كوستەنكو شاحتاسى تۇتىندەپ، 200 گە جۋىق كەنشى ەۆاكۋاتسيالاندى

قاراعاندى. KAZINFORM - قاراعاندى وبلىسىنداعى كوستەنكو شاحتاسىندا تاعى دا ءورت تۇتاندى. توتەنشە جاعداي مينيسترلىگىنىڭ مالىمەتىنشە، قاراعاندىدا كوستەنكو اتىنداعى اتىنداعى شاحتادا 4 كونۆەيەر شترەگى تۇتىندەگەن.

بىقسۋدى العاشقى ءورت ءسوندىرۋ قۇرالدارىنىڭ كومەگىمەن كونۆەيەر تراسساسىنىڭ ەلەكتر سلەسارى ايبار قوسانوۆ ءسوندىردى.

كەنشى وقيعا تۋرالى حابارلاپ جاتقاندا شاحتانىڭ باسقارۋ بولمەسىندە ءتۇتىن سيگناليزاتسياسى ىسكە قوسىلعان.

ساعات 19:45-تە سيگناليزاتسياعا بايلانىستى ءتۇتىن سوندىرىلگەنىنە قاراماستان ەۆاكۋاتسيا جوسپارى بويىنشا شاحتاداعى 194 كەنشىنى سىرتقا شىعارۋ جونىندە شەشىم قابىلدانعان.

ساعات 21:47-دە 187 كەنشى جەر بەتىنە شىعارىلدى.

وقيعانى باقىلاۋ جانە شاحتانىڭ تىنىس- تىرشىلىگىن قامتاماسىز ەتۋ ءۇشىن ۋچاسكە باسشىلارى مەن جەتەكشىلەرىنەن 7 جۇمىسشى ورنىندا قالدى.

الدىن الا سەبەپ - تومەنگى توسەمنىڭ روليگىنە بوگدە زات ءتۇسىپ، ونىڭ جۇمىسىن توقتاتىپ تاستاعان. سودان كونۆەيەر لەنتاسى بىقسىعان.

ەسكە سالساق، وتكەن جىلى 28-قازان ساعات 2:33-تە قاراعاندى وبلىسىنداعى كوستەنكو اتىنداعى شاحتادا اپات بولىپ، 46 كەنشى قازا تاپتى. اپات كەزىندە شاحتادا 252 ادام بولعان، جەر بەتىنە 205 شاحتەر شىعارىلدى.

وسى قايعىلى وقيعاعا بايلانىستى قازاقستاندا 29-قازان جالپىۇلتتىق ازا تۇتۋ كۇنى بولىپ جاريالاندى.

قازاقستان پرەزيدەنتى قاسىم-جومارت توقايەۆ قازا تاپقان كەنشىلەردىڭ تۋعان-تۋىستارى مەن جاقىندارىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىن تىلەدى.

ۇكىمەتكە كەنشىلەردىڭ وتباسىلارىنا بارلىق قاجەتتى كومەك كورسەتۋدى تاپسىردى. وقيعانىڭ ءمان-جايىن انىقتاۋ ءۇشىن ۇكىمەتتىك كوميسسيا قۇرىلدى. سونداي-اق، «ارسەلورميتتالتەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋ تاپسىرىلدى.

9-جەلتوقساندا شاحتاداعى جارىلىسقا ۇلاسقان ءورتتىڭ سەبەپتەرىن تەكسەرۋ جونىندەگى ۇكىمەت كوميسسياسىنىڭ قورىتىندى وتىرىسى ءوتتى. كوميسسيا جۇمىسىنىڭ قورىتىندىسى بويىنشا جۇمىس بەرۋشىنىڭ كىناسى 0 انىقتالىپ، جۇمىستى ءقاۋىپسىز ورىنداۋ تالاپتارىن بۇزعان 19 جاۋاپتى تۇلعا انىقتالدى.