كەيبىر ادامداردىڭ تەز اشۋلانۋىنىڭ سەبەبى نەدە؟

استانا. قازاقپارات - ءبىر قاراعاندا ماڭىزى جوق سۇراق بولىپ كورىنۋى مۇمكىن. الايدا ءومىرىمىزدىڭ بارلىعى دەرلىك قارىم-قاتىناستىڭ نەگىزىندە قۇرالاتىندىقتان، كەز كەلگەن اداممەن ءتىل تابىسا بىلگەن ءجون.

بۇگىنگى تاڭدا «تابيعاتىنان جانجال شىعارعىش كەلەتىن جاندار كورىنگەن اداممەن ۇرىسىپ جۇرەدى جانە ول مىنەزى ەش وزگەرمەيدى» دەگەن پىكىر قالىپتاسقان.

الايدا بۇل پىكىر قاتە. اشۋ ەشكىمگە جايلىلىق سىيلاپ كورگەن ەمەس. ادام بالاسى جانجالعا تاپ بولعان كەزدە اشۋعا بوي الدىرۋىنىڭ سەبەبى نەدە؟ ماسەلە ادام بالاسىنىڭ جانى مەن تانىنە قاجەتتى قاجەتتىلىكتەردىڭ وتەلمەۋىندە. امەريكاندىق پسيحولوگ ابراحام ماسلوۋ كەز كەلگەنىمىزدە كەزدەسەتىن 5 قاجەتتىلىك دەڭگەيىن اتاپ كورسەتەدى. ولار:

ءبىرىنشى دەڭگەي اعزانىڭ ءومىر ءسۇرۋى ءۇشىن ارنالعان قاجەتتىلىكتەر. بۇندا تاماق، ۇيقى، دەمالىس سەكىلدى قاجەتتىلىكتەر كىرەدى. وسىلار جوق بولعان جاعدايدا ادام بالاسى ءوزىن ءالسىز سەزىنىپ، جىلدام قوزعالىستان قالادى. وسى قاجەتتىلىكتەرى بارىنشا وتەلگەن ادامداردى جەك كورە باستايدى.

ەكىنشى دەڭگەي قاۋىپسىزدىكتى قامتاماسىز ەتۋ. بولاشاققا جوسپار قۇرىپ بۇگىنگى كۇنمەن ءومىر ءسۇرۋى ءۇشىن قاۋىپسىزدىكتى قامتاماسىز ەتۋى كەرەك. بۇل ادامداردىڭ شىنايى كەدەرگىلەردەن قورعانعىسى كەلگەندىگىنەن تۋعان. ەكىنشى دەڭگەي وتەلمەگەن جاعدايدا ادامنىڭ بويىن قورقىنىش پەن ۇرەي بيلەي باستايدى.

ءۇشىنشى دەڭگەي الەۋمەتتىك ورتانى قاجەتسىنۋ. ياعني وتباسىلىق ومىردە، دوستاردىڭ تاراپىنان، بەيتانىس ادامداردان بولسىن وزىنە دەگەن جىلى قارىم-قاتىناس قاجەت. وتەلمەگەن جاعدايدا جالعىزدىق قاسىرەتىنە تاپ بولادى.

ءتورتىنشى دەڭگەي قورشاعان ورتانىڭ تۇلعا رەتىندە مويىنداۋىمەن تىكەلەي بايلانىستى. وعان بيلىك، اتاققۇمارلىق، باسقارۋ ىسىنە ارالاسۋ، ماراپاتتارعا يە بولۋ جاتادى. ولار وتەلمەگەن جاعدايدا ادام ىشتەي قۇلدىراپ، قوعامنان ءبىرجولاتا الىستايدى.

بەسىنشى دەڭگەي ادامنىڭ ءوزىن كورسەتۋىمەن، ومىردە ءوزى جاقسى مەڭگەرگەن سالا بويىنشا ورىن تابا بىلۋىمەن تىكەلەي بايلانىستى. بۇل دەڭگەي وتەلمەگەن جاعدايدا وزگەلەردەن ۇيالىپ، ءوزىن كىنالى سەزىنەدى. وسى قاجەتتىلىكتەردىڭ بارلىعى وتەلگەن كەزدە عانا ادام بالاسى شىنايى باقىتتى بولادى.

كەيبىر ادامداردىڭ تەز اشۋلانۋىنىڭ سەبەبى نەدە؟

- ادامداردىڭ اشۋلانشاقتىعى جوعارىدا كەلتىرگەن قاجەتتىلىكتەردىڭ وتەلمەۋىمەن تىكەلەي بايلانىستى. اقشا جوق بولعاندىقتان، قارنى اشىپ، سۋىق كۇندە كيىمسىز مۇزداپ ءجۇرۋى مۇمكىن. ياعني، ماتەريالدىق جاعدايعا تىكەلەي بايلانىستى؛

- قارىم-قاتىناستىڭ جەتىسپەۋشىلىگىنەن جاڭا تانىستارمەن دۇرىس ارالاسا الماۋى مۇمكىن؛

- قورشاعان ورتاسى مويىنداپ، سىيلامايتىن ادام شىعارماشىلىق بەلسەندىلىكتەن ايىرىلىپ، ومىردە ءوز ورنىن تابا الماي قالادى.

