كونفەرەنتسياعا مەملەكەتتىك ورگانداردىڭ وكىلدەرى، وتاندىق جانە شەتەلدىك كيبەرقاۋىپسىزدىك ماماندارى، ستۋدەنتتەر مەن وقۋشىلار قاتىسىپ جاتىر.
ۇيىمداستىرۋشىلاردىڭ ايتۋىنشا، بيىل شاراعا شامامەن 10 مىڭ ادام كەلمەك.
قازاقستاننىڭ سيفرلاندىرۋ قارقىنى ارتقان سايىن اقپاراتتىق قاۋىپسىزدىكتىڭ ماڭىزى دا كۇشەيىپ وتىر. قازاقستان ب ۇ ۇ-نىڭ ەلەكتروندى مەملەكەتتىك قىزمەتتەردى دامىتۋ رەيتينگىندە العاشقى وندىققا كىرەتىن ەلدەردىڭ قاتارىندا. وسىعان بايلانىستى تسيفرلىق جۇيەلەردى قورعاۋ ماسەلەسى مەملەكەتتىك ورگاندار ءۇشىن دە ماڭىزدى باعىت بولىپ وتىر.
ق ر ۇلتتىق ەكونوميكا ءمينيسترىنىڭ ورىنباسارى بەكبولات مولدابەكوۆتىڭ ايتۋىنشا، مينيسترلىك اقپاراتتىق قاۋىپسىزدىك سالاسىنداعى جاڭا تەحنولوگيالار مەن ۇردىستەردى تۇراقتى باقىلاۋدا ۇستايدى.
- قازاقستان سيفرلاندىرۋ بويىنشا الدىڭعى قاتارلى ەلدەردىڭ ءبىرى. ب ۇ ۇ رەيتينگىندە مەملەكەتتىك قىزمەتتەر بويىنشا سەگىزىنشى ورىندامىز. وسى پوزيتسيانى ۇستاپ تۇرۋ جانە ودان ءارى جاقسارتۋ ءۇشىن اقپاراتتىق قاۋىپسىزدىك وتە ماڭىزدى. سوندىقتان مۇندا جاڭا دۇنيەلەردى كورۋگە، جاڭا تەحنولوگيالاردى زەرتتەۋگە كەلدىم، - دەدى ول.
ونىڭ ايتۋىنشا، فورۋم بارىسىندا اقپاراتتىق قاۋىپسىزدىك سالاسىنداعى جاڭا شەشىمدەر، قاۋىپ-قاتەرلەر جانە ولاردان قورعانۋ تاسىلدەرى قاراستىرىلادى. سونداي-اق شارادا ستارتاپتار مەن جاڭا تەحنولوگيالىق ازىرلەمەلەر تانىستىرىلادى.
- بىزدەگى اقپاراتتىق قاۋىپسىزدىك باسقارماسى وسى باعىتتاعى ترەندتەردى، جاڭا تەحنولوگيالاردى تۇراقتى باقىلاپ وتىرادى. مۇندا ۇسىنىلاتىن شەشىمدەردى زەرتتەپ، قاجەت بولعان جاعدايدا ءوز جۇمىسىمىزعا ەنگىزەتىن بولامىز،- دەدى بەكبولات مولدابەكوۆ.
KazHackStan ۇيىمداستىرۋشىسى، ساركا ۆيتسە-پرەزيدەنتى رۋسلان تۋرگۋلدينوۆتىڭ ايتۋىنشا، كونفەرەنتسيا 2017 -جىلدان بەرى وتكىزىلىپ كەلەدى. بۇعان دەيىن شارا الماتىدا ۇيىمداستىرىلسا، بيىل العاش رەت استاناعا كوشىرىلگەن.
- بيىل شامامەن 10 مىڭ قاتىسۋشى كۇتىپ وتىرمىز. سەگىز جىل قاتارىنان كونفەرەنتسياعا قاتىسۋشىلار مەن ساراپشىلار سانى ارتىپ كەلەدى. مەملەكەتتىك ورگانداردىڭ جوعارى لاۋازىمدى وكىلدەرىنەن باستاپ ستۋدەنتتەرگە دەيىن ءارتۇرلى اۋديتوريا قاتىسادى،-دەدى رۋسلان تۋرگۋلدينوۆ.
ونىڭ ايتۋىنشا، كونفەرەنتسيانىڭ باستى ەرەكشەلىگى - كيبەرقاۋىپسىزدىك ماسەلەلەرىن وقيعالار مەن پراكتيكالىق مىسالدار ارقىلى تالقىلاۋ.
ءبىرىنشى كۇنى مەملەكەت مەن بيزنەسكە قاتىستى اقپاراتتىق قاۋىپسىزدىك ماسەلەلەرىنە باسىمدىق بەرىلسە، ەكىنشى كۇن تەحنيكالىق تاقىرىپتارعا ارنالادى. ساراپشىلار كيبەرشابۋىلداردى تالداپ، شابۋىلدى قالاي توقتاتقانىن نەمەسە بەلگىلى ءبىر جۇيەدەگى وسالدىقتى قالاي انىقتاعانىن تۇسىندىرەدى.
KazHackStan 2026 اياسىندا وقۋشىلار اراسىندا دا ارنايى كيبەرقاۋىپسىزدىك جارىستارى ۇيىمداستىرىلىپ جاتىر. ونىڭ ءبىرى - قازاقستان قۇراماسىن حالىقارالىق كيبەرقاۋىپسىزدىك وليمپياداسىنا ىرىكتەۋ.
ۇيىمداستىرۋشىلاردىڭ مالىمەتىنشە، بيىلعى فينالدىق كەزەڭنەن وتكەن وقۋشىلار كەلەسى جىل بويى دايىندىقتان ءوتىپ، 2027-جىلى يتاليادا وتەتىن حالىقارالىق وليمپيادادا قازاقستان اتىنان باق سىنايدى.
كونفەرەنتسياعا قازاقستانمەن قاتار وزبەكستان، قىرعىزستان، ازەربايجان، اقش جانە ەۋروپانىڭ ءبىرقاتار ەلدەرىنەن ساراپشىلار قاتىسىپ وتىر.
ايتا كەتەيىك، بۇعان دەيىن، قۇرىلتايدا قىلمىسكەرلەردى مەملەكەتارالىق ىزدەۋ جانە كيبەرقىلمىس تاقىرىبىنداعى جاڭا كەلىسىمدەر جايلى جازعان ەدىك.