ەكى ەل پرەزيدەنتتەرى شياننان تاشكەنتكە كەلگەن كونتەينەرلىك پويىزعا قاتىستى سالتاناتتى شارانى تاماشالادى

 استانا. KAZINFORM - ەكى ەل پرەزيدەنتتەرى قىتاي - قازاقستان -وزبەكستان باعىتىنداعى كونتەينەرلىك پويىزدىڭ سياننان تاشكەنتكە كەلۋىنە وراي ۇيىمداستىرىلعان سالتاناتتى شاراعا قاتىستى. بۇل تۋرالى اقوردانىڭ باسپا ءسوز قىزمەتى ءمالىم ەتتى.

قازاقستاننىڭ كولىك ءمينيسترى مارات قارابايەۆ پەن وزبەكستاننىڭ كولىك ءمينيسترى يلحوم ماكحاموۆ ەكى ەلدىڭ كولىك- ترانزيت مۇمكىندىكتەرىن كەڭەيتۋ باعىتىندا جۇرگىزىلگەن بىرلەسكەن جۇمىستار تۋرالى باياندادى.

بيىلعى ءساۋىر ايىندا حيۋا قالاسىندا قىتاي - قازاقستان - وزبەكستان باعىتىندا جۇك تاسىمالىن ۇيىمداستىرۋ جانە ترانس- اۋعان باعىتىن دامىتۋ بويىنشا ۋاعدالاستىقتارعا قول جەتكىزىلگەن بولاتىن. سونىڭ شەڭبەرىندە جۇكتەردى جەتكىزۋ مەرزىمى قىسقاردى. كونتەينەرلى پويىز 4486 شاقىرىم جولدى 5 تاۋلىكتىڭ ىشىندە ءجۇرىپ ءوتتى. بۇل - رەكوردتىق كورسەتكىش. جۇك پويىزى سيان قالاسىنداعى پورتتان قازاقستان اۋماعى ارقىلى تاشكەنتكە جونەلتىلدى.

«ەلىمىزدىڭ قىتايداعى تەرمينالدارىنىڭ مۇمكىندىكتەرىن پايدالانۋ جانە قازاقستان مەن وزبەكستاننىڭ تەمىرجول اكىمشىلىكتەرىنىڭ شەكارا ماڭىنداعى ينفراقۇرىلىمدى نىعايتۋ بويىنشا ناتيجەلى ىنتىماقتاستىعى تاسىمالداۋ مەرزىمىن قىسقارتۋعا ىقپال ەتتى. بىلتىر ەكى ەل اراسىنداعى جۇك تاسىمالىنىڭ كولەمى 31 ميلليون توننادان اسىپ، 2022 - جىلمەن سالىستىرعاندا 17,2 پايىزعا ۇلعايدى»، - دەلىنگەن حابارلامادا.