2026-جىلدىڭ العاشقى 10 ايىندا ەلدىڭ جالپى ىشكى ءونىمى %4,5 عا وسكەن. بۇل تۋرالى ۇكىمەت ءمالىم ەتتى.
قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ حالىقارالىق ۆاليۋتا قورى (ح ۆ ق) ميسسياسىنىڭ قازاقستان بويىنشا باسشىسى امينا لارەشپەن كەزدەستى. جيىندا قور ميسسياسىنىڭ قورىتىندىسى شىعارىلىپ، قازاقستان مەن حۆق اراسىنداعى ءوزارا ءىس-قيمىلدىڭ جاقىن جانە ورتا مەرزىمدى كەزەڭدەگى پەرسپەكتيۆالارى تالقىلاندى.
پرەمەر-مينيستر ەلىمىزدە جۇرگىزىلگەن ينستيتۋتسيونالدىق رەفورمالار تۋرالى حاباردار ەتتى. شىلدە ايىندا ادىلەتتى ءارى كۇشتى قازاقستاننىڭ نەگىزىن قالاعان كونستيتۋتسيا كۇشىنە ەندى. ۇكىمەت مەملەكەت باسشىسى قاسىم-جومارت توقايەۆتىڭ تاپسىرمالارىن جۇزەگە اسىرۋ اياسىندا سيفرلىق ەكونوميكانى دامىتۋ جانە ەكونوميكالىق ءوسۋدىڭ جاڭا كوزدەرىن قالىپتاستىرۋ باعىتىن جۇزەگە اسىرۋدى جالعاستىرا بەرمەك.
ەلىمىزدىڭ ەكونوميكالىق ساياساتىن جەتىلدىرۋ ءۇشىن حالىقارالىق تاجىريبەنى پايدالانۋدىڭ جانە ح ۆ ق- مەن ساراپتامالىق ديالوگ جۇرگىزۋدىڭ ماڭىزدىلىعى اتاپ ءوتىلدى.
- ءبىزدىڭ ديالوگ تۇراقتى ميسسيالار مەن ماقساتتى كونسۋلتاتسيالار جانە ح ۆ ق تاراپىنان مەملەكەتتىك ورگاندارعا تەحنيكالىق كومەك كورسەتۋ شارالارى اياسىندا جالعاسۋدا. وسى ميسسيانىڭ قورىتىندىلارى بويىنشا ۇسىنىستار ەلىمىزدىڭ ماكروەكونوميكالىق جانە ماكروپرۋدەنتسيالىق ساياساتىن ودان ءارى جەتىلدىرۋ ءۇشىن پايدالى باعدار بولادى دەپ سەنەمىن، - دەپ اتاپ ءوتتى ولجاس بەكتەنوۆ.
امينا لارەش ميسسيا جۇمىسىنىڭ قورىتىندىسىن جاريا ەتە وتىرىپ، قازاقستانداعى ماكروەكونوميكالىق احۋالعا وڭ باعا بەردى.
- ءبىز قازاقستانعا پرەزيدەنت حالىققا جولداۋىن جاريالاپ، ينفراقۇرىلىمدى دامىتۋ جانە ادام كاپيتالىنا سالىناتىن ينۆەستيتسيالاردىڭ ماڭىزدى باسىمدىقتارىن بەلگىلەپ بەرگەننەن كەيىن كوپ ۇزاماي كەلدىك. قازاقستاننىڭ ەكونوميكالىق الەۋەتىنىڭ زور ەكەنىن اتاپ وتكىمىز كەلەدى. ءبىزدىڭ ارامىزداعى ديالوگ پەن ۇسىنىلىپ وتىرعان ۇسىنىمدار ازاماتتاردىڭ قاجەتتىلىكتەرىن ەسكەرە وتىرىپ، تۇراقتى ەكونوميكالىق ءوسۋدى قامتاماسىز ەتۋگە ىقپال ەتەدى دەپ ۇمىتتەنەمىز، - دەپ اتاپ ءوتتى ح ۆ ق ميسسياسىنىڭ قازاقستان بويىنشا باسشىسى.
ح ۆ ق- نىڭ قازان ايىنداعى بولجامىنا سايكەس، قازاقستان ەكونوميكاسى 2026-جىلدىڭ قورىتىندىسى بويىنشا تۇراقتى ءوسىم كورسەتۋدى جالعاستىرادى، ال كەلەسى جىلى ەكونوميكالىق ءوسىم قارقىنى جەدەلدەي تۇسەدى. قوردىڭ مالىمەتىنشە، ورتالىق ازيا ەلدەرى، سونىڭ ىشىندە قازاقستان، جۇرگىزىلىپ جاتقان رەفورمالاردىڭ ناتيجەسىندە سىرتقى فاكتورلارعا تۇراقتىلىعىن ساقتاپ وتىر. دامۋدىڭ باسىمدىقتارى باعا تۇراقتىلىعى، اقشا-نەسيە جانە بيۋدجەتتىك ساياساتتى ۇيلەستىرۋ، بيۋدجەتتىك رەزەرۆتەردى قالپىنا كەلتىرۋ جانە ساۋدانى ءارتاراپتاندىرۋ بولىپ سانالادى.
2026-جىلدىڭ 10 ايىنىڭ قورىتىندىسى بويىنشا ج ءى ءو ءوسىمى %4,5 دى قۇرادى، نەگىزگى كاپيتالعا سالىنعان ينۆەستيتسيالار كولەمى %4,9 عا ارتىپ، 18,3 تريلليون تەڭگەگە دەيىن ۇلعايدى. ونەركاسىپ پەن اۋىل شارۋاشىلىعىندا وڭ ديناميكا بايقالدى، بۇل رەتتە ەڭ جوعارى ءوسۋ قارقىنىن ماشينا جاساۋ (%22,2) جانە فارماتسيەۆتيكا (%50,9) كورسەتتى. اۋىل شارۋاشىلىعى 5,2 پايىزعا ءوستى.
كەزدەسۋ سوڭىندا ۇكىمەتتىڭ سىندارلى ديالوگتى قولداۋعا جانە پەرسپەكتيۆالى سالالاردا قورمەن ءوزارا ءتيىمدى ىنتىماقتاستىقتى تەرەڭدەتۋگە دايىندىعى راستالدى. ح ۆ ق- نىڭ بارلىق ۇسىنىستارى مەن ۇسىنىمدارىن سالالىق مەملەكەتتىك ورگاندار زەرتتەيدى.
ەسكە سالساق، حالىقارالىق ۆاليۋتا قورى 2031-جىلى ج ءى ءو 553 ميلليارد دوللار بولاتىنىن بولجاعان ەدى.