جانجالدى الدىن الۋعا كومەكتەسەتىن گلەب جەگلوۆتىڭ 5 ەرەجەسىن ۇسىنامىز:

1. ادامدارمەن سويلەسكەن كەزدە كوبىرەك كۇلىڭىز. ولار ءسىزدى بۇل قاسيەتىڭىز ءۇشىن جاقسى كورۋى مۇمكىن.

2. اڭگىمەلەسۋشىڭىزدى ىقىلاسپەن تىڭداپ، ءوزى تۋرالى كوبىرەك ايتۋىنا مۇمكىندىك بەرىڭىز.

3. وعان قىزىق بولاتىن تاقىرىپتى تاڭداي ءبىلىڭىز.

4. ادام بالاسىنا جاعىمپازدانىپ، جاناشىرلىق تانىتۋدىڭ ورنىنا شىنايىلىق تانىتىپ، جان-دۇنيەسىنە ەنۋگە تىرىسىڭىز.

5. جاقسى ءسوزدى كوتەرىڭكى-كوڭىل كۇيمەن جەتكىزە ءبىلۋىڭىز كەرەك. كوپ نارسە داۋىس ىرعاعىنا دا بايلانىستى.

اشۋلانۋعا جول بەرمەۋدىڭ تاسىلدەرى:

1) اڭگىمەلەسۋشىمەن بايلانىس ورناتۋ؛

2) سىزگە ايتپاق بولعانىن مۇقيات تىڭداۋ؛

3) ءوز پىكىرىڭىزدى ءبىلدىرىپ، كومەك كەرەك بولسا، قول ۇشىن بەرۋ.

بۇلاردىڭ ءبىرىن رەتكە كەلتىرمەي جاتىپ، ەكىنشىسىنە ءوتۋدىڭ قاجەتى جوق.

بايلانىستى قالاي ورناتۋعا بولادى؟

كەلەسى ءبىر اداممەن بايلانىس ورناتۋ ءۇشىن كوپ ۋاقىتتىڭ قاجەتى جوق. باستىسى ءبىر-بىرىڭىزگە قىزىعۋشىلىق تانىتۋلارىڭىز قاجەت.

1) كوزبە كوز ءتۇيىسۋ. كوز ءتۇيىستىرۋدىڭ ارقاسىندا وزگە ادامنىڭ سەنىمىنە كىرۋگە بولادى.

2) كورىسە سالىسىمەن كۇلىمسىرەپ، اڭگىمە بارىسىندا دا كوتەرىڭكى كوڭىل-كۇيمەن وتىرۋعا تىرىسىڭىز.

3) ءسوز ساپتاۋىڭىزعا، ءوزىڭىزدى ۇستاي بىلۋىڭىزگە ءمان بەرىڭىز.

4) الاقاندارىڭىزدى اشىق ۇستاۋعا، ورىندىقتا تىك وتىرۋعا تىرىسىڭىز. اڭگىمەلەسۋشىڭىزگە دەگەن سىي-قۇرمەتىڭىزدى بىلدىرگىڭىز كەلسە، قالتاعا قولدى سالۋ نەمەسە ايقاستىرىپ ۇستاۋ سەكىلدى ادەتتەردەن اۋلاق بولىڭىز.

5) ارا-قاشىقتىق ماسەلەسىن دە ەسكەرىڭىز.

مۇقيات تىڭداۋ ءۇشىن نە ىستەۋ كەرەك؟

1) سويلەمەۋگە تىرىسىڭىز

سويلەپ وتىرىپ تىڭداۋ مۇمكىن ەمەس. ۋاقىتتىڭ ءوتىپ بارا جاتقانىنا ءمان بەرمەستەن ۇستامدىلىق تانىتۋعا تىرىسىڭىز. تىڭداپ وتىرعاندىعىڭىزدى قيمىل-قوزعالىستارىڭىز ارقىلى ءبىلدىرىپ وتىرىڭىز. اقىل سۇراماعان ادامعا ونى ايتىپ اۋرە بولماڭىز. بىرەۋدى سىرتىنان جامانداپ، ءسوز تالاستىرۋدىڭ دا قاجەتى جوق. پىكىرسايىستا جەڭگەن ادام شىندىعىندا جەڭىلەتىندىگىن ەستە ساقتاڭىز.

2) انىقتاڭىز

كەيدە جاقىن ادامدارىڭىزدىڭ مىنەزىن تۇسىنبەي جاتساڭىز، تەرەڭ زەرتتەۋلەر جۇرگىزۋدىڭ قاجەتى جوق. بار بولعانى ماسەلەنىڭ باسىن اشىپ، انىقتاپ كورۋگە تىرىسىڭىز.

3) پەريفرازدار ايتىپ وتىرىڭىز. ياعني اڭگىمەلەسۋشىڭىزدىڭ ايتقاندارىن قوشتاپ، قايتالاپ وتىرىڭىز. مىسالى، «مەنىڭ تۇسىنۋىمشە...، «ءسىزدىڭ ايتقانىڭىزدان تۇسىنگەنىم...» سەكىلدى تىركەستەردى پايدالانىڭىز.

4) ىم-يشارا تىلىنە دە ءمان بەرىڭىز. كەيدە ادامعا قاراعاندا قيمىل-قوزعالىسى دۇرىس اقپارات بەرەدى.

دايىنداعان: قارلىعا بۇيەنباي

Massget.kz