كەيبىر كاسىپكەرلەرگە قاتىستى قىلمىستىق ءىس دەرەۋ توقتاتىلۋى مۇمكىن - زاڭ جوباسى
استانا. KAZINFORM - كەيبىر ەكونوميكالىق باپتاردى قىلمىستىق سيپاتتان ارىلتۋ اياسىندا كاسىپكەرلەرگە قاتىستى قىلمىستىق ءىس دەرەۋ توقتاتىلادى. بۇل تۋرالى بۇگىن ءماجىلىستىڭ جالپى وتىرىسىندا ءتيىستى زاڭ جوباسىن تالقىلاۋ كەزىندە دەپۋتات ابزال قۇسپان ايتتى.
پالاتا وتىرىسىندا دەپۋتات ولجاس قۇسپەكوۆ ەكونوميكالىق قۇقىق بۇزۋشى ارەكەتتەردى ودان ءارى قىلمىستىق سيپاتتان ارىلتۋعا قاتىستى سۇراق قويدى.
«قىلمىستىڭ كودەكستىڭ 4 بابى قىلمىستىق سيپاتتان ارىلتۋعا جاتادى. 2 باپ تولىق الىنىپ تاستالادى، 2 باپ ءىشىنارا قىلمىستىق سيپاتتان ارىلادى. اتاپ وتسەك، «كرەديتتى زاڭسىز الۋ نەمەسە بيۋدجەتتى ماقساتسىز پايدالانۋ» - قىلمىستىق كودەكستىڭ 219-بابى، بۋحگالتەرلىك ەسەپ پەن قارجىلىق ەسەپتىلىك تۋرالى زاڭناماسىن بۇزۋ - 241-باپ، سونداي- اق ەكونوميكيكالىق كونتراباندا - 234-باپ جانە كەدەندىك باجداردى، الىمداردى، سالىقتاردى ارنايى دەمپينگكە قارسى وتەماقى باجدارىن تولەۋدەن جالتارۋ - 236-باپ. وسىعان بايلانىستى مەنىڭ بىرنەشە سۇراعىم بار. ءبىرىنشىسى - نەگە وسى باپتاردى قىلمىستىق سيپاتتان ارىلتۋ قاجەت دەپ ەسەپتەدىڭىز. ولاردى قولدانۋ تاجىريبەسى قانداي؟ ەكىنشىسى - سوت شەشىمدەرى شىعىپ قويعان ىستەردى قايتەسىزدەر جانە مۇنداي كاسىپكەرلەردىڭ تاعدىرى نە بولماق؟»، - دەپ سۇرادى و. قۇسپەكوۆ.
ءوز كەزەگىندە دەپۋتات ابزال قۇسپان 2014 -جىلى قىلمىستىق جانە قىلمىستىق- پروتسەستىك كودەكس جاڭادان قابىلدانعانىن ايتتى.
«ودان كەيىن جاڭا قابىلدانعان قىلمىستىق كودەكستى تاجىريبەدە قولدانۋ بارىسىندا ءبىرقاتار ماسەلە انىقتالىپ، 2017 -جىلدان بەرى جالپى ەكونوميكالىق سيپاتتاعى قىلمىستىق ىستەردى دەكريمينيزاتسيالاۋ، ياعني قىلمىستىق سيپاتتان ارىلتۋ جۇمىستارى باستالدى. سول ۋاقىتتان بەرى بۇگىنگە دەيىن قازىرگى زاڭ جوباسىن ەسەپتەمەگەندە، جالپى 12 قىلمىستىق ءىس قىلمىسسىزداندىرۋعا ۇشىرادى. بۇل سول جۇمىستىڭ زاڭدى جالعاسى. ونىڭ ۇستىنە پرەزيدەنت قازاقستان حالقىنا جولداۋىندا جانە جارلىعىندا وسى ماسەلەگە توقتالدى. سوندىقتان قازىر ءسىز اتاپ وتكەن 2 باپ بار، ودان بولەك ءىشىنارا قىلمىستىق سيپاتتان ارىلتۋدىڭ تاعى 2 بابى بار. بۇل باپتاردى قىلمىستىق سيپاتتان ارىلتۋدا سوت تەرگەۋ پراكتيكاسىن ەسكەردىك»، - دەدى ا. قۇسپان.
ونىڭ ايتۋىنشا، وسى باپتاردى قىلمىسسىزداندىرۋ باعىتىندا كاسىپكەرلىك سۋبەكتىلەردىڭ، «اتامەكەن» ۇلتتىق كاسىپكەرلەر پالاتاسىنىڭ وكىلدەرى مەن بارلىق ۋاكىلەتتى ورگاننىڭ پىكىرلەرى ەسكەرىلگەن.
«ەكىنشى سۇراعىڭىزعا توقتالايىن. ەگەر وسى باپپەن بۇگىنگە دەيىن قىلمىستىق جاۋاپكەرشىلىككە تارتىلىپ جاتقان كاسىپكەرلەر بولسا، ولارعا قاتىستى قىلمىستىق ءىس دەرەۋ توقتاتىلادى. ەگەر بۇرىن سوتتالعان كاسىپكەرلەر بولسا، ولاردىڭ سوتتىلىعى جويىلادى، ياعني قانداي دا ءبىر قۇقىقتىق سالدارى بولمايدى»، - دەدى دەپۋتات.
بۇدان بۇرىن حابارلانعانداي، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكونوميكالىق قۇقىق بۇزۋشىلىقتاردى ودان ءارى قىلمىستىق سيپاتتان ارىلتۋ جانە زاڭسىز جولمەن الىنعان كىرىستەردى جىلىستاتۋعا جانە تەرروريزمدى قارجىلاندىرۋعا قارسى ءىس- قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى مەن ىلەسپە قۇجات ءبىرىنشى وقىلىمدا ماقۇلداندى.
اۆتور
رۋسلان عابباسوۆ