ءمينيستردىڭ ايتۋىنشا، قازاقستانعا اكەلىنگەن جولبارىستاردىڭ تابيعاتقا جىبەرىلۋ رەتى كەزدەيسوق تاڭدالماعان. الدىمەن ۇرعاشى جولبارىس بوساتىلعان. ويتكەنى وعان جاڭا ورتاعا بەيىمدەلىپ، ءوز اۋماعىن بەلگىلەۋگە جانە كوبەيۋگە دايىندالۋعا ۋاقىت قاجەت.
- قازىرگى تاڭدا ەكى جولبارىستىڭ اراسىندا 20-25 شاقىرىم بار. ارينە، ولار ءبىر-ءبىرىن تابادى دەپ ويلايمىز. ءبىز ۇرعاشى جولبارىستى ءبىرىنشى جىبەردىك. سەبەبى ول الدىمەن ءوز اۋماعىن بەلگىلەپ، جاڭا ورتاعا بەيىمدەلىپ، كوبەيۋگە دايىن بولۋى كەرەك. ول ءوز ءيىسىن قالدىرادى، كەيىن اتالىق جولبارىس ونى تابۋى ءتيىس. ءبىز سوعان سەنەمىز، — دەدى الىبەك قۋانتىروۆ.
دەگەنمەن ەكى جىرتقىشتىڭ ناقتى قاشان كەزدەسەتىنى ازىرگە بەلگىسىز. ماماندار ولاردىڭ جاڭا ورتاعا بەيىمدەلۋىن جانە تابيعاتتاعى قوزعالىسىن باقىلاپ وتىر.
ايتا كەتەيىك، بۇعان دەيىن قازاقستانعا اكەلىنگەن العاشقى جولبارىس ءوز بەتىنشە اڭ اۋلاپ جۇرگەنى حابارلاندى.