كەيبىر وڭىرلەر «ديپلوممەن - اۋىلعا» بارعان جاس ماماندارعا ءبىرجولعى تولەم ماسەلەسىن شەشپەي وتىر - د س م

استانا. KAZINFORM - دەنساۋلىق ساقتاۋ ءمينيسترى اقمارال ءالنازاروۆا ۇكىمەت وتىرىسىندا «ديپلوممەن - اۋىلعا» باعدارلاماسىنا بەيجاي قاراپ وتىرعان وڭىرلەر بار ەكەنىن ايتتى.

- اۋىلدىق ەلدى مەكەندەرگە جۇمىس ىستەۋ ءۇشىن كەلگەن دەنساۋلىق ساقتاۋ ماماندارىنا «ديپلوممەن - اۋىلعا» باعدارلاماسى اياسىندا الەۋمەتتىك قولداۋ شارالارى كورسەتىلەدى. سونداي-اق مەديتسينا قىزمەتكەرلەرىنىڭ مارتەبەسىن ارتتىرۋ ءۇشىن الەۋمەتتىك كەپىلدىكتەر مەن ىنتالاندىرۋشى تولەمدەر پاكەتى كەڭەيتىلدى. ماسەلەن، 2024 -جىلدان باستاپ اۋىلدىق جەرگە جۇمىسقا كەلەتىن اسا تاپشى ماماندىقتاردىڭ مەديتسينا قىزمەتكەرلەرىنە 100 ايلىق ەڭ تومەنگى جالاقى ياعني 8,5 ميلليون تەڭگە مولشەرىندە ءبىرجولعى اقشالاي تولەمدى كوزدەيتىن نورما ىسكە اسىرىلىپ جاتىر. الايدا بۇگىندە تولەمدەردى تولەۋ بويىنشا شەشىمدەر كەيبىر وڭىرلەردە ءالى كۇنگە دەيىن قابىلدانباعان، - دەدى ۆەدومستۆو باسشىسى.

سونداي-اق، ول «اۋىلداعى دەنساۋلىق ساقتاۋ جۇيەسىن جاڭعىرتۋ» ۇلتتىق پيلوتتىق جوباسىنىڭ اياسىندا سالىنۋعا ءتيىس بولعان 32 كوپبەيىندى ورتالىق اۋداندىق اۋرۋحانانىڭ التاۋى عانا سالىنىپ بىتكەنىن ايتتى.

- 2025 -جىلدىڭ سوڭىنا دەيىن تاعى 12 كوپبەيىندى ورتالىق اۋداندىق اۋرۋحانانى پايدالانۋعا بەرۋ جوسپارلانىپ وتىر. وعان 98 مەديتسينا قىزمەتكەرىن دايارلاپ جىبەرۋ جوسپارلانعان، - دەدى اقمارال ءالنازاروۆا.