتىستى ارال اۋدانىنىڭ تۇرعىندارىمەن قوعامدىق تالقىلاۋلار ءوتتى. جوبانى ىسكە اسىرۋ سولتۇستىك ارالدىڭ ساقتالۋىنا، سۋدىڭ تۇزدىلىعىنىڭ تومەندەۋىنە جانە تەڭىز باسسەينىندەگى ەكولوگيالىق جاعدايدىڭ جاقسارۋىنا ىقپال ەتەدى.

ايتا كەتەلىك ەلىمىزدە سيرەك جەر رەسۋرستارىمەن جۇمىس ىستەيتىن گەولوگتەردى دايارلاۋعا باسىمدىق بەرىلەدى.

اۆتور

نازىم بولەسوۆا