كورەيالىقتارعا قازاق كۇرەسىن ۇيرەتەمىن دەگەن مامانداردى قارسى الۋعا دايىنبىز - بە حانسۋن

استانا. KAZINFORM- دۇنيەجۇزىلىك كوشپەندىلەر ويىندارىنا وڭتۇستىك كورەيا سپورتشىلارى دا قاتىسىپ جاتىر. بۇگىن اتالعان ويىندار اياسىندا كورەيا دەلەگاتسيا باسشىسى بە حانسۋن مىرزامەن سۇحباتتاسۋدىڭ ءساتى تۇسكەن ەدى.

- بە حانسۋن مىرزا، قازاق ەلىندە ءوتىپ جاتقان كوشپەندىلەر ويىندارىنا قوش كەلدىڭىزدەر.

- ءبىزدى قازاقستان وسى كوشپەندىلەر ويىنىنا شاقىرعانىنا مىڭ العىس ايتامىز. قازاق ەلىنە سپورتشىلارىمىزدى باستاپ كەلدىم. كەلۋىمىزگە قازاقستانداعى باس ەلشىلىگىمىز جانە وسىنداعى كورەي مادەني ورتالىعىنا العىسىمدى بىلدىرگىم كەلەدى. مەنىڭ بىلۋىمشە قازاقستاندا 100 مىڭنان استام ەتنيكالىق كورەي حالقى تۇرادى. بۇل - ەكى ەلدىڭ دوستىعىنىڭ ايناسى. وسى ارقىلى ەكى ەل سپورتتىق، تۋريستىك جانە مادەني تۇرعىدان ءبىر-بىرىمىزگە تاجىريبە الماسۋعا بولادى دەپ ەسەپتەيمىن.

- بۇگىن ءبىر سپورتشىلارىڭىز قازاق كۇرەسىنەن سىنعا تۇسكەنىن كوردىك. قازاقتىڭ ۇلتتىق كۇرەسىن قالاي ۇيرەندىڭىزدەر؟

- كورەيالىقتار قازاق كۇرەسىمەن وسىعان دەيىن كۇرەسىپ كورمەگەن بولاتىن. ءبىرىنشى رەت قازاق كۇرەسىنەن جارىسقا قاتىسىپ وتىرمىز. ءبىزدى V دۇنيەجۇزىلىك كوشپەندىلەر ويىنىنا قاتىسۋعا قازاقستان تاراپىنان ۇسىنىس جاسالدى. ءبىز قۋانا كەلىستىك. ءبىراق قازاقتىڭ ۇلتتىق سپورت تۇرلەرىن ءالى بىلمەيتىن ەدىك. الايدا ويلانا كەلە باسقا سپورت تۇرلەرىمەن قاتار قازاق كۇرەسىمەن دە بەلدەسۋگە شىعىپ كورۋدى ءجون سانادىق. سودان كەيىن، قازاقستانداعى ارىپتەستەرىمىزبەن ۇنەمى بايلانىستا بولا وتىرىپ، قازاق كۇرەسىنىڭ ەرەجەلەرىن، ايلا-تاسىلدەرىن ۆيدەو ارقىلى ۇيرەندىك.

- قازاق كۇرەسى سىزدەرگە ۇنادى ما؟ سىزدەردىڭ ۇلتتىق كۇرەستەرىڭىزبەن قانداي ۇقساستىق بايقالدى؟

- ارينە، ۇنادى. ۇلكەن جاقتان كۇرەستىڭ بارلىعى بىردەي سياقتى كورىنگەنىمەن ءار ەلدىڭ ءوزىنىڭ ەرەكشەلىكتەرى كورىنەدى. ءبىزدىڭ كۇرەستە دە بەلىمىزگە بەلبەۋ بايلايمىز. الايدا ۇستاۋ تاسىلدەرى باسقاشا بولادى. ءادىس جاساۋ جاقتارىندا دا كوپتەگەن وزگەشەلىك كەزدەسەدى.

- قازاق كۇرەسىنىڭ ءادىس جاساۋ جاقتارىندا قانداي قيىندىقتاردى بايقادىڭىزدار؟

- جالپى، قيىن ەشتەڭە بولمايدى. ءبىز ءبىرىنشى رەت قاتىسىپ وتىرعان سوڭ، كىشكەنە قيىنداۋ بولعان شىعار. بولاشاقتا قازاق كۇرەسىنىڭ بارلىق ايلا- ءتاسىلىن مەڭگەرىپ الۋعا بولاتىنىن تۇسىندىك.

- بولاشاقتا، ەلدەرىڭىزگە قازاقستاننان قازاق كۇرەسىن ۇيرەتەتىن ماماندار شاقىرۋعا نە بولماسا قازاق ەلىنە كەلىپ قازاق كۇرەسىن ۇيرەنۋگە قىزىعۋشىلىق بار ما؟

- ارينە، ەگەر سىزدەر تاراپىنان سونداي ۇسىنىس بولىپ جاتسا، ءبىز قۋانا كەلىسەر ەدىك. ءبىزدىڭ ەلىمىزگە كەلىپ، كورەيالىقتارعا قازاق كۇرەسىن ۇيرەتەمىن دەگەن ماماندار بولسا، قارسى الۋعا دايىنبىز. مىنە، وسى كوشپەندىلەر ويىنى ارقىلى ءبىزدىڭ سپورتشىلارىمىز قازاق كۇرەسىنىڭ نە ەكەنىن كوردى. كورەيادا دا جەتى مەملەكەتتىڭ سپورتشىلارى بىرىگىپ وتكىزەتىن حالىقارالىق كۇرەس سايىسى بار. بولاشاقتا، وسىنداي سايىستارعا قازاقستاندىق بالۋاندار دا كەلىپ قوسىلىپ جاتسا كەرەمەت بولار ەدى.

- اڭگىمەڭىزگە راقمەت!

اۆتور

كۇنسۇلتان وتارباي