Omara ويىن نەمەسە قوسىمشاداعى وقيعالارمەن سينحروندالىپ جۇمىس ىستەيدى. بەلگىلى ءبىر ورىن، زات نەمەسە كەيىپكەردىڭ ارەكەتى پايدا بولعان كەزدە قۇرىلعى ءتيىستى ءيىستى اۆتوماتتى تۇردە تاراتادى. ءوندىرۋشىنىڭ مالىمەتىنشە، ءيىس 200 ميلليسەكۋندتان از ۋاقىتتا شىعىپ، شامامەن جارتى سەكۋند ىشىندە باسىلادى. سونىڭ ارقاسىندا ءبىر كورىنىستىڭ ءيىسى كەلەسى كورىنىسكە ارالاسپايدى. قۇرىلعىنى كومپيۋتەرگە جانە ۆيرتۋالدى شىنايىلىق جۇيەسىنە سىمدى نەمەسە سىمسىز تاسىلمەن قوسۋعا بولادى. كولەمى AirPods Pro قۇلاققابىنىڭ قورابىنداي، ال سالماعى شامامەن 85 گرامم. ونى كومپيۋتەردىڭ جانىنا قويۋعا نەمەسە VR- شلەمگە بەكىتۋگە بولادى.
اۋىستىرمالى كارتريدجدە 16 نەگىزگى ءيىس بار. ولاردىڭ قاتارىندا قاراعاي، گۇل، تەڭىز اۋاسى، تسيترۋس، دىمقىل توپىراق، اعاش، ءتۇتىن جانە دامدەۋىش يىستەرى كەزدەسەدى. گادجەت ءبىر مەزەتتە ءۇش ءيىستى ارالاستىرا الادى. Omara Scent Studio قوسىمشاسى ارقىلى ولاردىڭ قارقىندىلىعىن رەتتەۋگە نەمەسە قاجەت ەمەس يىستەردى وشىرۋگە مۇمكىندىك بار.
ازىرلەۋشىلەردىڭ ايتۋىنشا، ءبىر كارتريدج 100 ساعاتتان استام ويىن ويناۋعا نەمەسە ءار ارنا بويىنشا 3 مىڭنان استام ءيىس ءيمپۋلسىن تاراتۋعا جەتەدى. اۋىستىرمالى كارتريدجدىڭ باعاسى 40 دوللار. كومپانيا قولدانىلاتىن قوسپالاردىڭ IFRA حالىقارالىق ستاندارتتارىنا جانە ەۋروپالىق وداقتىڭ اللەرگەندەرگە قاتىستى تالاپتارىنا سايكەس كەلەتىنىن مالىمدەدى.
ويىن ازىرلەۋشىلەرى Unity جانە Unreal Engine پلاتفورمالارىنا ارنالعان ارنايى قۇرالدار ارقىلى ءوز جوبالارىنا يىستەردى قوسا الادى. قازىردىڭ وزىندە Minecraft جانە Stardew Valley ويىندارىنا ارنالعان موديفيكاتسيالار ازىرلەنىپ جاتىر. دەگەنمەن گادجەت بارلىق ويىندا بىردەن جۇمىس ىستەمەيدى. ول ءۇشىن ويىنعا رەسمي قولداۋ نەمەسە ارنايى موديفيكاتسيا قاجەت.
جوبا بۇعان دەيىن Kickstarter پلاتفورماسىندا جوسپارلانعان 15 مىڭ دوللاردىڭ ورنىنا 42,1 مىڭ دوللار جيناعان. قازىرگى ۋاقىتتا Omara قۇرىلعىسىنا 649 دوللارعا الدىن الا تاپسىرىس بەرۋگە بولادى. العاشقى جەتكىزىلىمدەر 2026 -جىلدىڭ سوڭىنا جوسپارلانعان.