كەيبىر اكىمدەر مەن مينيسترلەر ينۆەستور تارتۋ ىسىنە ءجوندى اتسالىسپاي وتىر - مەملەكەت باسشىسى

استانا. KAZINFORM - پرەزيدەنت قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا ۇكىمەت جانىنداعى ينۆەستيتسيا شتابىنا نەگە اۋقىمدى قۇزىرەت بەرىلگەنىن ايتتى.

«دۇنيە جۇزىندە ينۆەستيتسياعا تالاس ءورشىپ تۇرعان كەزدە ەلگە قارجى تارتۋ ءۇشىن «ءدال وسى جەردە جانە ءدال قازىر» قاعيداسى بويىنشا شەشىم قابىلداۋ - ەڭ قاجەت شارا. سوندىقتان ۇكىمەت جانىنداعى ينۆەستيتسيا شتابىنا اۋقىمدى قۇزىرەت بەرىلدى. بۇل قادام مەتالدى تەرەڭ وڭدەۋ، مۇناي- گاز- كومىر حيمياسى، تۋريزم، ەنەرگەتيكا جانە ماشينا جاساۋ سياقتى ماڭىزدى سالالارداعى جوبالاردى جۇزەگە اسىرۋ قارقىنىن ارتتىرۋعا جول اشتى. ەكونوميكاعا سالىنعان تىكەلەي ينۆەستيتسيا كولەمىن ازايتىپ الماۋ ءۇشىن وسى باعىتتاعى جۇمىستى كۇشەيتۋ كەرەك. كەيبىر اكىمدەر مەن مينيسترلەر ينۆەستور تارتۋ ىسىنە ءجوندى اتسالىسپاي وتىرعانىن اتاپ وتكىم كەلەدى. ۇكىمەت بۇل شارۋانى رەتكە كەلتىرۋگە ءتيىس»، - دەدى قاسىم-جومارت توقايەۆ.

پرەزيدەنت مەملەكەتتىك-جەكەمەنشىك ارىپتەستىك ارقىلى ىسكە اسىرىلاتىن جوبالاردى ساپالى ازىرلەۋ كەرەكتىگىن ەسكە سالدى.

«اسىرەسە، حالىقارالىق قارجى ينستيتۋتتارى قاتىساتىن جوبالارعا باسا نازار اۋدارۋ كەرەك. ۇكىمەتكە حالىقارالىق قارجى ۇيىمدارى مەملەكەتتىك-جەكەمەنشىك ارىپتەستىك تاسىلىمەن قارجىلاندىرىپ، تولىق جۇزەگە اسىراتىن اۋقىمدى جوبالاردىڭ ءتىزىمىن جاساۋدى تاپسىرامىن. مەن بيىل مامىر ايىندا «ەكونوميكانى ىرىقتاندىرۋ شارالارى تۋرالى» جارلىققا قول قويدىم. بۇل قۇجاتتا كورسەتىلگەن تالاپتار مۇلتىكسىز ورىندالۋعا ءتيىس»، - ەدى مەملەكەت باسشىسى.

ۇلتتىق قور - ۇزاق مەرزىمگە ارنالعان ماكروەكونوميكالىق تۇراقتىلىقتى قامتاماسىز ەتەتىن اسا ماڭىزدى قۇرال.

«ەندى ۇلتتىق قوردىڭ رولىنە جەكە توقتالايىن. قوردىڭ قاراجاتىن، ەڭ الدىمەن، مەملەكەت مۇددەسى ءۇشىن، ياعني ەلىمىزدىڭ ستراتەگيالىق ماقساتتارىن جۇزەگە اسىرۋ ءۇشىن پايدالانۋ قاجەت»، - دەدى قاسىم- جومارت توقايەۆ.

وسى ورايدا پرەزيدەنت ۇلتتىق قور شەتەلدىك قارجى ينستيتۋتتارىنا قىزمەت ەتپەۋى كەرەك ەكەنىن اتاپ ءوتتى.

«ۇلتتىق قور - ۇزاق مەرزىمگە ارنالعان ماكروەكونوميكالىق تۇراقتىلىقتى قامتاماسىز ەتەتىن اسا ماڭىزدى قۇرال. سوندىقتان ونى ءتيىمدى باسقارۋ قاجەت»، - دەپ تاپسىردى مەملەكەت باسشىسى.

ايتا كەتەيىك، بۇعان دەيىن پرەزيدەنت ۇكىمەت بيۋدجەت تاپشىلىعىنىڭ ورنىن تولتىراتىن قارجى كوزىن تابۋ ءۇشىن ءتيىمدى كومپەنساتسيالىق تاسىلدەر ويلاستىرۋى قاجەت ەكەنى ايتقان ەدى.

اۆتور

رۋسلان عابباسوۆ