ەكىباستۇزدا ساۋدا ءۇيىنىڭ توبەسى وپىرىلىپ قالدى
استانا. KAZINFORM - وقيعا ورنىندا شۇعىل قىزمەتتەر جۇمىس ىستەپ جاتىر. بۇل تۋرالى ت ج م باسپا ءسوز قىزمەتى حابارلادى.
- ەكىباستۇز قالاسى م. اۋەزوۆ كوشەسى بويىنداعى ساۋدا ۇيلەرىنىڭ بىرىندە 150 شارشى مەتر الاڭدا اسپالى توبە وپىرىلىپ قالعان، - دەلىنگەن ت ج م حابارلاماسىندا.
وقيعا ورنىندا شۇعىل قىزمەتتەر جۇمىس ىستەپ جاتىر.
ەكىباستۇزدا «Maxi Mall» ساۋدا ءۇيىنىڭ عيمارات ىشىندە اسپالى توبە قۇلاپ تۇسۋىنە بايلانىستى 5 ادامنىڭ زارداپ شەككەن انىقتالدى. وقيعادان سوڭ ەكىباستۇز قالالىق اۋرۋحاناسىنىڭ قابىلداۋ بولمەسىنە 5 ادام ءوز بەتىنشە جۇگىنگەن. ولاردىڭ ۇشەۋى - بالا.
وقيعا كەزىندە «Maxi Mall» ساۋدا ورتالىعىندا بولعان 5 ادام ەكىباستۇز قالالىق اۋرۋحاناسىنا ءوز بەتىنشە جۇگىنگەن. ولاردىڭ ىشىندە 2008, 2009 -جىلدارى تۋعان ءۇش بالا بار. زارداپ شەككەندەردى اۋرۋحاناعا جاتقىزۋدىڭ قاجەتى بولمادى. دارىگەرلەر قاراپ، العان جاراقاتتارىنا امبۋلاتوريالىق ەم تاعايىندالدى، - دەپ حابارلادى پاۆلودار وبلىستىق دەنساۋلىق ساقتاۋ باسقارماسىنان.
ال وڭىرلىك توتەنشە جاعدايلار دەپارتامەنتى وقيعانىڭ ءمان- جايىن تولىق انىقتاۋ ءۇشىن ساۋدا ءۇيى جابىلعانىن ءمالىم ەتتى.
ەكىباستۇزداعى Maxi Mall ساۋدا - ويىن- ساۋىق ورتالىعى 2007 -جىلى اشىلعان. ءتورت قاباتتى، جالپى اۋماعى 28 مىڭ شارشى مەتر. ورتالىقتا كوپتەگەن ءدامحانا- مەيرامحانالار، سۋپەرماركەتتەر، فۋدكورت، ەلەكتر تەحنيكالار دۇكەنى، كينوتەاتر، بانك فيليالى، بالالاردىڭ ويىن الاڭدارى جانە ت. ب. بورنالاسقان. مۇندا ايىنا شامامەن 300 مىڭنان استام ادام كەلەدى.
ساۋدا ورتالىعىندا بۇعان دەيىن بىرنەشە وقىس وقيعا بولعان.
2012 -جىلى عيماراتقا جارىلعىش قويىلدى دەگەن جالعان اقپاراتتان 400 ادام ەۆاكۋاتسيالانعان.
ال 2023 -جىلدىڭ قىركۇيەك ايىندا ونداعى كيىم دۇكەندەرىنىڭ بىرىندە ءورت شىعىپ، 57 شارشى مەتر اۋماقتى وت شالعان.
عالامتورداعى اشىق اقپارات كوزدەرىنە سۇيەنسەك، Maxi Mall ساۋدا - ويىن- ساۋىق ورتالىعى «Business Challenge Ltd» ج ش س-نىڭ يەلىگىندە. كومپانيا باسشىسى تيمەربەكوۆا ءاسيا تاستىمبەك قىزى دەپ كورسەتىلگەن.
ەسكە سالا كەتەيىك، بۇگىن تۇستەن كەيىن ەكىباستۇزدا «Maxi Mall» ساۋدا ورتالىعىنىڭ ىشىندە توبە وپىرىلىپ ءتۇستى. وپىرىلعان جەردىڭ اۋماعى شامامەن 150 شارشى مەتر.
- 16-اقپاندا «Maxi Mall» ساۋدا ءۇيىنىڭ عيمارات ىشىندە اسپالى توبە قۇلاپ تۇسۋىنە بايلانىستى «103» جەلىسى بويىنشا «112» ديسپەتچەرىنەن شاقىرۋ ءتۇستى. جەدەل جاردەم بريگاداسى وقيعا ورنىنا 7 مينۋت ىشىندە جەتتى. قازىرگى ۋاقىتتا جەدەل مەديتسينالىق جاردەم بريگاداسى وقيعا ورنىندا كەزەكشىلىكتە. زارداپ شەككەندەر جوق، - دەدى پاۆلودار وبلىسى دەنساۋلىق ساقتاۋ باسقارماسىنان.
ەسكە سالساق كەشە تاراز قالاسىندا ساۋدا ورتالىعىنا جارىلعىش زات قويىلدى دەگەن حابار تاراپ، ونداعى ادامدار ەۆاكۋاتسيالانعان ەدى. جامبىل وبلىسى پ د تەكسەرۋ ناتيجەسىندە ەشقانداي جارىلعىش زات تابىلماعانىن ايتتى.