كورەيادا 80 جاستاعى اجە «الەم ارۋىنا» قاتىستى

استانا. قازاقپارات - بىرىككەن ۇلتتار ۇيىمىنىڭ ەسەبى بويىنشا قازىر الەمدە 700 ميلليوننان استام قارت بار. ال 2050 -جىلعا قاراي قاريالار سانى 2 ميلليارد ادامعا جەتەدى دەگەن بولجام ايتىلادى.

2026-جىلدان كەيىن دۇنيەجۇزىندەگى 6 ادامنىڭ بىرەۋى ەگدە ادام بولماق. ماماندار: «قاريالار الەم حالىنىڭ 20 پايىزىنا جەتەدى»، - دەيدى. قارتتىق - بۇل ادامزات قۇتىلا المايتىن ءومىر كەزەڭى. سوندىقتار ماماندار: «قاريالىققا قىنجىلماي، كەرىسىنشە، وعان دۇرىستاپ دايىندىق جاساۋ كەرەك»، - دەيدى. قازىر الەمدە شامامەن 8 ميلليارد 200 ميلليون ادام بار.

الەمدەگى ەڭ قارت سۇلۋ وڭتۇستىك كورەيادا تۇرادى. ارينە، اجەلەردىڭ ءبارى ادەمى. ءبىز رەسمي سايىسقا قاتىسىپ جاتقان اپا تۋرالى ايتىپ تۇرمىز. 80 جاستاعى چوي سۋە حۋا «الەم ارۋى» بايقاۋىندا باق سىناۋعا بەل بۋعان. بۇل سايىستىڭ شارتىندا جاس شەكتەۋى جوق ەكەن. وسىلايشا كەيۋانا: «حالقى جىلدام قارتايىپ جاتقان ەلدە قاريالاردىڭ دا قىزىقتى دا ادەمى ءومىر سۇرە الاتىنىن جانە ارمانى تاۋسىلمايتىنىن كورسەتكىم كەلەدى»، - دەيدى.

چوي سۋن حۋا، «الەم ارۋىنا» قاتىسۋشى:

- ۇلىم باسىندا: «اناشىم، ول جارىستا سىزگە نە بار؟»، - دەدى. كەيىن «جاقسى، قاتىسساڭىز قاتىسىڭىز»، - دەپ قولدادى. كەشە بايقاۋعا سۋرەتتەرىمدى جىبەردىم. قابىلداپ جاتىر. قۋانىشىمدا شەك جوق. بويىڭىزدا تالانتىڭىز بولسا، تارتىنباۋ كەرەك دەپ ەسەپتەيمىن. ۇلكەن بۋىن بەلسەندى بولۋىمىز كەرەك.

نەگىزى چحۆە سۋن حۆانى اجەي دەپ اتاۋعا اۋزىن بارمايدى. 80 جاستاعى ارۋ ۇلتتىق بايقاۋدىڭ فينالىنا جولداما الدى جانە جاھاندىق كەزەڭگە قاتىسۋى مۇمكىن.

ەگەر چحۆە «الەم ارۋىنا» جولداما السا، وندا ول بۇل بايقاۋدىڭ ەڭ قارت قاتىسۋشىسى اتالادى! «مەن الەمدى تاڭ قالدىرعىم كەلەدى»، - دەيدى سۇلۋ اجەي.

ايتا كەتسەك، جىلدار بويى سۇلۋلىق بايقاۋىنىڭ ۇيىمداستىرۋشىلارى 18 بەن 28 جاس ارالىعىنداعى جاس شەكتەۋلەرىن قاتاڭ ساقتاپ كەلدى، الايدا بيىلدان باستاپ جاستىڭ جوعارعى شەگى الىنىپ تاستالدى.

ياڭ سۋن مۋك، سەۋل تۇرعىنى:

- وڭتۇستىك كورەيادا كەيىنگى كەزدەرى قاريالار جاڭا ترەند باستاپ جاتىر. ءسان ءىس- شارالارىنا، توك- شوۋلارعا بەلسەنە قاتىسىپ، جارنامالىق بەينەباياندارعا تۇسەدى.

ماماندار «قارتتىققا قامدانۋ كەرەك» دەگەن كەڭەس ايتادى.

اننا بەيكەر، كلەمسون ۋنيۆەرسيتەتى پسيحولوگيا پروفەسسورى:

- كوپ جاعدايدا جاسى ۇلعايىپ، قارتتىققا جاقىنداعان ادامداردا كۇيزەلىس باستالادى. جاسى 65-تەن اسسا، بولدى، سارى ۋايىمعا بوي الدىرادى. ادامدار زەينەتكەرلىككە لايىق تۇردە دايىندىق جاسامايدى. جاسى 65-تەن اسا باستاعاندا «ءومىرىم ءبىتتى، مەن ءۇشىن ەشتەڭە قىزىق ەمەس، دالادا قالدىم» دەگەن تەرىس ويلاردىڭ جەتەگىنە ىلەسەدى. قاريالىق تىرشىلىكتىڭ زاڭى عوي. ونى دۇرىس قابىلداپ، قارتتىققا قامدانعان دۇرىس.

عالىمدار «ساقالعا اق ءتۇستى، كوڭىلگە داق ءتۇستى» دەپ مەرزىمىنەن بۇرىن بەرىلمەۋگە شاقىرادى. «ەڭ ادەمى، ەڭ ەرىكتى، قالاعانىڭىزعا قىزىقتى دا مازمۇندى سۇرەتىن ءومىر زەينەتكە شىققاننان كەيىن باستالادى»، - دەيدى بىلگىرلەر.